Pasma
Ang pasma ay ang kalagayan ng bahagi ng katawan ng tao kung kailan ang kalamnan at kasukasuan ay may pananakit dahil sa lamig-init na nadikitan o napagdaanan. Ang pasma ay wala sa kaalamang panggagamot sa western therapy/kanluraning lunas, dahil ito ay hindi nasusukat o napupuna ng kanilang mga aparato o kagamitan. Ngunit sa eastern therapy/silanganing lunas, ito ay matagal nang batid at sa katunayan ay may mga paraan ng pag iwas nito at may kaparaanan din ng pagbabawas ng dahan dahan nito sa katawan ng tao. Ang bansang hapon ay isa sa may kaalaman ng pagbibigay lunas sa pasma at isa sa mga ginagawa nila ay ang pagligo araw araw ng maligamgam na tubig o kilalang steambath kung kaya ang matatanda sa bansang nabanggit ay may mahabang buhay na nanatiling malusog at maliksi. Dito sa Pilipinas, ang pasma ay alam ng matatanda lalu na ng mga manggagamot na humihilot at arbolaryo, sabi nila mayroong pasma sa lamig(napagod bago nalamigan), may pasma sa init(galing sa malamig at nainitan) at may pasma sa gutom(nalipasan ng gutom). Ayon sa kaalaman nila batay sa karanasan at pamumulso, ang pasma kapag hindi pinapansin sa katawan ay nagiging dahilan pa ng pagkakaroon ng mga komplikasyon o supling na mga sakit sa katawan ng tao tulad ng rayuma at paghina ng mga organs o bahagi ng katawan ng tao. Ito ay sa dahilan ng pagkakaroon ng hindi pantay na kuryente o dagitab sa katawan ng tao kapag napapasma at siya rin ang unti unting dahilan ng imbalance/di timbang at paghina ng metabolismo ng katawan. Kapag naabotang pangkalahatang deperensiya sa katawan ay duon na lumalabas ang ibat ibang sakit o karamdaman. Isa sa pangkaraniwang gamit sa pasma ay paggamit ng liniment o panghaplas na may sangkap na may init at lamig sa pakiramdam. Ang pagiwas ng pagbabasa ng malamig na tubig kapag galing sa nakakapagod na gawain ay isang mabuting kaparaanan o kaya naman ay ang paggamit ng maligamgam na tubig sa paghinaw kung masyadong malinis sa katawan ay makakatulong din naman. Ang tama at wastong pagkain kasabay ng pag iwas sa pinagmumulan ng pasma ay isang matalinong kapasyahan upang mapanatiling malusog ang ating katawan. Wag nang magtaka na kapag minsan ang taong kumplikado ang mga karamdaman ay di agad gumagaling sa iniinom na mga gamot, maaring gumaling na ang ibang sakit niya tulad ng impeksiyon ngunit hindi ang pasma kaya hindi mawari kung anong pakiramdam niya. Ito nga kasing pasma ay hindi nakikita ng iba ngunit nararamdaman naman ng may katawan. Minumungkahi ang iwasan ang mapasma.
