Kaya Kong Abutin Ang Langit

Mula sa Wikipediang Tagalog, ang malayang ensiklopedya
Tumalon sa: nabigasyon, hanapin

Ang Kaya Kong Abutin Ang Langit ay isang pelikula na pinagbidahan noong 1984 ni Maricel Soriano, Gina Alajar at William Martinez. Halos naiiba ang pelikulang ito dahil ang pangunahing tauhan ng kuwento ay isang bida na kontrabida. Ang pelikulang ito ay ang pinagmulan ng isa sa pinakasikat na linya sa pelikulang Pilipino na "Ayoko ng tinatapakan ako. Ayoko ng masikip, ayoko ng walang tubig, ayoko ng mabaho, ayoko ng walang pagkain, ayoko ng putik!"

Buod[baguhin | baguhin ang batayan]

Si Clarissa Rosales ay ipinanganak sa buhay na puno ng kahirapan. Bata pa lamang siya, ay namulat na siya sa kahirapan at nagmamadali siya na takasan ang buhay na ito papunta sa marangyang buhay na naging mailap sa kanya. Habang siya ay lumalaki, siya ay nagiging lubhang malapit sa kanyang mayaman na ninong at ninang na si Ralph at Monina Gardamonte. Ang mayamang mag-asawa ay dating pinapasukan bilang mga katulong ng mga magulang ni Clarissa. Namatay ang ama ni Clarissa nang sinagip niya ang buhay ni Monina mula sa mga magnanakaw. Dahil dito, nagkaroon ng malaking utang na loob ang mga Gardamonte sa pamilya ni Clarissa, kaya naman nagpasya ang mga ito na maging ninong at ninang ng noo'y bagong panganak na si Clarissa. Dahil dito, kahit na mahirap lamang siya, ay natitikman niya ang buhay mayaman at natatakasan niya ang katotohanan ng kanyang kahirapan sa kanilang tahanan. Dahil sa pagiging malapit ni Clarissa sa kanyang ninong at ninang, ay nagseselos na ang unica hija ng mga Gardamonte na si Therese. Sa pananaw naman ng kapatid ni Monina na si Nick, si Clarissa ay isang opurtunista. Hindi napapansin ni Clarissa na nagsisimula nang mapalayo siya sa kanyang sariling ina na si Naty at sa ate niyang si Nancy.

Ginamit ni Clarissa ang kababata niyang si James. Alam niyang may pagtinggin ito sa kanya, kaya pinaasa niya ito. Ginawa niya ito dahil batid niyang nag-aaral na sa kolehiyo si James at nakikita niyang ito ang mag-aahon sa kanya sa hirap, ngunit nang nagkaroon ng problema si James sa kanyang matrikula ay iniwanan siya ni Clarissa. Ang sunod naman na pinuntirya ni Clarissa ay si Daryll, ang lihim na nobyo ni Therese. Nagustuhan niya ito dahil marami itong kilala sa alta sociedad na maaaring maging kakilala niya. Ayaw ni Monina kay Daryll dahil pabagsak na ang pamilya nito at mayroon itong negatibong reputasyon sa lipunan. Ipinagtapat ni Clarissa na nagkikita pa rin ang dalawa at sinugod sila ni Monina at pinaghiwalay, kaya galit na galit si Therese. Labis itong ikinasama ng loob ni Therese hanggang sa magkaroon ito ng malubhang karamdaman sanhi ng kanyang sakit sa puso. Napagdesisyunan ni Monina na dalhin ang anak sa ibang bansa upang doon ipagamot, ngunit ipinagpilitan pa rin ni Clarissa ang pagsama sa kanila. Isang araw, nagkaroon ng pag-aaway si Therese at Clarissa. Dala ng matinding galit ay inatake si Therese at nalaglag sa swimming pool, ngunit imbes na tulungan ay pinanood lang siyang malunod ni Clarissa.

Habang nagluluksa ang mag-asawa ay lalong kinuha ni Clarissa ang loob nila hanggang sa ginusto na nila na ampunin si Clarissa. Kinumbinsi ni Monina si Naty na ampunin si Clarissa upang maging tagapagmana ng kanilang kayamanan dahil raw sa ikabubuti naman ito ni Clarissa. Kahit mabigat sa kaniyang loob ay pumayag na si Naty. Ngayon si Clarissa Rosales ay si Clarisse Gardamonte, heredera ng mga Gardamonte. Lalong nabulag ng kayamanan si Clarissa hanggang umabot na sa sukdulan ang kanyang kasamaan. Inalisan ni Clarissa ng preno ang kotse ng kanyang ninong at ninang habang nagbabakasyon ito sa Baguio at pinagmukha itong isang aksidente. Biglang napasakanya lahat ng ari-arian ng mga Gardamonte. Hindi nag-aksaya ng panahon si Clarissa. Minanipula niya ang stocks ni Nick upang mula sa pagiging board member ay maging karaniwang empleyado na niya lamang ito upang patakbuhin ang kanyang mga negosyo. Ginamit rin niya agad si Daryll upang makakilala ng mga maiiimpluwensiyang tao sa lipunan.

Samantala, nagkakamabutihan si Nancy at si James. Dati pang may gusto si Nancy kay James ngunit dahil umiikot ang mundo ni James kay Clarissa ay hindi siya nito napapansin. Ngunit nang lumabas na ang tunay na ugali ni Clarissa at iniwan siya nito, lalong napalapit si James kay Nancy, hanggang mag-desisyon ang dalawa na magpakasal. Tuluyan na rin na tinalikuran ni Clarissa ang kanyang pamilya. Nagkasakit ang kanyang ina na lalong lumubha dahil sa pangungulila sa kanya. Namatay ang ina ni Clarissa na hinahanap-hanap siya.

Dahil sa mapagmataas na ugali ni Clarissa ay nag-umpisa na siyang talikuran ng mga trabahador sa kanyang kompanya, dahilan ito upang unti-unting malugi ang kanyang mga negosyo. Nagdesisyon siya na sagutin at pakasalan ang mang-liligaw niya na si Jerome Recto, anak ng may-ari ng isang bangko. Kahit nagtapat sa kanya ng pag-ibig si Daryll, ay hindi niya ito pinansin. Walang pera si Daryll tulad ng kay Jerome kaya hindi kayang ibigin si Daryll. Tinakot ni Daryll si Clarissa na magpapakamatay ito kung hindi siya nito iibigin ngunit imbes na pigilan ay lalo pa niya itong inupatan, kaya tinuloy ni Daryll ang pagpapatiwakal.

Sa araw ng kanilang kasal ay hindi dumating si Jerome. Pinasiyasat pala niya si Clarissa at nalaman nito ang tunay na intensiyon ni Clarissa sa pagpapakasal sa kanya. Naging katatawanan ng alta sociedad si Clarissa. Kasabay nito ang pagbulusok ng kanyang negosyo at pagsdami ng kanyang mga utang. Minanipula din ni Nick ang stocks ni Clarissa upang mapasakanya muli at maisalba ang kompanya ng kapatid niyang si Monina.

Nawala kay Clarissa lahat ng kanyang kayamanan. Doon niya biglang naalala ang mga kaibigan sa alta sociedad upang hingan ng tulong ngunit tinalikuran siya ng mga taong kanyang inaakalang kaibigan sa lipunang dati niyang kinabibilangan. Nagtungo siya sa kanyang kapatid, ngunit ipinamukha nito sa kanya ang poot na kinikimkim nito sa napakahabang panahon. Madilim ang buhay ni Clarissa. Hinangad niya ang lahat lahat ngunit sa kalaunan ay walang natira sa kanya. Doon niya napagtanto na hindi sa dami ng kayamanan nasusukat ang kaligayahan sa buhay. Naubos na ang lahat ng kanyang pag-asa at nagdesisyon na tumalon sa tulay papunta sa madilim na ilog sa ibaba.