Pumunta sa nilalaman

Hello, Love, Goodbye

Mula sa Wikipedia, ang malayang ensiklopedya
Hello, Love, Goodbye
Theatrical release poster
DirektorCathy Garcia-Molina
Prinodyus
  • Carlo L. Katigbak
  • Olivia M. Lamasan
Iskrip
  • Carmi G. Raymundo
  • Rona Co
  • Crystal S. San Miguel
  • Cathy Garcia-Molina
Itinatampok sina
MusikaJessie Q. Lasaten
SinematograpiyaNoel Teehankee
In-edit niMarya Ignacio
Produksiyon
ABS-CBN Film Productions
TagapamahagiStar Cinema
Inilabas noong
  • 31 Hulyo 2019 (2019-07-31)
Haba
117 minuto
BansaPilipinas
WikaFilipino
Kita₱880.6 milyon ($17.4 milyon) (buong mundo)

Ang Hello, Love, Goodbye ay isang pelikulang Pilipino na nasa uring romantikong drama na unang nailabas noong 2019 na prinodyus at ipinamahagi ng Star Cinema. Idinirekta ito ni Cathy Garcia-Molina at iprinodyus nina Carlo L. Katigbak at Olivia M. Lamasan. Pinagbibidahan ito nina Kathryn Bernardo at Alden Richards, at kinatatampukan ng ilang tauhan kabilang sina Kakai Bautista, Lito Pimentel, Joross Gamboa, Maymay Entrata, Lovely Abella at Jameson Blake. Sinusundan ng pelikula ang isang migranteng manggagawang Pilipina at isang bartender, habang sinusubukan nilang ipagkasundo ang kanilang mga personal na karera at pagmamahal sa isa't isa sa Hong Kong.

Sa kabuuang kita na ₱880 milyon, Hello, Love, Goodbye ang naging pelikulang Pilipino na may pinakamalaking kinita sa buong kasaysayan, hanggang dinaig ito ng Rewind noong Enero 2024.[1][2][3] Nanalo ito ng ilang mga parangal, kabilang dito ang mga parangal sa Box Office Entertainment at PMPC Star. Unang tinanghal ang pelikula noong Hulyo 31, 2019 sa Pilipinas, at unang pinalabas sa mga ibang bansa noong Agosto 1, 2019.

Banghay

[baguhin | baguhin ang wikitext]

Si Joy ay isang Pilipinang kasambahay sa Hong Kong sa kabila ng pagkakaroon niya ng digri sa narsing. Layunin niyang makapag-ipon ng sapat na salapi upang makahanap ng mas maayos na trabaho sa Canada at madala roon ang kanyang pamilya mula sa Pilipinas. Upang makamit ito, tumatanggap siya ng mga sideline kahit labag ito sa kanyang permit sa trabaho. Samantala, iginigiit ng kanyang ama na si Celso na dapat lumipat ang kanilang pamilya sa Hong Kong upang muling magsama-sama at makasama ang kanyang asawang si Lita, na ngayo’y kasal kay Wayne, isang Hongkonger na inaabuso siya.

Habang iligal na nagtatrabaho bilang tagahikayat ng kostumer sa isang bar sa Lan Kwai Fong,[4] napukaw ni Joy ang atensyon ni Ethan, isang Pilipinong bartender, na agad niyang tinanggihan. Nang magsagawa ng biglaang inspeksyon ang mga pulis sa mga dayuhang manggagawa, dali-daling hinalikan ni Joy si Ethan upang ilihis ang kanilang atensyon.

Sa simula’y tinutulan ni Joy ang mga panliligaw ni Ethan, ngunit matapos niyang maranasan ang ilang pagsubok, kabilang ang isang hindi komportableng pagbisita kay Lita, ang pagsita ng kanyang amo, at ang muling pagkikita nila ng kanyang dating nobyo na si JM kasama ang asawa nito, pumayag siyang makipagtagpo kay Ethan sa isang motel. Subalit bago pa man ito magsimula, bigla siyang lumabas at napaiyak. Sumunod si Ethan at doon niya naibulalas ang kanyang mga hinaing sa buhay, samantalang inamin naman ni Ethan na siya’y babaero at walang malinaw na direksyon sa buhay. Mula rito ay nagkaroon sila ng kasunduan na samahan at damayan ang isa’t isa sa loob ng natitirang apat na buwan bago lumipat si Joy sa Canada.

Tinulungan ni Ethan si Joy na makapasok bilang tagahugas ng pinggan sa bar. Isang gabi, nagwala sa kalasingan ang nakababatang kapatid ni Ethan na si Edward at inakusahan siya ng pagpapabaya sa kanilang pamilya. Ilang araw na nawala si Ethan at natunton siya ni Joy sa bahay ng kanyang amang si Mario sa Cheung Chau. Doon, ibinahagi ni Ethan ang kanyang nakaraan: naging residente ng Hong Kong ang kanyang pamilya at doon nanirahan, ngunit nagkalayo sila nang sundan niya sa Estados Unidos ang dati niyang nobyang si Tanya. Matapos silang maghiwalay, siya ay na-deport dahil sa labis na pananatili. Naiwan si Edward upang alagaan ang kanilang amang may sakit, dahilan upang magkimkim ito ng sama ng loob kay Ethan.

Nagbalik sina Joy at Ethan sa Hong Kong Island. Nagtamo si Joy ng ikalawang gantimpala sa isang patimpalak ng kagandahan ngunit nagselos nang muling makita ni Ethan si Tanya, na isa sa mga hurado. Gayunpaman, tiniyak ni Ethan ang kanyang damdamin kay Joy at naging opisyal ang kanilang relasyon.

Ibinunyag ni Ethan ang kanyang plano na magtayo ng sariling bar upang makabawi sa kanyang pamilya at hikayatin si Joy na manatili sa Hong Kong. Samantala, nakumpirma na ang pag-alis ni Joy patungong Canada. Hinarap niya si Lita, na muling sinaktan ni Wayne. Inamin ni Lita na wala na siyang pagmamahal kay Celso at napilitan lamang siyang pumasok sa isang huwad na kasal upang makakuha ng permanenteng paninirahan at madala ang pamilya sa Hong Kong. Nang marinig ito ni Celso, tuluyan niyang isinuko ang pag-asang muling mabuo ang pamilya, na nagdulot ng kaguluhan sa mga plano ni Joy.

Hiniling ni Ethan kay Joy na magpanggap bilang mamumuhunan sa kanyang bar, isang hakbang na mangangahulugang hindi na siya tutuloy sa Canada. Nauwi ito sa pagtatalo kung saan inamin ni Ethan na nais niyang makasama si Joy sa hinaharap, samantalang nanindigan naman si Joy sa kanyang pag-alis. Sa huli, nagparaya si Ethan matapos ipaalala ni Joy ang kanilang napagkasunduan at punahin ang kanyang pagiging makasarili.

Kalaunan, nakipagkasundo muli si Ethan sa kanyang pamilya at hinikayat si Joy na gugulin ang kanyang mga huling araw sa Hong Kong bilang mga turista. Sa kanilang pag-amin ng pag-ibig sa isa’t isa, nangako si Ethan na muli silang magkikita, habang nangako naman si Joy na bibisita sa kanyang bar sa hinaharap. Nagtatapos ang kuwento kay Joy sa paliparan, patungo sa Canada.

Mga Tauhan

[baguhin | baguhin ang wikitext]
Kathryn Bernardo bilang Joy
Alden Richards bilang Ethan
Pangunahing Tauhan
  • Kathryn Bernardo bilang Joy Marie Fabregas:
    Isang nagtapos ng narsing na nagtatrabaho bilang kasambahay sa Hong Kong.[5]
  • Alden Richards bilang Ethan Del Rosario:
    Isang bartender na nagsisikap makamit ang Hong Kong residency at may mas maayos na kalagayang pinansyal kumpara kay Joy.[5]
Mga Pangalawang Tauhan
  • Kakai Bautista bilang Sally Daraga:
    Kaibigan ni Joy at kapwa kasambahay.
  • Lito Pimentel bilang Mario Del Rosario:
    Ama ni Ethan
  • Joross Gamboa bilang Jhim Gabriel:
    Kaibigan ni Ethan at kapwa bartender.
  • Maymay Entrata bilang Mary Dale Fabregas:
    Pinsan ni Joy na baguhan bilang kasambahay sa Hong Kong
  • Lovely Abella bilang Gina Mariquit
    Kaibigan ni Joy at kapwa kasambahay.
  • Jameson Blake bilang Edward Del Rosario:
    Nakababatang kapatid ni Ethan
  • Jeffrey Tam bilang Carlo Nicolas
    Kaibigan ni Ethan at tagapamahala sa bar.
Espesyal na Paglahok
  • William Lorenzo bilang Celso Fabregas:
    Ama nina Joy, Joey, at Liezel, at dating asawa ni Lita
  • Anthony Jennings bilang Eric Del Rosario:
    Pinakabatang kapatid ni Ethan
  • Wilbert Ross bilang Joey Fabregas:
    Nakababatang kapatid ni Joy
  • Aliyah Billote bilang Liezel Fabregas:
    Pinakabatang kapatid ni Joy
  • Angela Poliquit bilang Annie Chung:
    Anak ni Lin
  • Jon Go bilang Wayne Choi: Ikalawang asawa ni Lita na kanyang pinakasalan upang makamit ang paninirahan sa Hong Kong
  • Poon Po Lun Lilac bilang Lin Chung:
    Amo ni Joy at ina ni Annie
  • Pang Mei Sheung bilang PoPo (Gng. Chung)
  • Maricel Laxa bilang Lita: Ina nina Joy, Joey at Liezel; dating asawa ni Celso
  • Maxine Medina bilang Tanya Alezar: Dating nobya ni Ethan
  • Jerome Ponce bilang JM: Dating nobyo ni Joy

Produksyon

[baguhin | baguhin ang wikitext]

Pinagbibidahan ng pelikula sina Kathryn Bernardo at Alden Richards. Kapwa sila kaanib sa dalawang pangunahing magkaribal na network sa Pilipinas: si Bernardo sa ABS-CBN at si Richards sa GMA Network. Nabibilang din ang dalawa sa magkaibang "love team": si Bernardo kasama si Daniel Padilla sa KathNiel at si Richards naman kasama si Maine Mendoza sa AlDub. Sama-sama nilang ginampanan ang papel ng dalawang Overseas Filipino Workers (OFWs) sa Hong Kong na nahulog ang loob sa isa’t isa.[6]

Ayon kay direktor Cathy Garcia-Molina, ang dalawang pangunahing artista ay hindi binigyan ng “baby” o espesyal na pagtrato sa proyekto ng pelikula.[7] Orihinal na nakatakdang lumahok si Benjie Paras sa pelikula bilang ama ng karakter ni Bernardo, ngunit umatras dahil sa hindi pagtutugma ng iskedyul.[8]

Nagsimula ang pagkuha ng mga eksena para sa Hello, Love, Goodbye sa Hong Kong noong Abril 2019,[9] kasabay ng unang yugto ng 2019–20 Hong Kong protests, at natapos makalipas ang isang buwan.[10] Natapos ang Principal photography ng pelikula noong Mayo 19, 2019 sa Parañaque.[11]

Isinagawa ang post-production ng Hello, Love, Goodbye sa Bangkok, Thailand, kung saan nakipagtulungan ang ABS-CBN Film Productions sa Thai production firm na Kantana Group. Ito ang unang kolaborasyon ng dalawang kumpanya.[12]

Pagpapalabas

[baguhin | baguhin ang wikitext]

Ipinalabas sa Pilipinas ang Hello, Love, Goodbye noong Hulyo 31, 2019.[13]

Gumawa rin ng kasaysayan ang pelikula sa Saudi Arabia bilang kauna-unahang pelikulang Pilipino na ipinalabas sa mga sinehan sa Jeddah.[14]

Mga sanggunian

[baguhin | baguhin ang wikitext]
  1. ↑ Rappler.com (Agosto 24, 2019). "'Hello, Love, Goodbye' makes over P800 million worldwide" ['Hello, Love, Goodbye', kumita ng higit sa P800 milyon sa buong mundo]. Rappler (sa wikang Ingles). Nakuha noong Agosto 28, 2019.
  2. ↑ Hallare, Katrina (Setyembre 3, 2019). "'Hello, Love, Goodbye' is highest-grossing PH film" ['Hello, Love, Goodbye', ang pelikulang PH na may pinakamalaking kinita]. entertainment.inquirer.net (sa wikang Ingles). Nakuha noong Setyembre 4, 2019.
  3. ↑ "'Hello, Love, Goodbye' Sets Record at Philippines Box Office" ['Hello, Love, Goodbye', Nagtala ng Rekord sa Takilya ng Pilipinas]. www.hollywoodreporter.com (sa wikang Ingles). Setyembre 10, 2019. Nakuha noong Setyembre 10, 2019.
  4. ↑ Severo, Jan Milo (February 23, 2023). "In photos: 'Hello Love Goodbye' shooting locations; Hong Kong mulls creating 'Hello Love Goodbye' tour". The Philippine Star. Manila. Inarkibo mula sa orihinal noong May 23, 2023. Nakuha noong November 24, 2024.
  5. 1 2 Barrientos, Giselle (August 2, 2019). "In 'Hello, Love, Goodbye,' an OFW gets a chance to choose herself". Scout Magazine. Inarkibo mula sa orihinal noong Enero 8, 2021. Nakuha noong September 8, 2019.
  6. ↑ Belleza, Irish Eden (August 4, 2019). "Kathryn Bernardo and Alden Richards crossover for love". Gulf News. Nakuha noong September 8, 2019.
  7. ↑ "Kathryn Bernardo served co-workers on 'Hello, Love, Goodbye' movie set in HK". The Filipino Times. June 24, 2019. Nakuha noong September 8, 2019.
  8. ↑ Asis, Salve (May 22, 2019). "Benjie, pinakawalan ang movie nina Kathryn at Alden". Philstar.com. Nakuha noong 2026-04-16.
  9. ↑ Salonga, Rita (April 9, 2019). "Kathryn, Alden start shooting in Hong Kong". DZRH News. Nakuha noong September 8, 2019.
  10. ↑ Aguilar, Krissy (July 10, 2019). "'Hello, Love, Goodbye' shoot a 'big adjustment' for Kathryn, Daniel". Philippine Daily Inquirer. Nakuha noong September 8, 2019.
  11. ↑ "Kathryn Bernardo-Alden Richards movie, kakatapos lang ng principal photography" [Principal photography for Kathryn Bernardo-Alden Richards movie just finishd]. PEP.ph. Philippine Entertainment Portal, Inc. May 19, 2019. Nakuha noong September 8, 2019.
  12. ↑ Anarcon, James Patrick (June 22, 2019). "Hello Love Goodbye director on Kathryn Bernardo: "Medyo inalila talaga namin siya sa Hong Kong."" [Hello Love Goodbye director on Kathryn Bernardo: "We maltreated her a bit in Hong Kong"]. PEP.ph. Philippine Entertainment Portal, Inc. Nakuha noong September 8, 2019.
  13. ↑ Shi, Stephanie (July 7, 2019). "The International Posters For Kathryn Bernardo + Alden Richards' Film 'Hello, Love, Goodbye' Will Make You Kilig". Cosmopolitan. Nakuha noong September 8, 2019.
  14. ↑ "'Hello, Love, Goodbye' is first PH film to be shown in Jeddah, Saudi Arabia". ABS-CBN News. Nakuha noong August 14, 2019.
Nagmula sa "https://tl.wikipedia.org/w/index.php?title=Hello,_Love,_Goodbye&oldid=2206687"