Pumunta sa nilalaman

Paseguruhan ng mga Naglilingkod sa Pribado

Mula sa Wikipedia, ang malayang ensiklopedya
Paseguruhan ng mga Naglilingkod sa Pribado
UriKorporasyong pag-aari at kontrolado ng pamahalaan
IndustriyaSeguro
Itinatag1 Setyembre 1957; 68 taon na'ng nakalipas (1957-09-01)
Punong-tanggapanSSS Building, Abenida Silangan, Diliman,
Lungsod Quezon
,
Pilipinas
Pangunahing tauhan
Robert Joseph M. de Claro [1][2](Pangulo at CEO)
SerbisyoPensiyon, Pautang
KitaIncrease₱362.2 bilyon[3] (2023)
Increase₱83.13 bilyon[3] (2023)
Websaytsss.gov.ph

Ang Paseguruhan ng mga Naglilingkod sa Pribado[4] (SSS; Ingles: Social Security System) ay isang programang pinapatakbo ng estado para sa panlipunang seguro sa Pilipinas, na inilaan para sa mga manggagawa sa mga pribado, propesyonal at impormal na sektor. Itinatag ang SSS sa bisa ng Batas Republika Blg. 1161, na mas kilala bilang ang Social Security Act of 1954, at kalauna'y binago ng Batas Republika Blg. 8282 noong 1997. Samantala, ang mga empleyado ng gobyerno ay saklaw ng hiwalay na pensiyong pinapatakbo rin ng estado sa ilalim ng Paseguruhan ng mga Naglilingkod sa Pamahalaan (GSIS).

Kasaysayan

[baguhin | baguhin ang wikitext]
Panandang makasaysayan na ikinabit noong 2008 sa punong-tanggapan ng SSS sa Lungsod Quezon

Noong kanyang Talumpati sa Kalagayan ng Bansa noong Enero 1948, nanawagan si Pangulong Manuel Roxas sa mga mambabatas na lumikha ng isang programa sa panlipunang seguridad upang magbigay ng ginhawa sa mga mamamayang nahaharap sa mga pagsubok pagkatapos ng digmaan. Ngunit siya ay namatay bago pa man naipasa ang panukalang batas.[5][6]

Noong Hulyo 7, 1948, sa ilalim ng administrasyon ni Pangulong Elpidio Quirino na humalili kay Roxas, nilikha ang Komisyon sa Pag-aaral ng Paseguruhang Panlipunan sa pamamagitan ng Kautusang Tagapagpaganap Blg. 150.[7] Binuo ng komisyon ang Social Security Act na isinumite sa Kongreso. Noong 1954, sina Kinatawan Floro Crisologo at mga Senador Cipriano Primicias at Manuel Briones ay naghain ng mga panukalang-batas na kalauna’y naging Batas Republika Blg. 1161 o ang Social Security Act of 1954 sa ilalim ng panunungkulan ni Pangulong Ramon Magsaysay.[8][9][10] Kilala rin ito bilang Social Security Law (SSS Law).

Gayunpaman, naantala ang pagpapatupad nito dahil sa mga pagtutol ng mga grupong pang-negosyo at manggagawa. Noon lamang 1957 iniharap sa Kongreso ang mga panukalang batas na lumikha sa Batas Republika Blg. 1792, na nagsususog sa orihinal na Social Security Act. Noong Setyembre 1, 1957, sa wakas ay ipinatupad ang Social Security Act of 1954 sa ilalim ng termino ni Carlos P. Garcia (namatay si Magsaysay noong Marso ng taong iyon).[5]

SSS, Fairview, Lungsod Quezon

Noong Setyembre 7, 1979, binago ng Kautusang Tagapagpaganap Blg. 1636 ang Batas Republika Blg. 1161 at pinalawig ang sapilitang saklaw sa mga taong may sariling hanapbuhay. Nagkabisa ang mga bagong tuntunin noong Enero 1, 1980.[11][12] Pinahintulutan ng mga bagong alituntunin ang mga magsasaka at mangingisda na mapasama sa saklaw noong 1992, at pagkaraan ng isang taon, ang mga kasambahay na kumikita ng hindi bababa sa ₱1,000 kada buwan. Noong 1995, sinimulan namang saklawin ng SSS ang mga manggagawa sa impormal na sektor na may kaparehong buwanang kita.[8]

Noong Mayo 1, 1997, nilagdaan ni Pangulong Fidel V. Ramos ang Batas Republika Blg. 8282, na kilala rin bilang Social Security Act of 1997. Binago ng batas ang SSS[13] at nagbigay ng mas mahusay na mga pakete ng benepisyo, pinalawak ang saklaw, nagpatupad ng mas pleksibleng pamumuhunan, nagtakda ng mas mahigpit na parusa para sa mga lumalabag sa batas, nagsagawa ng kondonasyon ng mga multa ng mga delinkwenteng tagapag-empleyo, at nagtatag ng isang kusang-loob na pondong probidente para sa mga miyembro.

Ang Programang Himagal ng mga Manggagawa, nagsimula noong 1975, ay nagbibigay ng ibay na himagal na isinakatuparan sa Hunyo 1984 sa manggagawa na ang pagkasakit, kamatayan, o sakuna ay nangyari sa panahon ng mga gawaing may kaugnayan sa hanapbuhay.

Nagsilbi ang SSS sa pamamahala ng programang Medicare para sa pagpapaospital at mga iba pang pangangailangan sa paggagamot ng mga manggagawa sa pribadong sektor; at ang GSIS para sa mga manggagawa sa pampublikong sektor. Gayumpaman, nang dahil sa pagpasa ng Batas Republika Blg. 7875 o ang Batas ng Pambansang Segurong Pangkalusugan ng 1995, naglipat ang SSS at GSIS ng pamamahala ng programang Medicare sa Korporasyon ng Segurong Pangkalusugan ng Pilipinas (PhilHealth) para sa pinagsama at pangmalawakang paraan sa kaunlarang pangkalusugan na isinakatuparan sa Hulyo 1999.

Ang mga pensiyonado sa pagreretiro, kamatayan at may kapansanan ng SSS na dati nang nasakupan ng pagkahantong ng Batas Republika Blg. 7875 noong 4 Marso 1995 ay nagawaran ng mga inam sa pagpapaospital sa ilaim ng PhilHealth. Ang mga pensiyonado na umabot sa pagkahantong ng Batas Republika Blg. 7875 noong 4 Marso 1995 at kapagkuwan ay hindi saklaw maliban sa mga nakamit ang kwalipikasyon na kinakailangan na ipinataw ng PhilHealth.

Mga serbisyo

[baguhin | baguhin ang wikitext]

Nagbibigay ang SSS ng benepisyo para sa kamatayan, libing, panganganak, ganap na kapansanan, pagretiro, sakit at sapilitang kawalan ng trabaho.[14] Ang Employees' Compensation (EC) Program ("Programang Kabayaran sa mga Empleyado"), na sinimulan noong 1975, ay nagbibigay ng karagdagang kabayaran sa mga manggagawang nagkasakit, naaksidente habang nagtatrabaho, o namatay dahil sa tungkulin. Ang mga benepisyo mula sa EC ay ipinagkakaloob lamang sa mga miyembrong may employer bukod sa kanilang sarili.[15]

Mga kinakailangan sa pagiging miyembro

[baguhin | baguhin ang wikitext]
  • Dapat ay hindi bababa sa 15 taong gulang.
  • Tinatanggap ang mga hindi nagtatrabaho.
  • Upang makakuha ng panghabambuhay na buwanang pensiyon, ang isang miyembro ng SSS ay dapat hindi bababa sa 60 taong gulang at may hindi bababa sa 120 buwanang hulog.[16]

Mga tagapangasiwa

[baguhin | baguhin ang wikitext]
Simula ng panunungkulan Katapusan ng panunungkulan Pangalan
1955 1956 Manuel O. Hizon
1956 1957 Eleuterio L. Adevoso
1957 1958 Rodolfo P. Andal
1958 1959 Emeterio C. Roa, Sr.
1959 1962 Ramon G. Gaviola, Jr.
1962 1963 Rene Espina
1963 1965 Bernardino R. Abes
Hunyo 1965 Disyembre 1965 Jovino S. Lorenzo
1966 1986 Gilberto O. Teodoro
1986 1990 Jose L. Cuisia, Jr.
1990 1998 Renato C. Valencia
1998 2001 Carlos A. Arellano
Enero 2001 Hulyo 2001 Vitaliano N. Nañagas
2001 2008 Corazon S. De la Paz-Bernardo
2008 kasalukuyan Romulo S. Neri

Sanggunian

[baguhin | baguhin ang wikitext]
  1. ↑ Gita-Carlos, Ruth Abbey (Disyembre 18, 2024). "Palace bares new set of PBBM appointees" [Inihayag ng Palasyo ang mga bagong hinirang ni PBBM]. Philippine News Agency (sa wikang Ingles). Nakuha noong Marso 12, 2025.
  2. ↑ Cordero, Ted (Oktubre 12, 2024). "De Claro named as SSS officer-in-charge" [De Claro, ipinangalan bilang namamahalang opisyal ng SSS]. GMA Network. Nakuha noong Oktubre 12, 2024.
  3. ↑ 3.0 3.1 Social Security System (Pebrero 24, 2024). SSS net income in 2023 soars to P83 billion [Netong kita ng SSS, sumirit sa P83 bilyon noong 2023] (Ulat) (sa wikang Ingles). Inarkibo mula sa orihinal noong Abril 6, 2024. Nakuha noong Abril 4, 2024.
  4. ↑ Narvaez, Eilene Antoinette; Macaranas, Edgardo, mga pat. (2013). Mga Pangalan ng Tanggapan ng Pamahalaan sa Filipino (PDF) (sa wikang Filipino) (ika-2013 (na) labas). Komisyon sa Wikang Filipino. p. 6. ISBN 978-971-0197-22-4. Inarkibo (PDF) mula sa orihinal noong Marso 29, 2017. Nakuha noong Oktubre 26, 2024.
  5. ↑ 5.0 5.1 Bugante, Susie (Agosto 30, 2016). "59 years of faithful service to the nation" [59 taon ng tapat na paglilingkod sa bansa]. BusinessMirror (sa wikang Ingles). Nakuha noong Hunyo 30, 2019.
  6. ↑ "Social Security System (SSS) — Davao Corporate" [Paseguruhan ng mga Naglilingkod sa Pribado (SSS) — Davao Corporate] (sa wikang Ingles). 2024-03-25. Inarkibo mula sa orihinal noong 2024-03-25. Nakuha noong 2024-03-25.
  7. ↑ "Third Republic" [Ikatlong Republika]. Official Gazette of the Republic of the Philippines (sa wikang Ingles). Nakuha noong Hunyo 30, 2019.
  8. ↑ 8.0 8.1 "SSS Guidebook" [Aklat Panggabay ng SSS] (PDF) (sa wikang Ingles). Page 2 of the Social Security System of the Philippines. Inarkibo mula sa orihinal (PDF) noong Oktubre 4, 2018. Nakuha noong Mayo 18, 2017.
  9. ↑ "Crisologo Museum" [Museong Crisologo]. Vigan.ph (sa wikang Ingles). Nakuha noong Mayo 18, 2017.
  10. ↑ "A Study of Services at Social Security System Makati Processing Center" [Isang Pag-aaral ng mga Serbisyo sa Sentro ng Pagpoproseso ng Paseguruhan ng mga Naglilingkod sa Pribado sa Makati] (PDF). www.ijesc.org (sa wikang Ingles). Inarkibo mula sa orihinal (PDF) noong Mayo 11, 2022. Nakuha noong Agosto 10, 2021.
  11. ↑ "Presidential Decree No. 1636, s. 1979" [Kautusang Tagapagpaganap Blg. 1636, s. 1979]. Official Gazette of the Republic of the Philippines (sa wikang Ingles). Setyembre 7, 1979. Nakuha noong Hunyo 30, 2019.
  12. ↑ "SOS: The state of the SSS" [SOS: Ang kalagayan ng SSS]. Manila Standard (sa wikang Ingles). Nakuha noong Hunyo 30, 2019.
  13. ↑ Honeyman, Neil (Nobyembre 15, 2015). "Honeyman: The SSS pension scheme" [Honeyman: Ang programa ng pensiyon ng SSS]. SunStar (sa wikang Ingles). Inarkibo mula sa orihinal noong Septiyembre 28, 2023. Nakuha noong Hulyo 1, 2019. {{cite news}}: Check date values in: |archive-date= (tulong)
  14. ↑ "SSS: Higher contribution means more benefits" [SSS: Mas mataas na ambag, mas maraming benepisyo]. GMA News (sa wikang Ingles). Nakuha noong Hulyo 1, 2019.
  15. ↑ "Self-employed join gov't compensation program" [Manggagawang pansarili, lumahok sa programang kabayaran ng gobyerno]. BusinessWorld (sa wikang Ingles). Nakuha noong Hulyo 1, 2019.
  16. ↑ "Republic of the Philippines Social Security System" [Republika ng Pilipinas Paseguruhan ng mga Naglilingkod sa Pribado]. Sss.gov.ph (sa wikang Ingles). Inarkibo mula sa orihinal noong Oktubre 4, 2018. Nakuha noong Oktubre 3, 2018.

Tingnan din

[baguhin | baguhin ang wikitext]

Mga panlabas na kawing

[baguhin | baguhin ang wikitext]
Nagmula sa "https://tl.wikipedia.org/w/index.php?title=Paseguruhan_ng_mga_Naglilingkod_sa_Pribado&oldid=2178517"