Pumunta sa nilalaman

Abi Marquez

Mula sa Wikipedia, ang malayang ensiklopedya
(Idinirekta mula sa Marquez, Abi)
Abi Marquez
Pagtanggap ni Abi Marquez sa parangal sa IFEX 2024
Kapanganakan
Abigail Marquez

(2000-06-16) 16 Hunyo 2000 (edad 25)
Santa Rosa, Laguna, Pilipinas[1]
Ibang pangalanLumpia Queen
Trabaho
Aktibong taon2022–kasalukuyan
Impormasyon sa YouTube
Websaytabimarquez.com
TsanelAbi Marquez
Aktibong taon2012–kasalukuyan
Kaurian
Tagasubaybay1.77 milyon
Kabuuang pagtingin547 milyon
Parangal sa Tagagawa
100,000 tagasubaybay2023
1,000,000 tagasubaybay2024
Huling binago: Pebrero 12, 2024
Impormasyon sa TikTok
Pahina
Tagasunod4.3 milyon
Mga gusto113.8 milyon
Huling binago: Pebrero 12, 2024

Si Abi Marquez (ipinanganak bilang Abigail Marquez noong Hunyo 16, 2000), na kilala sa bansag na Lumpia Queen, ay isang Pilipinang tagagawa ng mga nilalaman (o content creator o vlogger) at kilalang punong-tagapagluto (o celebrity chef). Kilala siya sa paggawa ng mga bidyo ng sa pagluluto sa TikTok at YouTube.[2][3] Isa rin siyang musikero at naging isang bokalista ng isang banda.

Ginawaran si Abi ng iba't ibang parangal tulad ng People's Voice Award (Parangal ng Boses ng Bayan) sa ika-28 Taunang Webby Awards na ginanap sa Lungsod ng New York,[4][5] Foodie Creator (Tagagawa ng Bidyong Pampagkain) ng Taon noong Parangal ng Tiktok ng 2023,[6] parangal na Bronse para sa Pinakamahusay na Kampanya ng isang Mega Influencer (Malaking Tagapag-impluwensiya) sa Hashtag Asia Awards ng 2024, at parangal na Pilak sa ika-19 na Taunang w3 Awards. Napasama din siya sa listahan ng Forbes na Forbes 30 under 30.[7]

Noong Pebrero 2025, mayroon nang higit sa 1.7 milyong tagasubaybay siya sa YouTube at 4.3 milyong tagasunod sa TikTok. Sa kanyang karera bilang vlogger, nakipag-collab na siya sa iba't ibang mga vlogger tulad nina Ninong Ry, Uncle Roger, Doobydobap at Jujumao. Lumabas din siya sa tsanel ni Erwan Heusaff sa YouTube na Featr. Naka-collab din niya ang mga internasyunal na punong-tagapagluto (o chef) tulad nina Andre Rush, Alessandra Ciuffo, Kevin Lee at Gordon Ramsey.

Talambuhay

[baguhin | baguhin ang wikitext]

Kabataan

[baguhin | baguhin ang wikitext]

Ipinanganak si Abigail Marquez noong Hunyo 16, 2000 sa Santa Rosa, Laguna at doon rin siya lumaki kasama ang kanyang mga magulang na negosyante. Mayroon negosyo na pagbebenta ng mga materyales sa konstruksyon ang kanyang ama.

Nagsimula ang interes ni Abi sa pagluluto noong apat na taon gulang pa lamang siya kung saan nagluto siya ng pritong manok (na siyang paborito niyang lutuin) dahil ayaw niyang abalahin ang kanyang inang abala sa kanyang kompanya.[8] Tinuruan niya ang sarili na magluto sa panonood ng pagluluto ng kanyang ina.[9]

Nag-elementarya at nag-hayskul siya sa Santa Rosa, Laguna, ang kanyang bayang sinilangan, kung saan noong nasa elementarya siya, nagbenta siya ng mga cookies na kanyang hinuhurno (o bini-bake) at pasta naman ang binenta niya noong hayskul siya. Natutunan niya ang paghuhurno noong nasa ikalimang baitang siya sa elementarya, at natapos siya ng elementarya bilang balediktoryan.[10] Nagdadala din siya ng meryenda sa kanyang mga kalaro noong bata pa siya.

Bukod sa pag-oobserba sa kanyang ina na magluluto, tumitingin din siya ng mga resipi online para magkaroon siya ng ideya sa kanyang lulutuin. Namana naman daw niya ang kanyang kasanayan sa pagbebenta sa kanyang negosyanteng ama, subalit kanyang iginiit na ang kanyang motibasyon sa pagbebenta ng pagkain ay ang kanyang kaalaban (o passion) sa pagluluto sa halip na kumita ng salapi.[1]

Noong nasa kolehiyo naman siya, sa Unibersidad ng Pilipinas Diliman, nagbenta naman siya ng mga crinkle. Sa pamantasan na iyon, natapos niya noong 2022 ang digring batsilyer sa Hotel, Restaurant and Institution Management (HRIM, o Pamamahala ng Otel, Restawran at Institusyon) na may onor na magna cum laude.[1]

Bukod sa pagluluto, isang mang-aawit at musikero din si Abi. Naging bokalista siya ng isang banda[11] at nagtatanghal sa maraming tao. Tumutugtog din siya ng mga instrumento tulad ng piyano at gitara.[12] Kumuha siya ng mga araling pamboses (o voice lessons) na nagsimula noong hayskul siya at tumagal ng limang taon ang pag-aaral sa boses. Nag-aral din siyang sumayaw at sumali sa mga kompetisyon sa pagsayaw.[13]

Pagsabak sa paggawa ng nilalaman online

[baguhin | baguhin ang wikitext]

Unang sumabak si Abi sa mundo ng paggawa ng nilalamang online noong 2022 nang maglagay siya ng mga bidyo ng mga awiting cover (o pag-awit ng awitin ng ibang mang-aawit) sa TikTok[14] at maging sa YouTube kung saan mayroon siyang tsanel na nangangalang Abi Sings. Gumawa din siya ng mga vlog ng kanyang pang-araw-araw na buhay. Interesado din siya sa paggawa ng mga pelikula o bidyo.

Bumulusok ang kanyang popularidad sa mga platapormang hatirang pangmadla nang naglagay siya ng bidyo sa TikTok tungkol sa pagprito ng marsmalow sa loob ng pambalot ng lumpiya.[15] At dito nagsimula ang kanyang serye ng bidyo tungkol sa pag-e-eksperimento ng mga palamang nilalagay sa loob ng lumpiya. Dahil din sa seryeng ito, binansagan siya ng kanyang mga tagasunod bilang ang "Lumpia Queen" (lit. Reyna ng Lumpiya), bagaman, noong una, hindi niya nagustuhan ang bansag na ito dahil parang isang pangalan ng negosyo ito tulad ng "Lugaw Queen." Sa kalaunan, nagustuhan na rin niya ang bansag dahil mayroon itong recall o madaling matandaan.[1]

Nagsimula ang kanyang paglalagay ng mga bidyo sa mga hatirang pangmadla noong Enero 2022, ang panahon kung saan nasa huling semestre na siya sa kolehiyo at naka-online ang kanyang klase, kaya, marami siyang oras sa paggawa ng bidyo tungkol sa pagkain.[13] At sa panahon din na ito nang nagsumite siya ng aplikasyon para sa pagka-interno (o internship) para sa kumpanya ng pagkain at inumin na halos matanggap siya subalit nagkaroon siya ng mga isyu sa kanyang aplikasyon. Kaya, tinanong na lamang ang kanyang departamento kung puwedeng magsusulat na lamang siya tungkol sa paggawa ng nilalaman imbis na mag-interno.[16]

Bukod sa nag-viral na lumpiyang may marsmalow, naging patok din ang kanyang bidyo tungkol sa lumpiyang peach mango (o lumpiyang milokoton at mangga)[17] na nakukuha siya ng inspirasyon sa peach mango pie ng Jollibee.[11] Nag-viral din ang kanyang bidyo tungkol sa resipi ng pasta na may tuna.[16] Bagaman, noong sinundan niya ito hinalong-pritong koliplor, hindi ito naging viral at napagtanto na walang isang pormula para sa isang bidyong viral.

Noong una, ang paglalagay niya ng bidyo online ay isang pagpapahayag lamang ng kanyang pagiging malikhain, lumago ito at naging karera na niya.[3] Sa kanyang mga bidyo, hinahaluan niya ito ng patawa na krinedito ang kasanayan na ito sa kanyang lolo.[14] Noong 2023, naging bahagi na siya ng ahensiyang pantalento na NYMA, isa mga tatak sa ilalim ng KROMA entertainment.[18]

Pakikipag-collab

[baguhin | baguhin ang wikitext]

Nakipag-collab (o sumama sa isang bidyo) siya sa iba't ibang kilalang personalidad sa internet. Nagsama sa isang bidyo sina Abi at ang komedyanteng Malasyo at kritiko ng pagkain na si Nigel Ng na mas kilala bilang Uncle Roger kung saan binansagan siya bilang Tito Roger na pinalitan ang uncle ng katumbas nito sa Filipino na "tito".[19] Nakipag-collab din siya sa kilala din na vlogger ng pagkain at kilalang punong-tagapagluto na si Ryan Reyes na mas kilala bilang Ninong Ry. Isa sa mga collab nila ang pag-endorso ng isang tatak panimpla.[20]

Nakipag-collab din siya sa ilang mga kilalang internasyunal na tagapaluto (o chef) tulad nina Andre Rush, Alessandra Ciuffo, at Kevin Lee, gayon din, ang mga nakabase sa Estados Unidos na mga vlogger din ng pagkain na sina Albert Niazhvinski ng Albert Can Cook at Ahmad Alzahabi ng The Golden Balance.[21] Nagkaroon din siya ng collab sa taga-Nuweba Selandiya na si Andy Hearnden ng Andy Cooks kung saan nagluto sila ng sinigang at dynamite lumpia (o lumpiyang dinamita, na lumpiyang may sili sa loob).[11] Sa isa pang bidyo collab, nagluto din siya ng sinigang para sa mang-aawit at nagra-rap na si Saweetie (tunay na pangalan: Diamonté Quiava Valentin Harper), na Amerikanong may lahing Pilipino.[1]

Nagkaroon din si Abi ng collab na mga bidyo sa Koreanang si Tina Choi na mas kilala bilang Doobydobap.[1] Bukod kay Ninong Ry, madalas din makipag-collab si Abi sa isa pang Pilipinong tagagawa ng nilalaman na si Jujumao, o Juri Imao sa tunay na buhay, na apo ng Pambansang Alagad ng Sining na si Abdulmari Imao.[22] Nakipatulungan din si Abi kay Erwan Heussaff na binigyan niya ng kredito sa kanyang tagumpay, pagbubuti ng malikhaing kasanayan, at kaalaman sa pagkain sa tulong ng mga kompanya ni Heussaff na Featr at The Fat Kid Inside Studios.[23] Lumabas siya bilang isang bisita sa tsanel ng YouTube ng Featr sa seryeng pagkain at paluluto.[18]

Ang isa sa pangarap ni Abi na collab ay nangyari nang nagluto siya ng beef wellington (isang lutuing Ingles na isteyk na binalot na parang empanada) na binalot sa lumpiya, at pinatikim sa kilalang Briton na punong-tagapaluto na si Gordon Ramsay.[24]

Sa labas ng internet

[baguhin | baguhin ang wikitext]

Sa labas ng internet, lumabas siya sa mga palabas sa telebisyon tulad ng Unang Hirit ng GMA Network noong Oktubre 2023 kung saan kinapanayam siya at ipinamalas ang kanyang kasanayan sa pagluluto kasama ang mga host ng palabas.[11] Lumabas din siya Lutong Bahay, isang palabas sa kapatid na tsanel ng GMA Network na GTV, kung saan kinapanayam din siya at nagluto.[25]

Mga parangal

[baguhin | baguhin ang wikitext]

Dahil sa kanyang angking galing sa pagiging tagagawa ng mga nilalaman sa hatirang pangmadla, nagawaran si Abi ng iba't ibang parangal. Isa na dito ang People's Voice Award (Parangal ng Boses ng Bayan) sa kategoryang Pagkain at Inumin sa ika-28 Taunang Webby Awards na ginanap sa Lungsod ng New York.[4][5] Nagawaran din siya ng Bronse para sa Pinakamahusay na Kampanya ng isang Mega Influencer (Malaking Tagapag-impluwensiya) sa Hashtag Asia Awards ng 2024, at parangal na Pilak sa ika-19 na Taunang w3 Awards.[26] Natanggap naman ni Abi mula sa TikTok ang parangal na Foodie Creator (Tagagawa ng Bidyong Pampagkain) ng Taon noong Parangal ng Tiktok ng 2023.[6][27]

Napasama naman siya sa listahan ng Forbes na Forbes 30 under 30 (30 ng Forbes na nasa edad 30 pababa).[7][28] Gayon din sa Tatler Asia, nailagay din siya sa talaan nila na "Gen. T Leaders of Tomorrow 2024" (Talaang Gen. T na mga Pinuno ng Kinabukasan 2024).[12]

Nanomina naman siya sa James Beard Media Awards sa ilalim ng mga Akawnt sa Hatirang Pangmadla (Social Media Accounts).[29]

Mga sanggunian

[baguhin | baguhin ang wikitext]
  1. 1 2 3 4 5 6 GRANA, RHIA. "This girl now has 2.9M followers on TikTok — and it all started with lumpia". ABS-CBN. Nakuha noong Oktubre 12, 2024.
  2. ↑ Cordero, Kc. "Meet Abi Marquez, Internet's "Lumpia Queen"". PEP.ph (sa Ingles). Nakuha noong Oktubre 12, 2024.
  3. 1 2 Diaz, One Carlo. "Meet the lumpia queen: Filipina food content creator Abi Marquez ready for next chapter of her career". The National (sa Ingles). Nakuha noong 2024-10-12.
  4. 1 2 Sabio, Nikka Avegail. "EXCLUSIVE: Abi Marquez admits having fears over her achievements | ABS-CBN Entertainment". ABS-CBN (sa Ingles). Nakuha noong 2025-02-07.
  5. 1 2 "NEW Webby Gallery + Index". NEW Webby Gallery + Index (sa Ingles). Nakuha noong 2025-02-07.
  6. 1 2 Arnaldo, Steph (2024-06-29). "Rappler Talk Entertainment: Abi Marquez on content creation, Filipino food". RAPPLER (sa Ingles). Nakuha noong 2025-02-07.
  7. 1 2 "Abigail Marquez". Forbes (sa Ingles). Nakuha noong 2025-02-07.
  8. ↑ Cruz, Hazel Jane. "Abi Marquez on why she started food content creation: 'Food has been the center of my universe'". www.gmanetwork.com (sa Ingles). Nakuha noong 2025-02-07.
  9. ↑ Cruz, Hazel Jane. "Random facts about Abi Marquez a.k.a Lumpia Queen". www.gmanetwork.com (sa Ingles). Nakuha noong 2025-02-07.
  10. ↑ Tran, Teresa (2024-10-30). "Abi Marquez is more than just the 'Lumpia Queen'". JoySauce (sa Ingles). Nakuha noong 2025-02-07.
  11. 1 2 3 4 Ramos, Jansen. "Get to know 'Lumpia Queen' Abi Marquez". www.gmanetwork.com (sa Ingles). Nakuha noong 2025-02-07.
  12. 1 2 Inocencio, Syrah Vivien. "Who is Abi Marquez, the content creator showcasing Filipino cuisine to the world?". Tatler Asia (sa Ingles). Nakuha noong 2025-02-07.
  13. 1 2 Bautista, Rafael (2024-04-23). "How Abi Marquez Became The Queen Of TikTok Food Content". nylonmanila.com (sa Ingles). Inarkibo mula sa orihinal noong 2025-02-11. Nakuha noong 2025-02-07.
  14. 1 2 Llemit, Kathleen A. "'Lumpia Queen' Abi Marquez on making Philippines proud; conquering introversion". Philstar.com. Nakuha noong 2025-02-07.
  15. ↑ "Get to Know Abi Marquez aka TikTok's 'Lumpia Queen'". The Beat Manila (sa Ingles). Nakuha noong 2025-02-07.
  16. 1 2 Regalado, Pia (2023-09-28). "Lumpia Queen Abi Marquez Proves That Yes, There's a Career in Food Vlogging". SPOT.PH (sa Ingles). Nakuha noong 2025-02-10.
  17. ↑ "Viral na peach mango lumpia recipe ni Abi Marquez, paano nga ba ginagawa? | Lutong Bahay". www.gmanetwork.com (sa Ingles). Nakuha noong 2025-02-11.
  18. 1 2 "Food content creator and TikTok's 'Lumpia Queen' Abi Marquez joins KROMA Entertainment's NYMA as exclusive talent". UP Alumni Website (sa Ingles). 2023-05-31. Nakuha noong 2025-02-07.
  19. ↑ Tunac, Hermes Joy (2024-07-04). "'Lumpia Queen' Abi Marquez collabs with Uncle Roger for a lumpia cooking video". GMA News Online (sa Ingles). Nakuha noong 2025-02-10.
  20. ↑ Dedicatoria, May. "Got leftover holiday ham? Check out this adobo recipe with a twist by Ninong Ry". Philstar.com (sa Ingles). Nakuha noong 2025-02-10.
  21. ↑ Panoringan, Hanna. "'Lumpia Queen' Abi Marquez Collabs With Global Food Vloggers". Spot.ph. Nakuha noong October 12, 2024.
  22. ↑ Llemit, Kathleen A. "TikTok star Jujumao on competition; collaborations with Filipino, Japanese content creators". Philstar.com. Nakuha noong 2025-02-10.
  23. ↑ Inocencio, Syrah Vivien. "My First: Abi Marquez's secret ingredient to her internet success". Tatler Asia (sa Ingles). Nakuha noong 2025-02-10.
  24. ↑ "Filipino content creator Abi Marquez makes 'Beef Wellington Lumpia' for Gordon Ramsay". ABS-CBN News and Current Affairs. January 20, 2025. Nakuha noong January 24, 2025.
  25. ↑ "Mikee Quintos, Abi Marquez at Kuya Dudut, competitive sa pagbabalot ng lumpia! | Lutong Bahay". www.gmanetwork.com (sa Ingles). Nakuha noong 2025-02-11.
  26. ↑ "'Lumpia Queen' Abi Marquez bags silver at 19th Annual w3 Awards". GMA News Online (sa Ingles). 2024-10-11. Nakuha noong 2025-02-11.
  27. ↑ "TikTok honors Abi Marquez as Foodie Creator of the Year – adobo Magazine". adobo Magazine Online (sa Ingles). 2023-10-26. Nakuha noong 2024-10-12.
  28. ↑ Wibisono, Ardian. "30 Under 30 Asia: Meet The Creators And Artists Generating Inspiring And Educational Content". Forbes (sa Ingles). Nakuha noong 2024-10-12.
  29. ↑ Cruz, Hazel Jane. "Is Abi Marquez collaborating with BuzzFeed's 'Tasty' producer Rie McClenny?". www.gmanetwork.com (sa Ingles). Nakuha noong 2025-02-11.
Nagmula sa "https://tl.wikipedia.org/w/index.php?title=Abi_Marquez&oldid=2190713"