Tagagamit:Praisashimi/Kampo John Hay

Kasaysayan

Ang United States 48th Infantry Unit sa ilalim ng pamumuno ni Captain Robert Rudd ay itinatag ang Hill Station sa lugar kung nasan ngayon ang Camp John Hay noong 1900, panahon ng Digmaang Pilipino-Amerikano. Ang lugar ay tinatawag ng mga lokal, ang mga Ibaloi, bilang "Kafagway" at pag-aari ng pinuno ng Ibaloi na si Mateo Cariño. Noong Oktubre 1903, ang 213 ektarya (530 acres) ng lupain ay itinakda bilang "Camp John Hay", isang reserbasyon para sa mga sundalong Amerikano, nang lagdaan ni Pangulong Theodore Roosevelt ng Estados Unidos ang isang utos pang-pangulo. Ang mga sundalong Amerikano ay binigyan ng lugar na mapagpapahingahan mula sa mas mainit na temperatura ng mga kapatagan.

Noong Disyembre 1941, naghulog ng 72 bomba ang mga eroplanong pandigma ng Hapon sa pangunahing gate ng kampo sa simula ng Ikalawang Digmaang Pandaigdig sa Pilipinas. Ang Camp John Hay ay nagsilbing internment camp ng mga puwersa ng Imperyal na Hapon at headquarters ni Heneral Tomoyuki Yamashita noong panahon ng okupasyon ng Hapon. Nang sumuko ang mga puwersa ng Hapon sa kapuluan, sumuko si Yamashita sa mga puwersa ng Alyado sa Camp John Hay, partikular sa tirahan ng High Commissioner na kalaunan ay pinalitan ng pangalan na Ambassador's Residence.

Pagkatapos ng digmaan, ang Camp John Hay ay

na-convert sa John Hay Air Base noong 1955 at nanatili sa kontrol ng mga Amerikano hanggang sa opisyal na itong ibalik sa gobyerno ng Pilipinas noong 1991. Ang dating instalasyong militar ay ginawa bilang isang sentro para sa pag-develop ng human resources at isang reserbasyon ng watershed ng kagubatan. Ang lugar ay naging isang atraksiyong panturista.

Noong Abril 3, 2024, pinagtibay ng En Banc ng Korte Suprema sa desisyon ni Justice Japar Dimaampao ang arbitral ruling at inutusan ang Camp John Hay Development Corp. na lisanin ang bahagi ng John Hay Special Economic Zone na kanilang inuupahan mula sa Bases Conversion Development Authority (BCDA). Sa G.R. Nos. 219421 at 241772 (BCDA v. CJH Development Corporation, et al.; CJH Development Corporation v. COA and BCDA), inalis ng Mataas na Hukuman ang injunction sa pagpapaalis ng developer ng Camp John Hay na partikular na inaatasan ang pagbabalik ng 247-ektaryang inuupahang ari-arian kasama ng lahat ng mga improvement nito sa BCDA, at ang BCDA naman ay dapat mag-refund sa CJH DevCo ng kabuuang halagang P1.4 bilyon na kanilang naibayad bilang renta.

Noong Mayo 30, 2024, inihayag ng Presidential Communications Group na si abogado Marlo Ignacio Quadra ang itinalaga bilang pangulo at punong tagapagpaganap ng John Hay Management Corp. Noong Oktubre 2023, siya ay hinirang ng Pangulo bilang miyembro ng JHMC Board of Directors.

[[Kategorya:Mga koordinado sa Wikidata]] [[Kategorya:Mga artikulo na may maikling paglalarawan]]