Taga-karga ng baterya
Ang taga-karga ng baterya, pantablay, o tagapuno ng baterya (Ingles: battery charger, recharger, o simpleng charger[1][2]) ay isang aparato na nag-iimbak ng enerhiya sa isang de-kuryenteng baterya sa pamamagitan ng pagpapadaloy ng kuryente rito. Ang charging protocol o protokol sa pagkarga (kung gaano kalakas ang boltahe at kuryente, gaano katagal ang pagkarga, at ano ang gagawin kapag tapos na ang pagkarga) ay nakadepende sa laki at uri ng bateryang kinakarga. Ang ilang uri ng baterya ay may mataas na toleransiya sa overcharging o labis na pagkarga kahit ganap nang napuno ang baterya at maaaring i-recharge o muling magkarga sa pamamagitan ng pagkonekta sa isang constant voltage source (pinagkukunan ng pare-parehong boltahe) o constant current source (pinagkukunan ng pare-parehong kuryente), depende sa uri ng baterya.
Ang mga simpleng taga-karga ng baterya ng ganitong uri ay kailangang manu-manong idiskonekta sa pagtatapos ng siklo ng pagkarga. Ang iba pang uri ng baterya ay gumagamit ng takdang-oras upang awtomatikong ihinto ang pagkarga kapag dapat na itong matapos. Mayroon ding mga uri ng baterya na hindi kayang tiisin ang labis na pagkarga at maaaring masira, tulad ng pagbawas ng kapasidad at ikli ng buhay, sobrang pag-init, o maging pagsabog. Maaaring may temperatura o mga sirkitong panukat ng boltahe at isang microprocessor controller ang taga-karga ng baterya upang ligtas na isaayos ang kuryente at boltahe ng pagkarga, tukuyin ang estado ng karga, at ihinto ang pagkarga sa tamang oras. Maaari ring itaas ng taga-karga ng baterya ang boltaheng inilalabas nang proporsyonal sa kuryente upang tumbasan ang impedance (o pagsalungat ng sirkito sa AC) sa mga kawad.[3]
Ang trickle charger (o marahang taga-karga ng baterya) ay nagbibigay ng relatibong maliit na dami ng kuryente, sapat lamang upang salungatin ang sariling diskarga ng bateryang matagal na hindi ginagamit. Ang ilang uri ng baterya ay hindi kayang tiisin ang pagkakargang marahan, at ang mga pagtatangkang gawin ito ay maaaring magdulot ng pinsala. Ang mga Lithium-ion (ionong lityo) na baterya ay hindi kayang humawak ng walang katapusang trickle charging.[4] Ang mababagal na taga-karga ng baterya ay maaaring umabot ng ilang oras bago matapos ang pagkarga. Ang mga high-rate charger (o mabilis na taga-karga ng baterya) naman ay kayang ibalik ang malaking bahagi ng kapasidad nang mas mabilis, subalit maaaring higit ito sa kayang tiisin ng ilang uri ng baterya. Ang mga ganitong baterya ay nangangailangan ng aktibong pagmamanman upang maprotektahan laban sa maling paggamit.[5] Ang mga sasakyang de-kuryente ay perpektong nangangailangan ng mga mabilis na taga-karga ng baterya. Para sa pampublikong paggamit, ang pagluklok ng mga taga-karga ng bateryang ito at ang suportang pang-distribusyon para sa mga ito ay isang isyu sa panukalang malawakang paggamit ng mga de-kuryenteng sasakyan.
Mga sanggunian
[baguhin | baguhin ang wikitext]- ↑ "Recharger definition and meaning - Collins English Dictionary" (sa Ingles). Inarkibo mula sa orihinal noong 30 Nobyembre 2016. Nakuha noong 26 Marso 2017.
- ↑ "recharge - definition of recharge in English - Oxford Dictionaries" (sa Ingles). Inarkibo mula sa orihinal noong Marso 25, 2014. Nakuha noong 26 Marso 2017.
- ↑ "Charger with output voltage compensation". Freepatentsonline.com (sa Ingles). Nakuha noong 6 Hulyo 2023.
- ↑ Phil Weicker, A Systems Approach to Lithium-Ion Battery Management, Artech House, 2013 ISBN 1608076598 pahina 26 (sa Ingles)
- ↑ Hassini, Marwan; Redondo-Iglesias, Eduardo; Venet, Pascal (19 Hulyo 2023). "Lithium–Ion Battery Data: From Production to Prediction" (PDF). Batteries (sa Ingles). 9 (7): 385. doi:10.3390/batteries9070385.