Gōshō Aoyama
Si Gōshō Aoyama (Hapon: 青山 剛昌), ipinanganak Yoshimasa Aoyama (青山 剛昌, Aoyama Yoshimasa, noong Hunyo 21, 1963) ay isang manunulat na Hapon na kilala sa paggawa ng mga seryeng manga, kabilang ang Detective Conan.
Isang henyo sa pagdodrowing si Aoyama mula pa pagkabata. Nang siya ay nasa Unang Baitang (sa elementarya), ang kanyang pintura na "Yukiai War" ay nanalo sa isang kompetisyon at itinanghal sa Tottori Daimaru Department Store.
Nag-aral siya ng hayskul sa Ikuei High. Pagkatapos niyan ay pumunta siya sa Nihon University College of Art sa Tokyo para makapag-aral ng kolehiyo. Habang nag-aaral siya sa unibersidad, nanalo si Aoyama sa isang paligsahan ng mga komiks para sa mga freshman. Ito ang naging daan niya para sa kanyang karera bilang isang mangaka (manga artist) at isang may-akda.
Ang unang likha ni Aoyama ay isang manga na ipinangalang "Chotto Mattete (Wait a Minute). Ito ay inilathala sa lingguhang magasin na "Shounen Sunday" noong 1987. Sumunod niyan ang "Magic Kaito", na inilathala rin sa parehong magasin.
Noong dekada '90, lumabas ang "Yaiba", isa ring manga na nilikha ni Aoyama. Ito ay nagkaroon ng 24 na bolyum at nanalo sa Shogakukan manga contest noong 1992. Ang manga na ito ay ginawa ring anime series.
Noong 1994, lumabas ang "Detective Conan". Sumikat ang manga na ito sa Japan at ginawa ring anime series noong 1996. Sa kasalukuyan ay hindi pa natatapos ang manga at anime series na ito at ipinapalabas sa iba't ibang bansa, kabilang ang Pilipinas.
Noong Mayo 5, 2005, ikinasal siya kay Minami Takayama, ang voice actor (o kung tawagin natin ay dubber) ni Conan Edogawa sa anime na bersyon ng "Detective Conan". Ngunit di nagtagal at naghiwalay rin sila.
