Ang Unang Baka na may Maluwag na Balat at ang Unang Kalabaw na may Mahigpit na Balat

"'Ang Unang Baka na may Maluwag na Balat at ang Unang Kalabaw na may Mahigpit na Balat" (Ingles: The First Loose-Skinned Cow and the First Tight-Skinned Carabao) ay isang kwentong-bayan mula sa Pilipinas. Maari itong ituring na isang alamat  — isang uri ng kuwentong bayan na nagpapaliwanag o naglalaman ng mga kwento tungkol sa pinagmulan ng isang lugar, pangalan ng mga tao, hayop, halaman o bagay-bagay. Karaniwan, ang mga alamat ay naglalaman ng mga elementong mahika o di-karaniwan na tumutugma sa paniniwala at kultura ng isang lugar o grupo ng mga tao. Ito ay isang mahalagang bahagi ng mga tradisyonal na kwento ng isang kultura o bansa.

Sinalaysay ng isang Tagalog na nagngangalang Amanda Morente ng Pinamalayan, Mindoro kay Dean Fansler ang kuwentong-bayan na "Ang Unang Baka na may Maluwag na Balat at ang Unang Kalabaw na may Mahigpit na Balat" na napabilang sa aklat ni Fansler na Filipino Popular Tales. Narinig daw ni Morente ang istoryang ito sa isang matandang babae sa kanyang bayan. Katulad ng ibang kuwentong-bayang Pilipino, pinapaliwanag nito kung bakit maluwag ang balat ng baka at mahigpit naman sa kalabaw.

Koleksyon

Ang kwentong ito ay isa sa mga nilikom ni Dean S. Fansler, PhD sa kaniyang librong: Filipino Popular Tales. Ang naturang aklat ay nailimbag ng American Folklore Society noong 1921 sa Lancaster, PA at sa New York. Bagamat ang kwento ay naisalin sa Tagalog at iba pang diyalekto, nailimbag ito sa Ingles. Sa kaniyang paliwanag, pampanitikan at hindi linggwista ang layunin ng kaniyang paglilimbag ng kwentong ito sa Ingles. Bagamat muli, maaring ilimbag ang kwento sa Espanyol, minarapat ni Fansler na gamitin ang Ingles dahil ayon sa kaniya, ito ang mas umiiral na lengwahe noong mga panahong yaon.