Kabihasnang Miseneo
Ang Miseno o Misenas (Ingles: Mycenae, Kastila: Micenas) ay isang pook na arkeolohikong nasa Gresya. Matatagpuan ito sa mga 90 kilometro patimog-kanluran ng Atenas, nasa hilagang-silangan ng Peloponeso. Nasa 6 na kilometrong patimog nito ang Argos, habang nasa 48 kilometrong pahilagang-silangan naman ang Corinto. Mula sa burol na kinalalagyan ng palasyong Miseneo o Miseneano, matatanaw ang kahabaan ng Argolid patungo sa Gulpong Saroniko.
Noong ikalawang milenyo BK, isa ang Miseno sa pangunahing sentro o lundayan ng kabihasnang Griyego. Isa itong malakas na puwersang militar na nangingibabaw sa karamihan ng katimugang Gresya. Tumutukoy sa Miseno at Miseneong Gresya (o Miseneanong Kabihasnan) ang panahon ng Kasaysayan ng Gresya mula mga 1600 BK magpahanggang mga 1100 BK.
Sila ang pumalit sa kalinangang Minoano.
[baguhin] Pinagmulan ng mga Miseneo
Pinagtatalunan pa rin sa kasalukuyan ang pinagmulan ng mga kalilanang Miseneo. Ngunit natitiyak na sila ang ninuno ng mga Sinaunang Griyegong nasa pangunahing lupain ng Sinaunang Gresya. Partikular na umiiral na sila noong mga panahon na ititayo ang mga palasyo sa Kreta (o Creta). Walang dudang naimpluwensiyahan sila ng kabihasanang Kretano. Pinaniniwalaan din ng mga dalubhasang dating nakadepende o kabahagi ang kanilang lupain ng kabihasnan ng Kreta.[1]
Isang bukod at natatanging sibilisasyong Miseneo ang umiral na noong mga 1500 BK. Pagkaraan ng ilang mga daang taon, nilarawan sila ni Homero bilang isang kabihasnang "mayaman sa ginto". Isa itong paglalarawan na napagtibay ng mga natuklasan ni Schliemann at ng iba pang mga manunuklas na sumunod sa kanyang mga yapak.[1]
[baguhin] Mga sanggunian
- ↑ 1.0 1.1 Kleiner, Fred S. at Christin J. Mamiya. (2005). "Homer's Mycenaeans". Gardner's Art Through the Ages, ika-12 edisyon. Wadsworth/Thomson Learning, Kaliporniya, ISBN 0155050907., Mycenaean Art, The Art of the Prehistoric Aegean, pahina 96.
