Abenida Fernando Poe Jr.

Abenida Fernando Poe Jr.
*Fernando Poe Jr. Avenue*
Abenida Fernando Poe Jr.; Fernando Poe Jr. Avenue
Abenida FPJ; Abenida Roosevelt
	Pahilagang tanaw ng abenida patungong EDSA malapit sa bodega ng Coca-Cola.
Impormasyon sa ruta
Haba	2.871 km (1.784 mi)
Pangunahing daanan
Dulo sa hilaga	N1 (Abenida Epifanio de los Santos) / AH26 sa Barangay Muñoz (Veterans Village)
	Kalye M.H. del Pilar; Kalye Pitimini; Abenida Del Monte;
Dulo sa timog	N170 (Abenida Quezon) sa Barangay Santa Cruz
Lokasyon
Mga pangunahing lungsod	Lungsod Quezon
Sistema ng mga daan
	Mga daanan sa Pilipinas Mga lansangan; Mga mabilisang daanan Talaan; ;

Ang Abenida Fernando Poe Jr. (Ingles: Fernando Poe Jr. Avenue), na kilala rin bilang Abenida FPJ (FPJ Avenue) at dating tinawag na Abenida Roosevelt (Roosevelt Avenue), ay isang pangunahing lansangang tersiyaryo sa distrito ng San Francisco del Monte (kilala sa madla bilang Frisco) sa Lungsod Quezon, Kalakhang Maynila. May haba itong 2.871 kilometro (1.784 mi) at dumaraan sa pagitan ng EDSA sa hilaga at Abenida Quezon sa timog. Pagdaan, binabagtas nito ang Kalye M.H. del Pilar, Kalye Pitimini, at Abenida Del Monte. Paglampas ng EDSA, tutuloy ito bilang Abenida Kongresyonal.

Isa itong bahagi ng sistema ng lansangang bayan sa Pilipinas bilang isang pambansang daang tersiyaryo. Hindi nakanumero ang mga lansangan sa ganitong uri.

Ipinangalan ang abenida kay Fernando Poe Jr., isang tanyag na Pilipinong aktor at Pambansang Alagad ng Sining ng Pilipinas na dating tumira sa abenida.^[2]^[3] Hango naman ang dating pangalan na Abenida Roosevelt sa dating pangulo ng Estados Unidos na si Franklin D. Roosevelt.^[4]

Mga panukala sa pagbabago ng pangalan

Noong 2010, inilathala ng kinatawan ng unang distrito ng Lungsod Quezon na si Vicente Crisologo ang isang panukalang batas sa Kapulungan ng mga Kinatawan na binabago ang pangalan ng Abenida Roosevelt. Ihahango ang pangalan sa dating kinatawan ng kaniyang distrito na si Reynaldo Calalay, na pumanaw noong 2003 habang nagsisilbing kinatawan.^[5]

Sinusog ng Senado ang Panukalang-Batas ng Senado Blg. 7499 na unang ipinanukalang babaguhin ang pangalan ng Abenida Del Monte mula sa aktor na si Fernando Poe Jr.. Pagkaraang hingan ng mga kuro-kuro mula sa sari-saring mga pangkat panrelihiyon at sa Pambansang Komisyong Pangkasaysayan (NHCP), naghain si Senador Tito Sotto ng isang susog upang baguhin na lamang ang pangalan ng Abenida Roosevelt. Inaprobahan ng Senado ang susog at ang panukalang-batas noong ika-13 ng Setyembre 2021.^[6] Sumang-ayon ang Kapulungan ng mga Kinatawan sa susog ng Senado noong ika-28 ng Setyembre at dinala ito sa tanggapan ng Pangulo noong ika-20 ng Nobyembre. Noong ika-10 ng Disyembre 2021, nilagdaan ni Pangulong Rodrigo Duterte ang Batas Republika Blg. 11608 na binabago ang pangalan ng daan sa Abenida Fernando Poe Jr.. Inilathala ito sa Official Gazette noong ika-13 ng Enero 2022.^[2]