Sharbat Gula

Sharbat Gula ( Pashto: شربت ګله; ipinanganak c. 1972 ) Ay isang babaeng Agpano na kinilala sa buong mundo bilang paksa sa Afghan Girl, isang larawan noong 1984 na kinunan ng isang Amerikanong peryodista at potograpo na si Steve McCurry na kalaunan ay inilathala bilang litrato sa pabalat para sa Hunyo 1985 na isyu ng Magasing National Geographic. Ang larawan ay kinunan sa Nasir Bagh, Pakistan, habang si Gula ay naninirahan doon bilang isang Afghan refugee na tumakas sa digmaang Agpano-Sobyetiko. Sa kabila ng mataas at pandaigdigang pagkilala sa litrato, nanatiling hindi alam ang pagkakakilanlan ni Gula hanggang 2002, nang ma-tiyak ang kanyang kinaroroonan at nakuhanan siya ng litrato sa pangalawang pagkakataon sa kanyang buhay. Dahil nanirahan at nagpalaki ng pamilya sa Pakistan sa loob ng 35 taon, inaresto si Gula ng mga awtoridad ng Pakistan noong 2016 at pagkatapos ay ipinatapon sa Afghanistan noong 2017 sa kasong pagkakaroon ng mga pekeng dokumento ng pagkakakilanlan. Gayunpaman, noong Nobyembre 2021, nabigyan ng kanlungan si Gula sa bansang Italya, tatlong buwan pagkatapos ng pagkuha ng Taliban sa Afghanistan.