Panliligaw
- Para sa ibang gamit, tingnan ang Ligaw (paglilinaw).
.jpg)
Ang ligaw, panliligaw o pagligaw[1][2] ay isang gawain ng taong nangingibig o nanunuyo sa isang taong napupusuan niya. Tinatawag din itong pangingibig.[1]
Isang tradisyunal o nakagawiang pangkultura ang panliligaw. Isa itong panahon ng panunuyo bago humantong sa kasunduan ng pag-iisang dibdib (engagement) at kasal (marriage). Sa panahon ng ritwal ng ligawan, karaniwang lumalabas o nagde-deyt (dating) ang mga magkasintahan o magiging magkasintahan upang magkakilala sila at sa lumaon makapagdesisyon kung maaari silang magkaroon ng kasunduang magpakasal sa hinaharap. Sa paglabas ng mga nag-iibigan, maaari silang kumain sa labas, manood ng sine, pumunta sa mga handaan at sayawan (pasayaw), mamili ng mga gamit o kaya "tumambay" lamang at gumawa ng ibang pang mga katulad na mga gawaing pangmagnobyo at nobya. Mayroon mga nakapagliligawan dahil sa internet o iba pang mga aktibidad na pang-kompyuter, at telepono (katulad ng chat, text message, pagpapadala ng mga litrato), at maging sa paggamit ng mga makalumang paraan: pagpapadala ng mga liham sa koreo, pagpapadala ng mga bulaklak, mga awitin, o regalo.
Manliligaw o mangingibig[1] ang tawag sa taong nangingibig sa isang nililigawan. Sa huli, nagiging ganap silang magkasintahan, at kapag ikinasal na naging mag-asawa na sila.
Mga nilalaman |
Sa kalikasan [baguhin]
May ligawan ding nagaganap sa daigdig ng mga hayop, katulad ng mga mamalya, ibon at isda.
Mga uri ng panliligaw [baguhin]
Mga piling uri ng panliligaw:[1]
- Ligaw-tingin ang tawag sa panunuyong ginagamitan ng mga galaw ng mata at mga bahagi nito, katulad ng sulyap at kindat
- Ligaw-ligawan ang panliligaw na sa una'y pabiro ngunit maaaring magiging totohanan
- Ligaw-biro ang panliligaw na may halong pagpapadamang pisikal
- Ligaw-manok ang pangingibig na may halong pagmamagaling at panggigilalas [sa mabuting paraan, hindi hambog]
Sa Pilipinas [baguhin]
Sa mga kanayunan sa Pilipinas, bukod sa panghaharana at paninilbihan, isa pang kaugalian ang pag-akyat ng ligaw o pagtungo ng binata sa tahanan ng isang iniirog na babae. Sa pagdalaw na ito, maaaring manghiram ang kabataang lalaki ng aklat o anumang babasahin bilang pagsubok sa babae: isang pag-alam kung may gusto rin at pauunlakan ito ng sinisintang dalaga. Kapag nagpahiram ang babae ng babasahin, mataimtim na makapag-iipit ang dalawa ng mga lihim na liham para maipaalam nila ang kanilang mga damdamin para sa isa't isa. Lihim ito sapagkat kapag dumadalaw ang isang lalaki sa tahanan ng babae, naroroon ang mga kasama sa bahay ng babae, na pinakikiharapan din ng binatang nanliligaw. Hindi lamang pag-ibig ang napag-uusapan kapag kaharap ang mga kasambahay ng dalaga, kabilang dito ang taya ng panahon, politika, at iba pang mga bagayna mapag-uusapan. Isang tanda na may pag-asa ang lalaki na maging kasintahan ang babae kung magpahiram ang dalaga ng babasahin, ang aklat ang nagsisilbing simula at "tulay" ng kanilang sarilinang pag-uugnayan.[3]
Tingnan din [baguhin]
Mga sanggunian [baguhin]
- ↑ 1.0 1.1 1.2 1.3 "Ligaw". English, Leo James. Tagalog-English Dictionary (Talahulugang Tagalog-Ingles). (1990).
- ↑ De Guzman, Maria Odulio. (1968/2005). "Panliligaw". The New Filipino-English / English-Filipino Dictionary. National Bookstore (Lungsod ng Mandaluyong) ISBN 9710817760.
- ↑ "Courtship patterns, isang pagtalakay sa gawi ng panliligaw sa nayon". Flavier, Juan M., "Doctor to the Barrios" (New Day Publishers). (1970/2007).
