Katinig sa pagitan ng ngipin

Sa ponetika, katínig sa pagítan ng ngípin o interdentál ang mga katinig sa harapan na nabubuo gamit ang dulo ng dila sa pagitan ng itaas at ibabang ngipin. Iba ito sa mga katinig sa ngipin, na nabubuo naman gamit ang dila sa likod ng itaas na ngipin. Walang mga wika sa mundo ang alam na nagtatangi sa mga katinig sa ngipin at pagitan ng ngipin. Sinusulat ito sa Internasyonal Ponetikong Alpabeto gamit ang pagsasama ng nakaangat at nakababang tuldik na tulay, kagaya halimbawa ng ⟨d̪͆⟩, bagamat sinusulat din ito sa ibang paraan tulad bilang nakaabanteng katinig sa ngipin (hal. ⟨d̪̟⟩) o gilagid (hal. ⟨d̟⟩).

Wika

Walang wika sa mundo ang nagtatangi sa mga katinig sa ngipin sa mga katinig sa pagitan ng ngipin. Pinakamalapit na pagkakataon ang pagbanggit sa mga katinig sa ngipin sa paraang kagaya ng sa katinig sa pagitan ng ngipin. Halimbawa, maririnig ito sa ilang mga dayalekto ng wikang Italyano at maging sa Ingles, bagamat di tiyak kung gaano ito kadalas mangyari sa mga katutubong mananalita. Sa ilang mga wikang Pilipino, makikita ang mga katinig na palapit sa pagitan ng ngipin [ð̞] tulad halimbawa sa ilang mga dayalekto ng wikang Kagayanen, Mandaya, Kalagan, Bikolano ng Katimugang Catanduanes, at Kalinga. Makikita rin ito sa mga wikang Bauchi sa Nigeria.

May katinig sa pagitan ng ngipin ang ilang mga dayalekto ng wikang Amis sa Taiwan, gayundin sa wikang Mapuche ng Timog Amerika. Sa mga wikang katutubo ng Australia, isa ang pagitan ng ngipin sa mga paraan para mabigkas ang mga katinig sa ngipin.