Trambiya

Trambiya sa lungsod ng Maynila noong dekada 1900

Isang makabagong trambiya sa lungsod ng Riga, Latbiya

Ang trambiya (tranvía sa Kastila) ay isang sasakyang panriles na - sa bahagi man o buong ruta nito - gumagamit ng riles na nasa gitna ng daan. Ang mga trambiya ay nilikha para magdala ng mga pasahero, hindi kalakal. Ang mga sinaunang trambiya ay hinihila ng kabayo; sa mga sumunod na panahon ang mga ito ay pinatatakbo sa pamamagitan ng singaw, kable, kuryente at ng gasolina.

Sa Maynila, ang mga trambiya na laganap noong simula ng ika-20 siglo ay napalitan na ngayon ng mga dyipni, bus at ng makabagong sistema ng magaan na riles (hindi tunay na trambiya dahil hiwalay sa daan ang mga riles nito).