Ayala Triangle Gardens

Ayala Triangle Gardens
Bantayog ni McMicking sa Ayala Triangle
Uri	Urbanong liwasan
Lokasyon	Makati, Pilipinas
Sukat	2 ektarya (20,000 m2)
Nilikha	19 Nobyembre 2009 (2009-11-19)
Pinapatakbo ng/ni	Ayala Land
Katayuan	Bukas
Pagpasok ng pampublikong transportasyon	Ayala Triangle  10   11   12   38   40   42   45   46   59  Robinsons Summit Center  L02  Makati Stock Exchange
Websayt	ayalatriangle.com/gardens

Ang Ayala Triangle Gardens (lit. na 'Mga Hardin ng Tatsulok ng Ayala') ay isang 2-ektarya (4.9-akre) na hardinadong liwasang urbano sa Makati, Kalakhang Maynila, Pilipinas. Isa itong pampublikong hardin at patyong hugis-tatsulok na matatagpuan sa gitna ng Sentrong Kalakalang Distrito ng Makati. Ipinangalan ito sa may-ari at debeloper nitong Ayala Land, at binuksan sa publiko noong Nobyembre 19, 2009. Hango sa Hyde Park sa London, ang liwasan, na napapalamutian ng mga palma, akasya, at mga tropikal na dahon, ay itinuturing na isa sa mga pinakamalalaking “berdeng” lugar sa Makati.

Naging sentro ang Triangle para sa mga pagtitipong panlipunan sa distritong pangnegosyo, at tanyag tuwing Pasko para sa magarbo nitong pagtatanghal ng mga ilaw at tunog. Tahanan din ito ng Tower One and Exchange Plaza at ng Gusali ng Pamilihang Sapi ng Makati, gayundin ng Helm, ang una at tanging restoran sa Pilipinas na may dalawang bituing Michelin, at ng lumang Toreng Nielson, na kinalalagyan ng isang restorang pinong hain na tinatawag na Blackbird.

Kasaysayan

Ang lupang kinatatayuan ngayon ng Ayala Triangle Gardens ay dating 42-ektarya (100-akre) na Nielson Field, ang paliparan ng Maynila bago ang Ikalawang Digmaang Pandaigdig, na matatagpuan sa malawak na Hacienda de San Pedro de Macati na pagmamay-ari ng pamilyang Zóbel de Ayala. Nang nadekomisyon ang paliparan noong 1948 at inilipat sa kasalukuyang kinaroroonan nito sa Nichols Field, ibinalik ang lupa sa mga Ayala at muli itong pinaunlad bilang isang komersiyal na distrito. Ginawang mga kalsada ang mga landasan na ngayo’y bumubuo sa mga hangganan ng Triangle: Abenida Ayala sa timog-kanluran; Paseo de Roxas sa hilaga't hilagang-silangan; at Abenida Makati sa silanga't timog-silangan. Tanging ang tore ng kontrol ng paliparan ang napanatili, na unang ginawang Filipinas Heritage Library at kalaunan ay ginawang restoran ng pinong kainan na Blackbird noong 2014.

Pagsapit ng 1971, inilipat ng Ayala Corporation ang kanilang bagong punong-tanggapan sa gusali ng Sentro ng Pamilihang Sapi ng Makati sa Triangle, na idinisenyo ni Leandro Locsin, Pambansang Alagad ng Sining sa Arkitektura. Ang natitirang bahagi ng Triangle ay ginawang larangang pampu­tbol na kilala bilang Ugarte Field, na ipinangalan sa alamat ng putbol ng Pilipinas noong dekada 1930, si Sebastian Ugarte. Noong dekada 1980, ang Ugarte Field ay nagsilbi bilang pook ng mga regular na protesta laban sa diktadurang Marcos.

Paglalarawan

Bantayog ni Gabriela Silang sa Ayala Triangle

Matatagpuan ang Ayala Triangle Gardens sa timog ng Salcedo Village, isang bahagi ng barangay Bel-Air, malapit sa hangganan nito sa mga barangay San Lorenzo at Urdaneta. Kabilang sa mga gusali sa Triangle ang lumang Sentro ng Pamilihang Sapi ng Makati at ang Ayala Tower One (tahanan ng Pamilihang Sapi ng Pilipinas) sa gilid ng Abenida Ayala; ang dating Nielson Tower, na ginawang restoran; at ang Ayala Triangle Tower One at Ayala Triangle Tower Two (tahanan ng The Shops at Triangle Gardens, isang Ayala Mall) na matatagpuan sa interseksiyon ng Abenida Makati at Paseo de Roxas.