Salitang hiram

Ang tofu ay salitang Ingles na hiniram mula sa salitang Hapon na tōfu, na siya namang hiniram mula sa salitang Tsino na dòufu.

Ang salitang-hiram (Ingles: loanword) ay salita na kinuha mula sa isang wika (wikang pinaghiraman) at ginamit sa ibang wika (wikang tumanggap o wikang pinaglipatan) sa pamamagitan ng proseso ng panghihiram. Maaaring bahagyang baguhin ang anyo o tunog ng salita upang bumagay sa wikang tumanggap. Ang panghihiram ay isang matalinghagang tawag na matagal nang ginagamit sa lingguwistika kahit na kinikilala ang kakulangan nito sa paglalarawan: wala namang tunay na kinukuha mula sa wikang pinaghiraman at wala ring inaasahang isasauli (halimbawa, ang salitang-hiram).

Ang salitang-hiram ay naiiba sa salitang salin-buo (calque), na hinango mula sa ibang wika sa pamamagitan ng tuwirang pagsasalin ng kahulugan, sa halip na gayahin ang anyo o tunog ng salita. Iba rin ito sa mga kognat (cognate o magkaugnay na salita), na makikita sa dalawa o higit pang magkaugnay na wika at nagkakahawig dahil pareho silang nagmula sa isang matandang wika—hindi dahil hiniram ng isa ang salita ng isa pa.