Tsokolateng Dubai
 Isang tableta ng tsokolate na hinati upang ipakita ang berdeng palaman sa loob | |
| Uri | Tableta ng tsokolate |
|---|---|
| Kurso | Panghimagas |
| Lugar | Emiratos Arabes Unidos |
| Rehiyon o bansa | Dubai |
| Gumawa | Sarah Hamouda at Nouel Catis Omamalin |
| Taon | 2021 |
| Pangunahing Sangkap | tsokolateng de-gatas, pistatso, tahini, kadayif |
| |
Ang tsokolateng Dubai (Arabe: شوكولاتة دبي) ay isang estilo ng tabletang tsokolate na may palamang kadayif (tinadtad na filo) at kremang pistatso-tahini. Nilikha ito noong 2021 nina Sarah Hamouda, isang Britanika-Ehipsiyang inhinyera, at Nouel Catis Omamalin, isang Filipinong tagapayo sa kulinarya, na magkasamang nagtayo ng Fix Dessert Chocolatier, isang Emiratong tsokolatero sa Dubai.[1] Pinasikat ang tsokolateng Dubai noong 2024 ng mga impluwenser sa hatirang pangmadla, lalo na ng mga gumagamit ng TikTok, at mula noon ay tinularan ng mga nagtitinda sa iba’t ibang panig ng mundo.
Paglalarawan
[baguhin | baguhin ang wikitext]Ang tsokolateng Dubai ay isang tableta ng tsokolateng de-gatas na may palamang matamis na krema ng pistatso-tahini at kadayif (tinadtad na filo).[2] Nag-iiba ang lapot ng palaman mula pinong dinurog hanggang malapot na masa.[3] Kaagapay ng lutong ng kadayif ang makremang tekstura ng pistatso at tahini.[2]
Paglikha
[baguhin | baguhin ang wikitext]Inimbento ang tsokolateng Dubai noong 2021 ni Sarah Hamouda, isang Britanikang-Ehipsyang inhinyera na naninirahan sa Dubai.[2][4] Sa panahong iyon, buntis si Hamouda, at dahil sa kanyang paglilihi ay naisipan niya na pagsamahin ang tsokolate, pistatso, tahini, at knafeh (isang panghimagas sa Gitnang Silangan na gawa sa kadayif, sirup at malambot na keso). Sa bahay, nagtrabaho si Hamouda sa pagbuo ng isang tableta ng tsokolate, bago niya kontakin si Nouel Catis Omamalin, isang Pilipinong tagapayo sa kulinarya na nagsanay bilang pastelero.[2] Sa kanyang salaysay hinggil sa paglikha ng tsokolateng Dubai, sinabi ni Omamalin na gusto nilang dalawa na gumawa ng tabletang tsokolate na may lasa ng panghimagas. Dahil knafeh ang kanyang paboritong Arabeng panghimagas, at dahil sa tingin niya ay magbibigay ito ng kaakit-akit na lutong at halagang nostalhiko, iminungkahi ni Omamalin ang isang tabletang tsokolate na gumagamit ng mga lasa nito. Sama-sama, binuo nila ang tsokolate at itinatag ang kanilang samahan at ang tindahang onlayn na Fix Dessert Chocolatier,[5] na noong 2022 ay naglunsad ng "Can’t Get Knafeh of It".[6]
Ang Can’t Get Knafeh ay may lamang pistatso, tahini, at kadayif, at binalutan ng mga dilaw at berdeng disenyo.[6] Ginawa nang mano-mano ang mga tableta, at ipinipa ang palaman; ang isang pangkat na nagtatrabaho nang anim hanggang walong oras ay nakakagawa ng humigit-kumulang 25 tableta bawat araw. Si Omamalin, na bago ang paglulunsad ay umalis na sa sosyohan, ay patuloy na nakipagtulungan kay Hamouda, at sinabing ginagawa niya ito "bilang isang kaibigan".[5] Sa sumunod na taon, patuloy nilang binabago at inaangkop ang resipi, hanggang sa unang bahagi ng 2023 nang sabihin ni Hamouda na "sa wakas... naperpekto na nila ito".[2] Ang bawat tableta ay ibinenta sa halagang £16, noong una’y isa lamang bawat linggo.[6]
Dahil sa maliit na badyet sa pagsasapubliko, umasa ang Fix sa mga impluwenser sa hatirang pangmadla upang itaguyod ang tsokolate, na tinikman at nirepaso nila sa harap ng kamera. Iniuugnay ang matingkad na kulay ng palaman sa ilan sa mga tagumpay ng produkto, dahil mahalaga ang kaakit-akit na biswal na dating nito sa mga plataporma ng hatirang pangmadla tulad ng TikTok at Instagram.[3] Una itong sumikat noong 2024.[7][4]
Mga sanggunian
[baguhin | baguhin ang wikitext]- ↑ "From TikTok To Trade: How Dubai Chocolate's Viral Craze Sparked Global Pistachio Shortage" [Mula TikTok Hanggang Kalakalan: Kung Paano Nagpasiklab ang Uumapaw na Kasikatan ng Tsokolateng Dubai ng Pandaigdigang Kakulangan ng Pistatso] (sa wikang Ingles). NDTV. 20 Abril 2025.
- ↑ 2.0 2.1 2.2 2.3 2.4 Saner, Emine (Abril 8, 2025). "Sweet, sticky and sold out everywhere: why is there such a craze for Dubai chocolate?" [Matamis, malagkit at laging ubos kahit saan: bakit patok na patok ang tsokolateng Dubai?]. The Guardian (sa wikang Ingles). Inarkibo mula sa orihinal noong Hunyo 9, 2025. Nakuha noong Hulyo 15, 2025.
- ↑ 3.0 3.1 Spencer-Jolliffe, Natasha (4 Abril 2025). "Dubai Chocolate craze reaches fever pitch" [Pagkahumaling sa Tsokolateng Dubai, umabot sa rurok]. Confectionery News (sa wikang Ingles). William Reed Ltd. Nakuha noong 8 Abril 2025.
- ↑ 4.0 4.1 Cairns, Rebecca (18 Hunyo 2024). "Meet the woman behind Dubai's viral super-chunky chocolate bar" [Kilalanin ang babaeng nasa likod ng bayral na napaka-bultuhing tsokolateng tableta ng Dubai]. CNN (sa wikang Ingles). CNN. Nakuha noong 16 Disyembre 2024.
- ↑ 5.0 5.1 Beltran, Samantha (Setyembre 30, 2024). "Meet the Filipino chef behind TikTok's viral Dubai chocolate bar" [Kilalanin ang Pilipinong kusinerong nasa likod ng bayral na tabletang tsokolate ng Dubai]. Arab News (sa wikang Ingles). Inarkibo mula sa orihinal noong Disyembre 17, 2024. Nakuha noong Hulyo 15, 2025.
- ↑ 6.0 6.1 6.2 Swain, Marianka (Marso 27, 2025). "The chocolate bar that's so popular Waitrose has limited the number it sells" [Ang napakasikat na tabletang tsokolate na nilimitahan ng Waitrose ang itinitindang dami]. The Daily Telegraph (sa wikang Ingles). Inarkibo mula sa orihinal noong Marso 27, 2025. Nakuha noong Hulyo 15, 2025.
- ↑ Michollek, Nadine (10 Disyembre 2024). "Trending treat 'Dubai chocolate' — but who owns the name?" [Usong tsokolateng ‘Dubai’ — pero sino ang may-ari ng pangalan?]. dw.com (sa wikang Ingles). Deutsche Welle. Nakuha noong 16 Disyembre 2024.