Hula
Ang hula[1] ay ang pagsasalaysay, paglalahad, pagpapatalastas, at pag-aakma ng kalagayan, katayuan, resulta, wakas o kaya posisyon ng mga bagay-bagay at mga kaganapan sa pagsapit ng hinaharap o kinabukasan. Ito ang mga pagsasaad ng mga maaaring maganap, sasapit, o darating. Maaari rin itong mga pananaw, kuru-kuro, akala, wari, o opinyong nabuo bagaman hindi at walang tiyak o talagang nalalaman hinggil sa isa o ilang mga bagay. Katumbas ito ng mga salitang haka-haka, palagay, sapantaha, prediksyon, prognostiko, pronostiko at pag-alam antimano.[2] Tinatawag na mga manghuhula ang mga taong marunong humula, katulad ng mga propeta, mga astrologo, at ng mga bumabasa ng baraha na pinaniniwalaang nakapagsasabi ng magiging kapalaran at suwerte ng isang tao. Sa larangan ng paglalayag, nahuhulaan ng mga mandaragat o marino at mga mangingisda ang taya ng panahon. Nahuhulaan at napag-aaralan ng Kawanihan ng Panahon ang kung uulan o magiging maganda ang araw kinabukasan, o kaya ang daloy ng trapiko sa daan; ang mga hulang ito ang siya namang ipinapahayag sa mga pahayagan at programang pambalita sa mga radyo at telebisyon. Tinuturing na mga propesiya ang mga hula ng mga propeta. Partikular na tumutukoy ang propesiya sa mga panghuhula o pagsasabi ng mga magaganap sa hinaharap na binigyang inspirasyon ng Diyos. Sa literal na kahulugan, ang propesiya ang "pagbanggit bago pa man maganap." Isang halimbawa nito ang panganganak kay Hesus sa Belen (kilala rin bilang Betlehem).[2] Sa paglalaro, karaniwang pinahuhulaan ang mga pangalan at edad.
Tinatawag na dibinasyon (mula sa Ingles na divination) ang panghuhulang ginagawa ng isang taong nagsasabing sinasaniban o inaalihan ng isang espiritu. Tinatawag din itong presentimyento, hula, at kutob. Kaugnay ito ng salitang dibinatoryo o dibinatorya (mula sa Ingles na divinatory).[3] Bilang isang gawain, isang pagsubok o pagtatangka matuklasan ang isang mensahe ng Diyos o ng mga diyos sa pamamagitan ng pagsusuri o eksaminasyon ng mga bagay na katulad ng mga minarkahan o tinandaang mga bato o kaya atay ng isang isinakripisyong hayop.[4]
[baguhin] Mga sanggunian
- ↑ Hula, Tagalog English Dictionary, Bansa.org
- ↑ 2.0 2.1 "Hula". English, Leo James. Tagalog-English Dictionary (Talahulugang Tagalog-Ingles). (1990).
- ↑ Gaboy, Luciano L.. "Divination". Gabby's Dictionary, Praktikal na Talahuluganang Ingles-Filipino ni Gabby/Gabby's Practical English-Filipino Dictionary, GabbyDictionary.com.
- ↑ American Bible Society. (2009). "Divination, Word List". The Letters of Saint Paul, Commemorative Edition, Celebrating the Pauline Year 28 June 2008 - 29 June 2009, Good News Translation. American Bible Society, Bagong York., pahina 132.
