Pumunta sa nilalaman

Carrie Underwood

Mula sa Wikipedia, ang malayang ensiklopedya
Carrie Underwood
Si Carrie Underwood sa parada ng American Idol Experience sa Walt Disney World.
Si Carrie Underwood sa parada ng American Idol Experience sa Walt Disney World.
Kabatiran
Pangalan noong ipinanganakCarrie Marie Underwood
Kapanganakan (1983-03-10) 10 Marso 1983 (edad 43)
Muskogee, Oklahoma
PinagmulanChecotah, Oklahoma, Estados Unidos
GenreCountry, country pop
Trabahomang-aawit, manunulat ng awit
Instrumentoboses, gitara, piyano
Taong aktibo2004—kasalukuyan
Label19 / Arista Nashville
Websaytwww.CarrieUnderwoodOfficial.com

Si Carrie Marie Underwood (ipinanganak noong Marso 10, 1983)[1] ay isang Amerikanang mang-aawit at manunulat ng kanta. Siya ay sumikat matapos niyang manalo sa ikaapat na season ng American Idol noong 2005, at muling bumalik bilang hurado simula sa ikadalawampu't tatlong season nito noong 2025. Ang unang single ni Underwood, ang "Inside Your Heaven" (2005), ang nagbigay sa kanya ng titulong kauna-unahang musikerong country na nagsimula sa tuktok ng tsart ng Billboard Hot 100 ng Estados Unidos, at nag-iisang musikerong solo ng country na nakamit ang unang puwesto sa Hot 100 noong dekada 2000. Sa tulong ng mga sumunod na tagumpay ng mga awiting "Jesus, Take the Wheel" at "Before He Cheats," ang kanyang unang album na Some Hearts (2005) ay naging pinakamabentang simulang album ng lahat ng panahon para sa isang musikero ng country. Ito rin ang itinanghal ng Billboard bilang nangungunang album ng country ng dekada 2000 at nagbigay sa kanya ng tatlong parangal mula sa Gawad Grammy, kabilang ang Pinakamahusay ng Bagong Musikero. Sinundan niya ito ng Carnival Ride (2007), na nakabenta ng mahigit kalahating milyong kopya sa unang linggo at nagpanalo sa kanya ng dalawang Gawad Grammy. Sa kanyang ikatlong album na Play On (2009), siya ang naging kauna-unahang babae sa kasaysayan na nagkaroon ng labing-isang magkakasunod na pinakamataas na dalawang singler at unang mula dekada 1980 na nagkaroon ng sampung numero unong mga patok na awitin sa radyong country.

Nakamit ni Underwood ang ikalawang pinakamabentang album ng isang babae ng 2012 at isang Gawad Grammy sa kanyang ikaapat na album na Blown Away (2012). Ang kanyang album na kompilasyon na Greatest Hits: Decade #1 (2014) ay nagtakda ng maraming rekord sa tsart at benta, at naglabas ng crossover na single na nanalo ng Grammy na may pamagat na "Something in the Water." Ang kanyang ikalimang album na Storyteller (2015) ay nagbigay sa kanya ng titulong tanging musikerong country sa kasaysayan na ang lahat ng unang limang album pang-istudiyo ay umabot sa unang o ikalawang puwesto sa tsart na Billboard 200. Sa kanyang ika-anim na album na Cry Pretty (2018), siya ang naging kauna-unahang babae sa kasaysayan na nagtala ng apat na album pang-istudiyong country na umabot sa tuktok ng Billboard 200, at nagkaroon ng pinakamalaking simula ng isang babaeng musikero noong 2018. Noong dekada 2020, inilabas niya ang kanyang unang album Pampasko na My Gift (2020); nanalo ng Gawad Grammy para sa Pinakamahusay na mga Pinag-ugatan sa Ebanghelyo para sa kanyang unang album na gospel (o ebanghelyo) na My Savior (2021); at pinatibay ang kanyang imahe bilang musikerong country pop sa Denim & Rhinestones (2022).

Isa siya sa mga pinakamabentang musikero sa kasaysayan, na may higit sa 85 milyong rekord na naibenta sa buong mundo. Siya ang babaeng musikerong country na may pinakamataas na bilang ng benta ng dihital na single, at ang babaeng may pinakamaraming single na numero uno (16) sa tsart na Country Airplay ng Estados Unidos. Itinanghal siya ng Billboard bilang nangungunang babaeng musikero ng dekada 2000 at 2010, samantalang isinama naman siya ng Pollstar sa 15 pinakamalalaking musikerong babae na naglilibot sa nakalipas na apat na dekada. Kabilang sa kanyang mga parangal ang walong Gawad Grammy, pinakamaraming Gawad Musikang Billboard (12) at Gawad Musikang Amerikano (17) sa mga babaeng musikerong country, pitong Pandaigdigang Tala sa Guinness, at pagiging bahagi ng Hollywood Walk of Fame (Lakad ng Katanyagan sa Hollywood) at Grand Ole Opry. Tinawag siya ng Rolling Stone bilang "ang babaeng bokalista ng kanyang henerasyon sa anumang genre," isinama siya ng Time sa listahan ng 100 pinakamaimpluwensiyang tao sa mundo noong 2014, at idineklara naman siya ng Forbes bilang pinakamatagumpay na nanalo sa American Idol.

Sa labas ng musika, sumabak din si Underwood sa larangan ng moda at pagsusulat. Inilunsad niya ang kanyang linya ng kasuotang pang-ehersisyo na Calia by Carrie noong 2015 at ang pinakamabentang aklat sa pamumuhay ayon sa The New York Times na Find Your Path noong 2020.

Sining

[baguhin | baguhin ang wikitext]

Tinig

[baguhin | baguhin ang wikitext]

Si Underwood ay malawakan ang pagkilala dahil sa kanyang pambihirang tinig. Pinuri ni David Wild ng Rolling Stone ang kanyang boses, na sinabing "kaya niyang abutin ang anumang nota."[2] Inilarawan ang kanyang lawak ng tinig bilang "napakalawak," at binigyang-diin ng mga kritiko ang kanyang kakayahang humawak ng nota nang matagal. Tinukoy ng Billboard ang kanyang kakayahan sa pag-awit bilang "kamangha-mangha."[3] Ayon sa mga kritiko sa kanyang mga konsiyerto, "kaya niyang bitawan ang isang nota na tila walang katapusan, na tumatakbo sa mas maraming oktaba kaysa sa inaakala mong posible."[4]

Nang tanungin siya kung nahihirapan ba siyang umawit nang mataas sa loob ng 90–120 minutong palabas na live, sumagot si Underwood: "Masyado akong mapagmalaki para ibaba ang mga piyesa. Hindi ko iyon gagawin. Marahil kapag tumanda ako, susulat ako ng mga kantang nasa mababang piyesa para mas madali. Magaling naman ako sa tibay kapag nasa entablado. Mahalaga ang regular na pag-eehersisyo at pagpapanatiling malakas ang katawan... Sa ngayon, epektibo pa rin ito sa akin. Mapalad lang ako na kaya kong maging malakas ang boses nang matagal."[5]

Pinuri rin ng kapwa mang-aawit na si Randy Travis ang tinig ni Underwood nang tanungin tungkol sa pagkanta nito ng kanyang awit na "I Told You So" (1988): "Mas bagay sa kanya ang kanta dahil mas mataas ang kanyang tinig. Baritono ang boses ko, samantalang ang kanyang boses soprano ay akma sa saklaw ng kanta. Ang kakayahan niyang abutin at panatilihin ang matataas na nota ay kahanga-hanga."[6] Inilarawan din ng iba ang kanyang boses bilang "maraming gamit" o versatile.[7]

Nakilala rin siya sa mga live na pagtatanghal ng mga awiting ebanghelyo tulad ng "How Great Thou Art," kung saan napansin ng mga kritiko ng Yahoo! ang kanyang "makapangyarihang pagganap" na kayang umantig ng damdamin ng tagapakinig.[8] Nakapagbigay rin siya ng mahusay na pagtatanghal ng mga awiting rock song tulad ng "Paradise City" ng Guns N' Roses, na ayon sa Rolling Stone ay isang "natatanging pagganap." Idinagdag pa nila na, "Nang umabot sa kasukdulan ang kanta, buong lakas niya itong sinabayan, umikot na parang buhawi, at naglabas ng ilang matitinis na sigaw." Sinabi pa ng magasin na "kung sakaling muling magsama ang mga orihinal na miyembro ng Guns N' Roses nang wala si Axl Rose, marahil matalino silang magpasyang kunin si Carrie Underwood upang isuot ang kanyang bandana."[9] Noong 2023, iniranggo ng Rolling Stone si Underwood sa ika-158 puwesto sa listahan ng 200 Pinakamahusay na Mang-aawit sa Lahat ng Panahon.[10]

Mga impluwensiya

[baguhin | baguhin ang wikitext]

Ipinahayag ni Underwood na ang "musika sa kabuuan" ang pangunahing impluwensiya niya, dahil "lumaki akong nakikinig sa iba’t ibang uri ng musika at iba-ibang kanta mula sa iba't ibang dako."[11] Binanggit niya ang mga musikero ng rock tulad ng Queen, Guns N' Roses, George Michael, The Rolling Stones, My Chemical Romance, at Papa Roach bilang kanyang mga inspirasyon.[12][13][14] Sa isang panayam noong 2014, sinabi niya tungkol sa yumaong punong mang-aawit ng Queen, "Palagi akong malaking tagahanga ni Freddie Mercury. Pinakikinggan ko siya noong bata pa ako. Napakarami niyang nagagawa sa kanyang boses. Sa mga taong tulad niya—na may kamangha-manghang tinig—ako talaga nahuhumaling."[13]

Noong Hulyo 2022, sumama siya sa Guns N' Roses sa entablado sa kanilang konsiyerto sa Istadyum ng Tottenham Hotspur sa Londres, kung saan siya nakapagtanghal kasama ang isa sa kanyang mga idolo, si Axl Rose. Pagkatapos ng palabas, sinabi niya, “Marami na akong kinantang kanta ng Guns N' Roses, at mga taong tulad niya ang nagturo sa akin kung paano umawit."[13]

Sa mga awdisyon sa American Idol noong 2025, isang kalahok ang kumanta ng mga nu metal na awitin gaya ng "Freak on a Leash" ng Korn at "Bodies" ng Drowning Pool.[15][16] Ipinahayag ni Underwood ang kanyang tuwa at sinabi niyang nakinig siya ng maraming nu metal noong siya ay nasa hayskul.[17]

Kabilang sa mga musikerong country artist na itinuturing niyang impluwensiya sina George Strait,[18] Dolly Parton,[19] Randy Travis,[20] Martina McBride, Reba McEntire, at Garth Brooks. Bagaman hindi niya hayagang binanggit sina Faith Hill at Shania Twain bilang mga inspirasyon, ikinumpara ng mga kritiko ang istilo ng kanyang musika sa kanila.[21] Karaniwang tinuturing ang kanyang mga awitin bilang country pop na may halong rock—katulad ng istilo ni Kelly Clarkson, ayon sa Rolling Stone.[22] Nagsulat din siya ng mga kantang may impluwensiyang Kristiyano.[23][24]

Diskograpiya

[baguhin | baguhin ang wikitext]
  • Some Hearts (2005)
  • Carnival Ride (2007)
  • Play On (2009)
  • Blown Away (2012)
  • Storyteller (2015)
  • Cry Pretty (2018)
  • My Gift (2020)
  • My Savior (2021)
  • Denim & Rhinestones (2022)

Mga sanggunian

[baguhin | baguhin ang wikitext]
  1. ↑ "Carrie Underwood" (sa wikang Ingles). Canadian Country Music Hall of Fame. Inarkibo mula sa orihinal noong . Nakuha noong Nobyembre 5, 2020.
  2. ↑ "Carrie Underwood Biography" (sa wikang Ingles). Biography Channel. Abril 4, 2022.
  3. ↑ "Carrie Underwood Builds An Uncertain Future On Classic Past". Billboard (sa wikang Ingles). Agosto 7, 2013.
  4. ↑ "Concert Review: Carrie Underwood's huge voice star of Jacksonville show". The Times Union (sa wikang Ingles). Abril 20, 2013. Inarkibo mula sa orihinal noong Hulyo 17, 2014. Nakuha noong Hunyo 7, 2014.
  5. ↑ Carrie Underwood Builds An Uncertain Future On Classic Past. Billboard (Setyembre 23, 2012). Nakuha noong Hulyo 27, 2014. (sa Ingles)
  6. ↑ Underwood, Travis, Pickler Walk Red Carpet at ACM Honors Event. Country Standard Time. Nakuha noong Hulyo 27, 2014. (sa Ingles)
  7. ↑ "Carrie Underwood still stands strong with Blown Away" (sa wikang Ingles). The Las Lomas Page. Hunyo 1, 2012. Inarkibo mula sa orihinal noong Hulyo 14, 2014.
  8. ↑ Carrie Underwood's 'How Great Thou Art' Moves The Masses – Our Country Naka-arkibo 2011-05-01 sa Wayback Machine.. Yahoo Music (Abril 25, 2011); nakuha noong Agosto 22, 2011.
  9. ↑ "Flashback: Carrie Underwood Channels Axl Rose at CMA Music Fest". Rolling Stone (sa wikang Ingles). Hunyo 1, 2014.
  10. ↑ "The 200 Greatest Singers of All Time". Rolling Stone (sa wikang Ingles). 1 Enero 2023. Nakuha noong 24 Marso 2023.
  11. ↑ "Carrie Underwood – The Opry and Musical Influences – Opry.com New Music Spotlight Part 2" (sa wikang Ingles). YouTube. Abril 24, 2012. Inarkibo mula sa orihinal noong 2012-04-29.
  12. ↑ "Carrie Underwood interview: 'I'm influenced by My Chemical Romance'" (sa wikang Ingles). Digital Spy. Abril 26, 2012.
  13. 1 2 3 "Guns N' Roses joined by Carrie Underwood at London concert". Blabbermouth (sa wikang Ingles). Nakuha noong Hulyo 2, 2022.
  14. ↑ Carter, Emily (Agosto 2, 2024). "Papa Roach and Carrie Underwood share new duet to raise money for suicide prevention and mental health awareness". Kerrang! (sa wikang Ingles). Nakuha noong Hunyo 10, 2025.
  15. ↑ Schaffner, Lauryn (Marso 11, 2025). "Carrie Underwood Sings Korn + Drowning Pool Classics With 'American Idol' Contestant". Loudwire (sa wikang Ingles). Nakuha noong Hunyo 10, 2025.
  16. ↑ Singh, Surej (Marso 13, 2025). "Watch Carrie Underwood sing Korn and Drowning Pool hits with an 'American Idol' contestant". NME (sa wikang Ingles). Nakuha noong Hunyo 10, 2025.
  17. ↑ Aniftos, Rania (Marso 12, 2025). "Carrie Underwood Is Exposed as a Major Nu-Metal Fan on 'American Idol'". Billboard (sa wikang Ingles). Nakuha noong Hunyo 10, 2025.
  18. ↑ "60 For 60 – Carrie Underwood on George Strait" (sa wikang Ingles). YouTube. Abril 26, 2013. Inarkibo mula sa orihinal noong 2021-12-12.
  19. ↑ "Carrie Underwood & Dolly Parton – "I Will Always Love You"" (sa wikang Ingles). YouTube. Disyembre 8, 2009. Inarkibo mula sa orihinal noong 2021-12-12.
  20. ↑ "Randy Travis Talks Don Henley Collab, Marvels at Carrie Underwood's Voice". Billboard (sa wikang Ingles). Mayo 22, 2012.
  21. ↑ "Blown Away – Carrie Underwood". AllMusic (sa wikang Ingles). May 11, 2012. Nakuha noong Mayo 11, 2012.
  22. ↑ "Carrie Underwood biography". Rolling Stone (sa wikang Ingles). Inarkibo mula sa orihinal noong Pebrero 19, 2017. Nakuha noong Agosto 25, 2017.
  23. ↑ Dunkerlley, Beville (Setyembre 29, 2014). "Hear Carrie Underwood's spiritual new single 'Something In The Water'". Rolling Stone (sa wikang Ingles).
  24. ↑ "Carrie Underwood On 'My Savior,' Legacy Music". Grammy.com (sa wikang Ingles). 2021-04-02. Nakuha noong 2021-04-03.
Nagmula sa "https://tl.wikipedia.org/w/index.php?title=Carrie_Underwood&oldid=2180519#Diskograpiya"