Apple Inc.

Ang Apple Inc. (NASDAQ: AAPL), dating Apple Computer Inc., ay isang Amerikanong korporasyong multinasyunal na nakatuon sa pagbalangkas at paggawa ng mga elektronikong pang-konsyumer at produktong software na may kaugnayan dito. Natatag sa Cupertino, California noong Abril 1 1976, ang Apple ay gumagawa, nagbebenta, at sumusuporta sa isang serye ng mga personal na kompyuter, portable media players, cellphones, computer software, computer hardware at aksesoryang hardware. Noong Setyembre 2007, nagpapatakbo ang kumpanya ng mga 200 tingiang tindahan sa limang mga bansa, at isang tindahang nasa internet kung saan tinitinda ang produktong hardware at software. Mabibili naman sa iTunes Store ang mga musika, audiobook, mga laro pang-iPod, bidyong pang-musika, mga kabanata ng mga palabas sa telebisyon, at pelikula na maaaring kunin mula sa web sa pamamagitan ng iTunes sa Mac o Windows, at gayon din sa iPod touch at ang iPhone. Ilan sa mga kilalang produktong hardware ng kumpanya ang mga linya ng mga personal na kompyuter na Macintosh, ang mga linya ng mga portable media player na iPod, at ang iPhone. Ilan sa mga produktong software ng Apple ang Mac OS X na operating system, ang iLife na isang software na pang-midya, at Final Cut Studio, isang software panggawa ng propesyunal na pelikula o awdyo.