What Makes You Beautiful

Mula sa Wikipediang Tagalog, ang malayang ensiklopedya
Tumalon sa: nabigasyon, hanapin
"What Makes You Beautiful"
Singgulo ni One Direction
mula sa album na Up All Night
B-side "Na Na Na"
Inilabas 11 Setyembre 2011
Pormato Digital download, CD single
Nirekord 2011
Kinglet Studios and Cosmos Studios
(Estokolmo, Suwesya)
Henero Teen pop, pop rock, power pop
Haba 3:18
Tatak Syco, Columbia
(Mga) manunulat Rami Yacoub, Carl Falk, Savan Kotecha
Produser Yacoub, Falk
One Direction singles chronology
"What Makes You Beautiful"
(2011)
"Gotta Be You"
(2011)
Music video
"What Makes You Beautiful" sa YouTube

Ang What Makes You Beautiful ay ang kauna-unahang isahang awit (single) ng pop na bandang Ingles-Irlandes na One Direction. Nagsilbi ito bilang pauna at pangunahing isahang awit mula sa kanila ring paunang studio album, ang Up All Night (2011). Isinulat nina Savan Kotecha at ng mga prodyuser na sina Rami Yacoub at Carl Falk, ang awiting ito'y inilabas ng Syco Records noong 11 Setyembre 2011. Matapos itong irekord sa Cosmos Studios at Kinglet Studios sa Estokolmo, Suwesya, nakaramdam ang banda ng gaan ng loob na mabuo ang nasabing kanta kung saan ay naging masaya silang ilabas ito bilang kanilang unang isahang awit. Isa itong masiglahing (uptempo) kanta na nagpapakita ng pagsasama-sama ng mga elemento ng teen pop, power pop, at pop rock. Itinatampok nito ang prominenteng korong batay sa gitara at riff, at ang tinatawag na middle eight ay binubuo ng tempong "na na na".

Positibong pinuna ng mga kritiko ng kontemporaryong musika ang nasabing awit, na nagbibigay-diin sa pagiging patok nito sa panlasa ng kabataang tagapakinig at sa sensibilidad ng pop. Nag-umpisa itong numero uno sa UK Singles Chart, matapos makapagtala ng di-pa nailalabas (pre-ordered) na rekord ang Sony Music Entertainment ng 153,965 kopyang nabili sa unang linggo nito. Nanguna rin ang single sa mga Singles Charts ng Irlanda at Eskosya, at narating ang nangungunang sampu (top ten) ng mga Singles Chart ng Australya at Bagong Selanda, Ultratop 50 sa Flanders, Canadian Hot 100, Japan Hot 100 at Billboard Hot 100 ng Estados Unidos. Narating nito ang rurok na ikaapat na puwesto sa Billboard Hot 100 at noong Enero 2013, ay nakapagbenta na ng higit apat na milyong kopya sa Amerika. Sa bentang 5 milyong kopya sa buong mundo, ang kanta ay maituturing na pinakamabiling awit ng isang boyband sa kasaysayang digital at isa sa pinakamabentang isahang awit sa lahat ng panahon.

Ang katuwang na bidyo-awit (music video) ay nilikha sa direksiyon ni John Urbano at nagpapakita sa One Direction na naglilibang sa isang dalampasigan sa Malibu, California. Ang klip ay nakapagbigay sa grupo ng tatlong Gantimpalang MTV sa Awit-Bidyo (MTV Video Music Awards) noong 6 Setyembre 2012, kasama na ang Pinakamahusay ng Bidyong Pop (Best Pop Video). Itinanghal ng One Direction ang awitin nang live sa mga palabas sa telebisyon at mga seremonyang gantimpala (award ceremonies), at maging sa dalawa nilang mga malalaking konsiyerto: ang Up All Night Tour (2011–2012) at Take Me Home Tour (2013). May sarili ring bersiyon ang mga mang-aawit gaya ng Boyce Avenue, Parade, Rita Ora, ang Piano Guys at si Josh Groban ng “What Makes You Beautiful”, at ito rin ay itinanghal sa isang kabanata ng Glee, “Prom-asaurus”. Nagwagi ang “What Makes You Beautiful” ng Gantimpalang BRIT para sa Pinakamahusay na Awiting Ingles (Best British Single) noong seremonya nito taong 2012.

Kaligiran at Paglalabas[baguhin]

Matapos mabuo at magtapos sa ikatlong puwesto sa ikapitong serye ng The X Factor noong 2010,[1] pumirma ang One Direction sa Syco Music.[2] Isinulat ang “What Makes You Beautiful” nina Rami Yacoub, Carl Falk at Savan Kotecha, at ipinrodyus nina Yacoub at Falk. Kinumpleto rin nina Yacoub at Falk ang paglalapat ng instrumento sa kanta. Hinawakan naman ni Serban Ghenea ang audio mixing, ni Tom Coyne ang audio mastering, at ni John Hanes ang mix engineering, kung saan si Phil Seaford naman ang nagsilbing katulong niya. Matapos irekord ang kanta sa Cosmos Studios at Kinglet Studios sa Estokolmo, Suwesya, nakaramdam ng gaan ng loob ang banda at masaya silang ilabas ang kanta bilang kanilang paunang isahang awit. Tinawag ng miyembrong si Liam Payne ang nasabing awit na “perpekto,”[3] at ayon naman kay Harry Styles, “Nung nirerekord naming ang kanta sa istudyo, alam na kaagad na gusto namin itong maging aming paunang isahang awit.”[4] Sa pahayag ni Styles sa MTV News, “Sa tingin ko para sa amin, gusto naming maglabas ng isang bagay na hindi naman cheesy pero nakatutuwa. Kahit papaano’y kinakatawan kami nito; sa tingin ko’y medyo natagalan din kaming hanapin ito pero sa tingin ko’y nahanap na namin ang tamang kanta.” Dagdag ni Payne, “Lagi naming ninanais [ang isahang awit] na maging isang bagay na hindi inaasahan ng mga tao mula sa amin, at nung marinig nga namin ito, kami rin mismo’y hindi makapaniwala kaya saktong nagswak.”[5] Unang pinatugtog ang “What Makes You Beautiful” sa BBC Radio 1 noong 10 Agosto 2011,[4] at inilabas ng Syco Music sa Europa, Australya at New Zealand sa pamamagitan ng digital download noong 11 Setyembre 2011.[6] Isang CD Single naman ang inilabas sa Nagkakaisang Kaharian noong 12 Setyembre 2011,[7] at sinundan ito sa Australya noong ika-25 ng Nobyembre at sa Alemanya naman noong ikalawa ng Disyembre, parehong taong 2011.[8][9]

Para naman sa paglabas ng Up All Night sa Hilagang Amerika noong 13 Marso 2012, ginamit ng mga ehekutibo ng Columbia Records ang social media upang hulmahin ang kampanyang pangmerkado (marketing campaign) nito. Nagpasiya ang kasamang tagapangulo ng Columbia Records na si Steve Barnett at kanyang pangkat na baligtarin ang nakasanayang paraan ng paglalabas ng isahang awit sa radyo. Sa halip nagsagawa ang kumpanya ng apat na buwang kampanyang pangmerkadong nakatuon sa pagbuo ng fanbase sa pamamagitan ng social media bago pa man ilabas o patugtugin ang isahang awit sa radyo. Sa kampanya sa social media, hinikayat ang mga tagahangang lumagda sa mga petisyon at sumali sa mga paligsahang pambidyo upang manalo ng isang konsiyerto sa kanilang bayan. Naging matagumpay ang kampanya dahil mula sa 40,000, umakyat sa 400,000 ang mga tagasunod ng pahina ng Facebook ng One Direction sa Estados Unidos. Bunga nito, nakapagbenta agad ang “What Makes You Beautiful” ng 131,000 kopya sa unang linggo nito, kahit hindi pa man ito napatutugtog sa radyo. Binaha ng tawag ang mga himpilan ng radyo mula sa mga tagahanga. Ayon kay Johnny Wright, na siyang namahala sa New Kids on the Block, Backstreet Boys, at ‘N Sync, “Ngayon, tumatawag sila sa mga istasyon ng radyo, at ang mga tao sa radyo’y napapakamot-ulo habang sinasabing “Wala pa kaming ganyang kanta rito.” Halos gaya ito ng pagbabalik ng The Beatles. Tinatawag ko itong sobrang publisidad (hype), pero positibo, dahil totoo ang lahat ng ito. Hindi ito gawa-gawa lang. Walang nagbayad para sa mga batang ito.” Inilabas ang single sa Kanada sa pamamagitan ng digital download noong 31 Enero 2012. Ang “What Makes You Beautiful” ay inilabas noong 14 Pebrero 2012 sa Estados Unidos at ipinasama ng Columbia Records sa listahan ng tugtugin ng mga radyong nagpapatugtog ng mga modernong kanta (contemporary hit radio) noong 28 Pebrero 2012.

Komposisyon[baguhin]

Tumatakbo ang “What Makes You Beautiful” ng 3:18 (3 minuto at 18 segundo). Ayon sa sheet music na inilathala ng EMI Music Publishing, nakatakda ang “What Makes You Beautiful” sa common time na may tempo na 120 kumpas kada minuto. Nakasulat sa key ng E major, sinusunod nito ang chord progression na E–A–B, umaabot ang elementong pantinig (vocal element) nito mula sa notang B3 hanggang G♯5. Ang “What Makes You Beautiful” ay isang awiting teen pop, pop rock, at power pop, na may impluwensiya ng electropop. Ikinumpara naman ni James C. McKinley Jr. ng The New York Times ang chord progression nito sa La Bamba. Ang pambukas na riff ng gitara ng kanta’y maikukumpara sa isahang awit ng Grease na “Summer Nights.” Ang koro ng “What Makes You Beautiful” ay nakabatay sa gitara; inihalintulad ito ni Robert Copsey ng Digital Spy sa pinaghalong awitin ni Pink na “Raise Your Glass” at ng McFly na “All About You.” Nagtataglay din ito ng instrumentong “kampanita” (cowbell), at nagtataglay ang middle eight nito ng bakas ng “oh na na na.”

Puna at Reaksiyon[baguhin]

Tumanggap ang kanta ng positibong puna mula sa mga kritiko sa pangkalahatan. Ginawaran ni Robert Copsey ng Digital Spy ang “What Makes You Beautiful” ng apat sa limang bituin; pinuri niya ang melodiya nito na nakatatawag-pansin at binuod ito bilang “kaibig-ibig, napakawalang-muwang at nagbabadyang maging dahilan ng pananabik sa pagitan ng mga magkakabarkada.” Tinawag naman ni Zachary Houle ng PopMatters ang awitin bilang isang “magandang tugtog pansayaw na nakapagpapakilos at sigla.” Binigyang-papuri naman ni Ailbhe Malone ng NME ang datíng ng kanta sa mga kabataang tagapakinig at maging ang chord progression nito sa pagiging “simple at sakto na puwedeng tugtugin ng akustikong gitara sa isang kasayahan sa bahay.” Tinawag naman ito ng Newsround na “Nakatutuwa, masigla, at malakas ang datíng.” Ayon naman kay Matthew Chisling ng AllMusic, ito ay isang “awiting mabula (effervescent) at sariwang pag-ibig ng kabataan,” at pinili ito bilang isa sa pinakamagagandang kanta sa Up All Night. Tinawag naman ni Sophie Goddard ng Cosmopolitan ang isahang awit bilang “di-kapani-paniwalang may datíng.” Binigyang-marka naman ni Jack Murray ng Student ang “What Makes You Beautiful” ng lima sa limang bituin at tinawag itong “hindi lamang isa sa pinakamahusay na awiting pop ng taon sa ngayon, kundi maaaring maging ng kahit sino pang kalahok sa X Factor.” Pinapurihan naman ni Murray ang produksiyon sa pagsusulat at sa mga lente (para sa bidyo). Ginawaran naman ni Tanner Stransky ng Entertainment Weekly ang “What Makes You Beautiful” ng gradong B+ at tinawag ang awitin na “mababaw ngunit karapat-dapat sa paghanga (crushworthy)” at isinulat na ang kanta’y nagpapakitang hindi pa namamatay ang konsepto ng mga boyband.

Inilarawan ito ni Jason Lipshutz ng Billboard bilang “ang talagang usapan (real deal),” na tinukoy ang kanta bilang “puwedeng patugtugin nang walang sawa” gaya ng “Bye Bye Bye” ng ‘N Sync. Opinyon ni Lipshutz na ang “cheeky electro-pop twist” nito ang pinakamahusay nitong katangian. Pagsusuri ni Stephanie Abrahams ng TIME, “Bakas mula sa grupo ang katangian ng nagdaang mga boyband hinggil sa mga letrang makatawag-pansin sa nagsisimula pa lamang na pag-ibig – “The way that you flip your hair gets me overwhelmed” (Nadadala ako sa paggalaw pa lamang ng iyong buhok) – isinasahimig nila ang kanilang kagyat na matagumpay na isahang awit – na kahit ang mga magulang ay mapag-iiwanan. Mas malayong klase iyon kaysa sa tipikal na mga linya ni Nicki Minaj.” Isinulat naman ng editor ng The Observer na si Kitty Empire sa isang pagtataya, “Maliban sa nakahihikayat nilang numero unong kantang “What Makes You Beautiful,” wala namang gaanong namumukod-tangi sa mga kanta nila.” Nanalo ang “What Makes You Beautiful” ng Gantimpalang BRIT para sa Pinakamahusay na Awiting Ingles sa Gantimpalang BRIT ng 2012 (2012 BRIT Awards), na naganap noong 21 Pebrero 2012. Nagwagi rin ang awitin ng Gantimpalang Teen Choice para sa Napiling Awit: Awit ng Pag-ibig sa Gantimpalang Teen Choice ng 2012 (Teen Choice Awards).

Katayuan sa mga Talaan[baguhin]

Nagtala ng 5 milyong kopyang naibenta sa buong mundo, ang kanta ay kabilang sa mga pinakamabiling isahang awit sa lahat ng panahon. Nag-umpisa ang “What Makes You Beautiful” na numero uno sa Irish Singles Chart noong 15 Setyembre 2011; ang B-side nito na “Na Na Na” ay pumasok rin na pang-27. Ang isahang awit ay nanguna sa listahan sa loob ng apat na magkakasunod na linggo. Ang “What Makes You Beautiful” ay naging ikalabing-apat na pinakamabentang isahang awit ng 2011 sa Irish Singles Chart. Sa Nagkakaisang Kaharian naman, natanggap ng “What Makes You Beautiful” ang pinakamataas na bilang ng di-pa nailalabas (pre-order) na awit para sa isahang awit ng Sony Music Entertainment. Nakapagbenta ito ng 82,000 kopya sa unang dalawang araw nito, taláng umakyat sa 100,000 sa ikatlong araw. Pumasok ito sa UK Singles Chart na numero uno noong 18 Setyembre 2011, kung saan naging 153,965 kopya naman noong linggong iyon ang naitalá – ang pinakamataas na bentahan sa UK sa unang linggo para sa anumang awitin ng 2011 noong panahong iyon. Nag-umpisa rin ang “What Makes You Beautiful” na numero uno sa Scottish Singles Chart. Ang “What Makes You Beautiful” ang ikadalawampung pinakamabentang isahang awit ng 2011, na nagtala ng 540,000. Ang isahang awit ay ang ika-92 pinakamabentang isahang awit ng ika-21 siglo sa Nagkakaisang Kaharian mula noong Mayo 2012. Mula ikawalo ng Disyembre 2012, nakapagbenta ang “What Makes You Beautiful” ng 781,000 kopya sa UK.

Sa Belhika, nag-umpisa ang kanta sa numero 44 sa parehong talaan ng Flemish Ultratop 50 at sa Wallonian Ultratip; narating nito ang rurok na numero 8 at 19 ayon sa pagkakasunud-sunod. Kung tutuusin ang buong dalawampu’t dalawang lingo sa French Singles Chart, nag-umpisa itong numero 83 at narating ang rurok na numero 38. Sa Finland, nag-umpisa ang isahang awit at narating ang rurok na numero 20. Sa nangungunang 60 (Top 60) ng Swedish Sverigetopplistan, nag-umpisa ang isahang awit sa numero 49, narating ang rurok na numero 29, at nagtagal ng dalawampu’t apat na linggo sa listahang iyon. Sinertipikahan itong platinum nang apat na beses ng Swedish Recording Industry Association (GLF), na nagtala ng bentang 80,000 kopya. Samantala, nag-umpisa naman ang “What Makes You Beautiful” sa numero 15 at narating ang rurok na numero 7 sa Australian Singles Chart. Nagtagal ang nasabing awit sa nangungunang dalawampu nang limang linggo sa Australian Singles Chart. Sinertipikahan naman itong platinum nang anim na beses ng Australian Recording Industry Association (ARIA), nagtala ng bentang 420,000 yunit. Lumitaw din ang “Na Na Na” sa Australian Singles Chart noong 28 Nobyembre 2011 sa numero 84. Sa New Zealand Singles Chart naman, pumasok ang awit sa numero 16, at narating ang rurok na ikalawang puwesto sa ikaapat at ikalimang linggo nito. Nagtagal ang awitin nang labing-isang linggo sa nangungunang sampu ng nasabing listahan. Nasertipikahan naman itong platinum nang dalawang beses ng Recording Industry Association of New Zealand (RIANZ), na nagtala ng bentang 30,000 yunit.

Nag-umpisa ang isahang awit sa Canadian Hot 100 sa numero 9, habang hawak nito ang ikalawang puwesto sa Canadian Hot Digital Songs Chart na may 19,000 naibentang download, ang pinakamalaking umpisa para sa baguhang nagtaláng mang-aawit mula noong pumasok ang kantang “Summer Girl” ng Stereo na numero dos noong Hunyo 2009. Narating ng awit ang rurok na numero siyete sa Canadian Hot 100 at nasertipikang platinum nang apat na ulit ng Music Canada, na nakapagtala ng bentang 320,000. Sa Estados Unidos, naging pinakamataas na umpisa sa Billboard Hot 100 ang “What Makes You Beautiful” para sa isang mang-aawit na Ingles simula 1998. Noong 22 Pebrero 2012, nag-umpisa ang awit sa Billboard Hot 100 sa numero 28, habang hawak nito ang ika-12 puwesto sa listahan ng Hot Digital Songs, na nakapagbenta ng 132,000 digital download sa unang linggo nito. Noong linggong natapos sa 14 Abril 2012, narating ng “What Makes You Beautiful” ang rurok na numero kuwatro. Mula 30 Hunyo 2012, nagtagal ang awit nang labintatlong magkakasunod na linggo sa nangungunang sampu ng Billboard Hot 100. Naging matagumpay rin sa listahan ang awitin sa ibang listahan ng Billboard, kung saan naabot nito ang nangungunang lima sa listahan ng Pop Songs, Adult Pop Songs, at Hot 100 Airplay, habang nanguna naman ito sa listahan ng Hot Dance Club Songs. Nakapagbenta ang kanta ng 3,881,000 kopya sa Estados Unidos noong 2012, na naging pinakamabiling awitin ng isang boyband sa kasaysayang digital. Hanggang Enero 2013, nakapagbenta ang isahang awit ng apat na milyong kopya sa Estados Unidos. Ang awit ay sinertipikahang platinum nang apat na beses ng Recording Industry Association of America (RIAA) noong 21 Pebrero 2013, na nakapagbenta ng apat na milyong kopya.

Bidyo-Awit[baguhin]

Ang bidyo-awit para sa “What Makes You Beautiful” ay binuo sa direksiyon ni John Urbano. Kinunan sa loob ng dalawang araw noong Hulyo 2011. Una itong ipinalabas noong 19 Agosto 2011. Sa bawat araw ng limang araw bago unang ipinalabas ang bidyo, nagpaskil ang One Direction ng isang pasilip na kuha (teaser trailer) ng bidyo online. Bawat pasilip ay nagpapakita ng kuha mula sa bidyo at mga eksena sa likod ng kamera, at isa sa mga miyembro ng banda ang nagsasabi kung ilang araw na lang ang natitira bago ang unang pagpapalabas ng bidyo. Nagbubukas ang bidyo sa pagpapakitang naglilibang ang One Direction sa dalampasigan ng Malibu, California, na sinisingitan ng mga eksena nila habang nagmamaneho ng isang kahel na campervan. Sa ikalawang berso ng kanta, isang grupo ng tatlong babae ang nakisali sa banda sa may dalampasigan; sa tulay na solong parte ni Styles, inaawitan niyang mag-isa ang isang babae nang sobrang lapit. Sa huling mga koro ipinakikita ang banda at ang mga babae habang nakaupo’t nakapaligid sa apoy, ang mga nagkikislapang mga pailaw at ang kuhaan ng mga litrato. Sa isang stiyo web na nagbabahagi ng mga bidyo (video sharing website) na MUZU TV, ang bidyo ay ang ikaapat na pinakapinanood na bidyo-awit ng 2011 sa UK. Nagwagi ang bidyo ng dalawang MTV Gantimpala sa Awit-Bidyo (MTV Video Music Awards) para sa Pinakamahusay na Bidyong Pop (Best Pop Video) noong 6 Setyembre 2012. Hanggang Marso 2013, nakakuha na ang bidyo-awit ng higit 350 milyong silip (view) sa Vevo. Noong 2012, isang tagapag-blog (blogger) sa BuzzFeed ang nakapansin ng pagkakahawig ng bidyo at ng bidyo ng pop punk na bandang Blink-182 na “All the Small Things” – ang bidyo ay kinunan sa Dalampasigan ng Santa Monica at kinunan mula sa parehong anggulo ng kamera gaya ng “What Makes You Beautiful,” na nagresulta sa pagbibiro ng mga miyembro ng midya na ginaya ng pangkistang banda ang One Direction labing-isang taon bago sila mabuo.

Mga Live na Pagtatanghal[baguhin]

Itinanghal ng One Direction ang “What Makes You Beautiful” sa unang pagkakataon sa Red or Black? noong 10 Setyembre 2011. Sinimulan ang pagtatanghal ng mga punong-abalang sina Ant & Dec na nag-aanunsiyong ang banda’y mahuhuli na sa pagtatanghal, at nagpalitaw ng bidyo ng One Direction habang nakasakay sa isang London Tube na sasakyang punó ng mga tagahanga, habang ang bersiyong plaka ng kanta’y sinimulang patugtugin. Bawat tagahanga sa sasakyan ay binigyan ng tiket na may bilang. Iniwan ng banda at ng mga tagahanga ang sasakyan at nagtungo sa istudyo ng telebisyon, kung saan inaawit ang natitirang bahagi ng kanta nang live. Matapos ang kanta, nakakuha si Styles ng tiket na may numero habang nalalaglag sa entablado. Ang numero ay may katapat na tiket na hawak ng isang tagahanga mula sa sasakyan; ang kulay ng damit ng tagahanga ay ang tamang sagot para sa isang hamon ng Red or Black?. Inawit ng banda ang “What Makes You Beautiful” pagkatapos ng B-side nitong “Na Na Na” sa Gantimpalang Pangkabataan (Teen Awards) ng BBC Radio 1 noong ikasiyam ng Oktubre 2011. Inawit din ito ng banda sa bukás na teleton (telethon) na Children in Need 2011 noong 19 Nobyembre 2011. Pagkatapos ng “Gotta Be You” at “One Thing,” inawit ng One Direction ang “What Makes You Beautiful” sa Jingle Bell Ball ng Capital FM noong ikaapat ng Disyembre 2011, sa The O² Arena. Nagtanghal sila ng pagsasanib-awit (medley) na “She Makes Me Wanna” at “What Makes You Beautiful” kasama ang JLS sa ikawalong serye ng katapusan ng The X Factor noong 10 Disyembre 2011. Inawit ng grupo ang “One Thing” at “What Makes You Beautiful” sa Dancing on Ice noong ikalima ng Pebrero 2012.

Sa Italya, itinanghal ng banda ang awitin sa 2012 Sanremo Music Festival noong 14 Pebrero 2012. Sa Pransiya naman, kinanta nila ang “What Makes You Beautiful” at “One Thing” sa Le Grand Journal noong 22 Pebrero 2012. Sa Estados Unidos, itinanghal ng One Direction ang kanta kasama ng More Than This at “One Thing” sa unang pagkakataon sa The Today Show sa Rockefeller Center noong 12 Marso 2012. Tinatayang may 15,000 mga tagahanga ang dumagsa sa plasa. Sinabi ni Melissa Lonner, beteranong produsyer sa aliwan (senior entertainment producer) para sa The Today Show, “Ang One Direction kung tutuusi’y hindi pa kilala at wala pang sikat na kanta. Kumalat na lang sila basta, at lahat ng matatanda’y nagsasabing “Sino ang mga taong ito, at paano nila nakilala ang mga ito?” Inawit din nila ang kanta sa Gantimpalang ‘’Kids’ Choice’’ ng 2012 (2012 Kids’ Choice Awards) noong 31 Marso 2012. Inawit ng One Direction ang “What Makes You Beautiful” at “One Thing” sa programang pangkomedya sa telebisyon ng NBC na Saturday Night Live noong ikapito ng Abril 2012, at lumitaw din sa isang comedy sketch kasama si Sofía Vergara. Sa Australya, kinanta nila ang “One Thing” at “What Makes You Beautiful” sa Ika-54 na Gantimpalang Logie (54th Logie Awards), kung saan nagprisinta rin sila ng gantimpala para sa “Pinakakilalang Bagong Artistang Babae (Most Popular Female Talent) noong 15 Abril 2012. Noong 12 Agosto 2012, inawit ng One Direction ang “What Makes You Beautiful” sa panapós na seremonya ng Palarong Olimpiko sa Tag-init 2012, na kumatawan sa paglilipat patungong Rio de Janeiro bilang punong-abala sa Palarong Olimpiko sa Tag-init 2016. Kabilang ang awit sa talaan ng awitin ng banda sa napakyaw (sold-out) na palabas nila sa Plasang Hardin ng Madison (Madison Square Garden) noong ikatlo ng Disyembre 2012. Inawit din nila ito sa dalawa nilang malalaking lakbay-konsiyerto: sa Up All Night Tour (2011–12) at sa Take Me Home Tour (2013).

Mga Bersiyon ng Ibang Mang-Aawit[baguhin]

Nagkaroon din ng sariling bersiyon ng What Makes You Beautiful ang ilan sa mga sikat na mang-aawit. Inirekord ng Boyce Avenue ang kanta at kasama sa album nilang New Acoustic Sessions, Vol. 2, na inilabas noong Hunyo 2011. Noong Setyembre 2011, inawit ito nang a capella ng grupong Parade. Noong Disyembre 2011, ang banda ng magkakapatid na Cimorelli ay nagkaroon din ng sariling bersiyon nito at ang kasamang bidyo ay kasalukuyang may 27 milyong silip (view) sa YouTube. Inawit naman ito ni Nick Jonas nang live para sa mga tagahanga noong Mayo 2012. Ginamit din ang kanta sa seryeng pantelebisyon sa Amerika na Glee nina Kevin McHale, Chord Overstreet, Harry Shum, Jr., Samuel Larsen, at Damian McGinty sa kabanatang pinamagatang “Prom-asaurus”. Una itong inere noong ikawalo ng Mayo 2012, at ito ay ang ika-19 na kabanata ng ikatlong kapanahunan (season). Inawit ng mga karakter na sina Artie Abrams (McHale), Sam Evans (Overstreet), Mike Chang (Shum), Joe Hart (Larsen), at Rory Flanagan (McGinty) ang kanta sa kabanatang iyon, at sinabayan ito ng sayaw. Pagkilala ni Sarah Maloy ng Billboard, “Siyempre hindi mawawala ang mga nagtitiliang mga babae at mga praktisadong galaw-boyband.” Inilarawan ni Maloy ang bersiyon ng Glee na “halos walang binago sa tunog o estilo ng orihinal na bersiyon.” Isinulat naman ni Erica Futterman ng Rolling Stone na, “Habang nakakadalá ang orihinal ng One Direction, kahit papaano’y may tatak din ang bersiyon ng Glee. (Literal. Masiglang rumarampa ang mga kalalakihan ng Glee sa entablado sa parehong direksiyon gaya ng mga kilabot na Ingles na iyon.)” Ipinalagay ni Futterman na iyon ang ikaapat na pinakamahusay na pagtatanghal sa kabanatang iyon. Inilabas sa pormang digital download ang bersiyon ng Glee sa Tindahan ng iTunes (iTunes Store) noong ikawalo ng Mayo 2012. Nagtala ito sa numero 93 at 163 sa Canadian Hot 100 at UK Singles Chart ayon sa pagkakasunud-sunod. Itinanghal din ito ni Miranda Cosgrove sa isang konsiyerto noong Hulyo 2012. May sarili ring bersiyon si Rita Ora noong Agosto 2012 sa Live Lounge ng BBC Radio 1. Noong Hulyo 2012, nagkarga ang The Piano Guys sa YouTube ng bersiyong instrumental na piyano ng kanta, na nakilala’t sumikat. Gumawa ng pagsasanib-awit ang bandang Kristiyano na Anthem Lights kasama ang Gotta Be You at One Thing noong Setyembre 2012. Umawit ng sariling bersiyon si Josh Groban sa Ika-64 na Gantimpalang Primetime Emmy (64th Primetime Emmy Awards) bilang pagpaparangal kay Jimmy Kimmel. Samantalang gumawa rin ng sariling bersiyon ang bandang The 1975 sa Live Lounge ng BBC Radio 1 noong Setyembre 2013.

Talá ng mga Awitin[baguhin]

Digital download at CD Single

1. "What Makes You Beautiful" – 3:18
2. "Na Na Na" – 3:05

Mga Tao sa Likod ng Awitin[baguhin]


"What Makes You Beautiful"
  • Tom Coyne – audio mastering
  • Carl Falk – pagsulat, produksiyon, programming, instrumento, gitara
  • Serban Ghenea – audio mixing
  • John Hanes – mix engineering
  • Savan Kotecha – pagsulat
  • Phil Seaford – mix engineering assistance
  • Rami Yacoub – pagsulat, produksiyon, programming, instrumento, bass


"Na Na Na"
  • Dick Beetham – audio mastering
  • Iain James – pagsulat
  • Savan Kotecha – pagsulat
  • Matt Lawrence – audio engineering
  • Greg Marriot – engineering assistance
  • James Murray – pagsulat
  • Matt Squire – pagsulat, produksiyon, backing vocals, audio mixing (recorded music)
  • Mustapha Omer – pagsulat

Mga Sanggunian[baguhin]

Maliban kung tuwirang tutukuyin, ang lahat ng mga sanggunian ay orihinal na nakasulat sa wikang Ingles. Isinalin ang mga bahagi ng pinagkunang pahinang web batay sa konsepto at pagkakaunawa ng mga sumulat ng artikulo.

  1. Sperling, Daniel (12 Dis 2010 20:47 GMT). "One Direction finish 3rd in 'X Factor' final". Digital Spy. UK: Hearst Magazines. http://www.digitalspy.co.uk/tv/s103/the-x-factor/news/a292842/one-direction-finish-3rd-in-x-factor-final.html. Nakuha noong 29 Set 2013. 
  2. Lee, Cara (15 Dis 2010). "Father Xmas Si's three special gifts". The Sun. London: News International. http://www.thesun.co.uk/sol/homepage/showbiz/tv/x_factor/3277896/Simon-Cowell-snaps-up-Cher-Rebecca-and-One-Direction.html. Nakuha noong 29 Set 2013. 
  3. Copsey, Robert (20 Hul 2011 11:55 BST). "One Direction: "Debut single is perfect"". Digital Spy (UK: Hearst Magazines). http://www.digitalspy.co.uk/music/news/a330745/one-direction-debut-single-is-perfect.html. Nakuha noong 05 Okt 2013. 
  4. 4.0 4.1 Love, Ryan (10 Ago 2011 09:15 BST). "One Direction premiere debut single 'What Makes You Beautiful': Listen". Digital Spy (UK: Hearst Magazines). http://www.digitalspy.co.uk/music/s103/the-x-factor/news/a334259/one-direction-premiere-debut-single-what-makes-you-beautiful-listen.html. Nakuha noong 05 Okt 2013. 
  5. "Watch One Direction’s Video". MTV News. UK: MTV. 20 Ago 2011 11:31. http://www.mtv.co.uk/news/one-direction/329291-one-direction-what-makes-you-beautiful-video. Nakuha noong 05 Okt 2013. 
  6. "What Makes You Beautiful". iTunes Store. Apple Inc. https://itunes.apple.com/au/album/what-makes-you-beautiful/id452514272. Nakuha noong 05 Okt 2013. 
  7. "What Makes You Beautiful [Single, Maxi"]. http://www.amazon.co.uk/dp/B005EJ3XAQ/. Nakuha noong 05 Okt 2013. 
  8. "What Makes You Beautiful". Sanity. http://www.sanity.com.au/products/2205544/What_Makes_You_Beautiful. Nakuha noong 05 Okt 2013. 
  9. "What Makes You Beautiful" (sa Aleman). Sony Music Entertainment. http://www.sonymusic.de/One-Direction/What-Makes-You-Beautiful/P/2504518/B/88697860492. Nakuha noong 05 Okt 2013. 

Mga Kawing Panlabas[baguhin]

Opisyal na Bidyo-Awit sa YouTube