Novorossiya (kumpederasyon)

Iminungkahing watawat ng Novorossiya.

Ang Novorossiya o Bagong Rusya, kilala rin bilang Unyon ng mga Republikang Bayan, ay isang panukalang kumpederasyon sa pagitan ng mga maka-Rusong naghihiwalay na rehiyon ng Donetsk at Lugansk sa Silangang Ukranya.

Lumitaw ang konsepto nito sa pampublikong diskurso kasabay ng pagsiklab ng digmaan sa Dombas. Tumukoy ito sa makasaysayang teritoryo ng Novorossiya ng Imperyong Ruso na inagaw mula sa mga tribong Kosako at Otomano kung saan inanyayahan ang mga mamamayang Ruso na manahan dito. Isinulong ito sa Rusya bilang isang bagong pagkakakilanlan sa mga sinakop nitong bahagi ng Ukranya.

Idinaos ang kongreso sa paglikha nito noong 22 Mayo 2014, ngunit ipinagliban din ng mga tagapagtatag nito noong 1 Enero 2015. Noong Mayo ng parehong taon, inanunsyo ang pagpapatigil o "pagyelo" sa proyekto.

Makasaysayang Balangkas

Bahagi ng populasyon sa mga rehiyon ng Ukranya na itinuring ang wikang Ukranyo bilang kanilang katutubong wika, batay sa mga senso ng 1959, 1970, 1979, 1989, at 2001.

Sa katapusan ng ika-18 dantaon, nagbigay-daan ang tagumpay laban sa Kanato ng Crimea sa paninirahan ng mga Eslabo sa timog-silangang bahagi ng Ukranya. Noong ikalawang hati ng ika-19 na siglo, humikayat ang industriyalisasyon sa Dombas ng malaking bilang ng mga manggagawa. Ayon sa pananaw ng kasaysayang Ruso, ang bagong tinirahang teritoryong ito mula Odessa hanggang Donetsk ay tinawag na "Bagong Russia" (Novorossiya), samantalang iginiit naman ng Ukranya na ang nakararaming lumipat dito ay mga etnikong Ukranyo.

Noong panahong Sobyetiko, tumindi ang Rusipikasyon sa timog at silangang bahagi ng SSR ng Ukranya, na pinabilis dahil sa kalapitan nito sa SPSR ng Rusya, mataas na antas ng urbanisasyon, at patuloy na pagdagsa ng mga imigranteng Ruso. Pagdating ng pagbagsak ng USSR, halos wala nang natirang mga paaralan sa malalaking lungsod ng timog at silangang rehiyon na nagtuturo gamit ang wikang Ukranyo. Noong dekada '90 at 2000, sa kabila ng unti-unting Ukranisasyon sa sektor ng edukasyon, nanatiling nangingibabaw ang wikang Ruso sa midya, pelikula, at paglalathala ng mga aklat sa lugar.