Paligsahang Pang-awitin ng Eurovision

Paligsahang Pang-awitin ng Eurovision
Entamblado ng Paligsahang Pang-awitin ng Eurovision noong 2022
Uri	Kompetisyon sa musika
Gumawa	Unyon ng Pagbobrodkast sa Europa
Batay sa	Sanremo Music Festival
Host	Iba't ibang hosts
Bansang pinagmulan	Iba't ibang kalahok na bansa
Wika	Iba-iba; pangunahin na Ingles at Pranses
Bilang ng kabanata	69 na paligsahan 107 na mga live na palabas
Paggawa
Lokasyon	Iba't ibang punong lungsod
Oras ng pagpapalabas	~2 oras (semi-finals) ~4 oras (finals)
Kompanya	Unyon ng Pagbobrodkast sa Europa Iba't ibang pambansang brodkaster
Pagsasahimpapawid
Release	24 Mayo 1956 (1956-05-24) – kasalukuyan

Ang Paligsahang Pang-awitin ng Eurovision (Ingles: Eurovision Song Contest; Pranses: Concours Eurovision de la Chanson) ay isang paligsahan sa pag-aawit na taunang inoorganisa ng Unyon ng Pagbobrodkast sa Europa (EBU) sa mga miyembro nito simula 1956. Bawat bansa ay nagsusumite ng isang orihinal na awitin na kakatawan sa kani-kanilang mga bansa na tatanghalin at ipapalabas ng live sa pamamagitan ng mga network ng Eurovision at Euroradio, at magboboto para sa awit na gusto nila na galing sa ibang bansa upang makapili ng kampeon.

Ang paligsahan ay inspirasyon at ibinatay sa Sanremo Music Festival ng Italya, na ginaganap sa Riviera ng Italya mula 1951. Mula 1956, taunan nang ginaganap ang Eurovision (maliban sa 2020 dahil sa pandemya ng COVID-19), kaya naman ito ang pinakamatagal na internasyonal na kompetisyon sa musika sa telebisyon at isa sa pinakamatagal na programa sa telebisyon sa buong mundo.

Tradisyonal na ginaganap sa bansang nanalo sa kompetisyon sa nakaraang edisyon, ang paligsahan ay nagbibigay ng pagkakataon upang i-promote ang bansang punong-abala at lungsod bilang isang destinasyon ng turista. Ilan sa mga pinakamabentang artista ng musika sa mundo ay nakipagkumpitensya na sa mga nakaraang edisyon, kabilang ang ABBA, Céline Dion, Julio Iglesias, Cliff Richard, at Olivia Newton-John; ilan sa mga pinakamabentang single sa mundo ang nakatanggap ng kanilang unang internasyonal na pagtatanghal sa entablado ng Eurovision.

Bagama't sumikat ang paligsahan sa mga manonood sa mga bansang kalahok at hindi kalahok, ang patimpalak ay naging paksa rin ng kritisismo dahil sa kalidad ng sining nito, pati na rin ang isang pinaghihinalaang aspetong pampulitika sa kaganapan. May mga alalahanin na ibinalita tungkol sa mga pagkakaibigang pampulitika at mga tunggalian sa pagitan ng mga bansa na maaaring makaapekto sa mga resulta. Kabilang sa mga kontrobersyal na kaganapan ang pag-atras ng mga kalahok na brodkaster sa huling yugto, sensura ng mga brodkaster sa mga segment ng pagsasahimpapawid, diskwalipikasyon ng mga kalahok, pati na rin ang mga kaganapang pampulitika na nakakaapekto sa pakikilahok. Ang paligsahan ay binatikos din dahil sa labis na pagdami ng mga detalyadong palabas sa entablado kapalit ng merito sa sining.

Nakakuha ng katanyagan ang Eurovision dahil sa camp appeal nito, ang saklaw ng musika nito na may iba't ibang estilo ng etniko at internasyonal na kultura, pati na rin ang paglitaw nito bilang bahagi ng kulturang LGBTQ, na nagresulta sa isang malaki at aktibong fanbase at impluwensya sa kulturang popular. Ang kasikatan ng paligsahan ay humantong sa paglikha ng ilang katulad na mga kaganapan, na inorganisa man ng EBU o nilikha ng mga panlabas na organisasyon; ilang mga espesyal na kaganapan ang inorganisa ng EBU upang ipagdiwang ang mga piling anibersaryo o bilang kapalit dahil sa pagkansela.

Pormat

Kaliwa: Si Lys Assia, ang kampeon ng kauna-unahang edisyon ng Eurovision (1956).
Gitna: Si Johnny Logan, ang mang-aawit na may pinakamaraming panalo sa Eurovision, bilang nanalong artista noong 1980 at 1987 at nanalong kompositor noong 1987 at 1992.
Kanan: Si JJ, ang kasalukuyang kampeon ng Eurovision (2025).

Ang mga orihinal na kanta na kumakatawan sa mga kalahok na bansa ay itinatanghal sa isang live na programa sa telebisyon na ipinalalabas sa pamamagitan ng mga network ng Eurovision at Euroradio nang sabay-sabay sa lahat ng mga bansa. Ang isang "bansa" bilang isang kalahok ay kinakatawan ng isang brodkaster sa telebisyon mula sa bansang iyon, isang miyembro ng EBU, at kadalasan ay ang pambansang organisasyon ng pampublikong pagsasahimpapawid ng bansang iyon. Ang programa ay inoorganisa ng isa sa mga kalahok na brodkaster at ipinapalabas mula sa isang awditoryum sa napiling lungsod na magiging punong-abala. Simula noong 2008, ang bawat paligsahan ay karaniwang binubuo ng tatlong live na palabas sa telebisyon na ginaganap sa loob ng isang linggo: dalawang semi-finals ang ginaganap tuwing Martes at Huwebes, na sinusundan ng isang finals tuwing Sabado. Lahat ng kalahok na bansa ay lumalaban sa isa sa dalawang semi-finals, maliban sa bansang punong-abala ng paligsahan sa taong iyon at sa "Big Five"—ang mga bansa ng mga brodkaster na may pinakamalaking ambag sa pananalapi ng paligsahan: Alemanya, Espanya, Italya, Pransiya, at United Kingdom. Ang mga natitirang bansa ay hinahati sa dalawang semi-finals, at ang 10 kalahok na may pinakamataas na iskor sa bawat isa ay kwalipikado upang makagawa ng 26 na kalahok na lalaban sa finals. Simula nang ipakilala ang semi-final round noong 2004, ang mga bansang Luxembourg at Ukranya na lamang ang mga bansang wala sa "Big Five" na nakapasok sa finals ng bawat patimpalak na kanilang sinalihan.

Ang bawat kalahok na brodkaster ay may sariling pagpapasya sa prosesong maaaring gamitin nito upang pumili ng kanilang kalahok para sa paligsahan. Ang mga karaniwang pamamaraan kung saan pinipili ang mga kalahok ay kinabibilangan ng isang pambansang final na ipapalabas sa telebisyon gamit ang isang hurado at/o boto ng publiko; isang panloob na pagpili ng isang komite na hinirang ng brodkaster; at isang halo-halong format kung saan ang ilang mga desisyon ay ginagawa sa loob at ang publiko ay nakikibahagi sa iba. Kabilang sa mga pinakamatagumpay na pambasang final sa telebisyon ay ang Melodifestivalen sa Sweden, na unang itinatag noong 1959 at ngayon ay isa sa mga pinakapinapanood na palabas sa telebisyon sa bansa bawat taon.

Ang bawat palabas ay karaniwang nagsisimula sa isang pambungad na palabas na binubuo ng musika at/o sayaw ng mga inimbitahan na artista, na nag-aambag sa isang natatanging tema at pagkakakilanlan na nilikha para sa kaganapan ng taong iyon; mula noong 2013, ang pagbubukas ng pangwakas na bahagi ng paligsahan ay kinabibilangan ng isang "Parada ng Watawat", kung saan ang mga kalahok na artista ay papasok sa entablado sa likod ng watawat ng kanilang bansa sa katulad na paraan ng prusisyon ng mga kalahok na atleta sa seremonya ng pagbubukas ng Palarong Olimpiko. Ang mga manonood ay sasalubungin ng isa o higit pang mga presenter na magbibigay ng mahahalagang update sa panahon ng palabas, magsasagawa ng mga panayam sa mga kalahok na palabas mula sa green room, at gagabay sa proseso ng pagboto sa Ingles at Pranses. Ang mga kalahok sa kompetisyon ay magkakasunod na magtatanghal, at pagkatapos maitanghal ang lahat ng kanta, ang mga manonood ay inaanyayahang bumoto para sa kanilang mga paboritong pagtatanghal—maliban sa pagtatanghal ng kanilang sariling bansa—sa pamamagitan ng telepono, SMS, at ng opisyal na Eurovision app. Ang boto ng publiko ay binubuo ng 50% ng pinal na resulta kasama ang mga pananaw ng hurado na binubuo ng mga propesyonal sa industriya ng musika mula sa bawat bansa. Isang interval act ang palaging itinatampok sa panahong ito ng botohan, na sa ilang pagkakataon ay kinabibilangan ng isang kilalang personalidad mula sa bansang punong-abala o isang kinikilalang pigura sa buong mundo.

Ang mga resulta ng botohan ay iaanunsyo pagkatapos; sa semi-finals, ang 10 bansang may pinakamataas na ranggo ay iaanunsyo sa isang random na pagkakasunud-sunod, kung saan ang buong resulta ay hindi isisiwalat hanggang pagkatapos ng finals. Sa finals, tatawag ang mga presenter ng isang kinatawan na tagapagsalita para sa bawat bansa na siyang mag-aanunsyo ng mga puntos ng kanilang hurado, habang ang mga resulta ng boto ng publiko ay iaanunsyo pagkatapos ng mga presenter. Sa mga nakaraang taon, naging tradisyon na ang unang bansang mag-aanunsyo ng puntos ng hurado ay ang dating host, samantalang ang huling bansa ang kasalukuyang host. Ang mga kwalipikadong kalahok sa semi-finals, at ang nanalong delegasyon sa finals ay inaanyayahan pabalik sa entablado; sa finals, isang tropeo ang iginagawad sa mga nanalong performer at manunulat ng kanta ng nagwagi noong nakaraang taon, na susundan ng pag-uulit ng nanalong kanta. Ang buong resulta ng kompetisyon, kabilang ang detalyadong resulta ng hurado at boto ng publiko, ay inilalabas online ilang sandali pagkatapos ng finals, at ang kalahok na tagapagbalita ng nanalong lahok ay tradisyonal na binibigyan ng karangalan na mag-organisa ng kaganapan sa susunod na taon.

Kasaysayan

Taon	Petsa ng final	Venue, punong lungsod at bansa	Punong brodkaster	(Mga) presenter	Bansang kalahok		Kampeon
					Total	Sa final	Bansa	Awit	Mang-aawit
1956	Mayo 24	Teatro Kursaal, Lugano, Suwisa	SRG SSR RSI	Lohengrin Filipello	7		Suwisa	"Refrain"	Lys Assia
1957	Marso 3	Großer Sendesaal des Hessischen Rundfunks, Francfort del Meno, Kanlurang Alemanya	ARD HR	Anaid Iplicjian	10		Nederlandiya	"Net als toen"	Corry Brokken
1958	Marso 12	AVRO Studios, Hilversum, Nederlandiya	NTS	Hannie Lips			Pransiya	"Dors mon amour"	André Claveau
1959	Marso 11	Palais des Festivals et des Congrès, Cannes, Pransiya	RTF	Jacqueline Joubert	11		Nederlandiya	"Een beetje"	Teddy Scholten
1960	Marso 29	Royal Festival Hall, Londres, Reyno Unido	BBC	Katie Boyle	13		Pransiya	"Tom Pillibi"	Jacqueline Boyer
1961	Marso 18	Palais des Festivals et des Congrès, Cannes, Pransiya	RTF	Jacqueline Joubert	16		Luxembourg	"Nous les amoureux"	Jean-Claude Pascal
1962		Villa Louvigny, Lungsod ng Luksemburgo, Luxembourg	CLT	Mireille Delannoy			Pransiya	"Un premier amour"	Isabelle Aubret
1963	Marso 23	BBC Television Centre, Londres, Reyno Unido	BBC	Katie Boyle			Dinamarka	"Dansevise"	Grethe & Jørgen Ingmann
1964	Marso 21	Tivolis Koncertsal, Copenhague, Dinamarka	DR	Lotte Wæver			Italya	"Non ho l'età"	Gigliola Cinquetti
1965	Marso 20	Sala di Concerto della RAI, Napoles, Italya	RAI	Renata Mauro	18		Luxembourg	"Poupée de cire, poupée de son"	France Gall
1966	Marso 5	Villa Louvigny, Lungsod ng Luksemburgo, Luxembourg	CLT	Josiane Shen			Austria	"Merci Chérie"	Udo Jürgens
1967	Abril 8	Großer Festsaal der Wiener Hofburg, Viena, Austria	ORF	Erica Vaal	17		Reyno Unido	"Puppet on a String"	Sandie Shaw
1968	Abril 6	Royal Albert Hall, Londres, Reyno Unido	BBC	Katie Boyle			Espanya	"La, la, la"	Massiel
1969	Marso 29	Teatro Real, Madrid, Espanya	TVE	Laurita Valenzuela	16			"Vivo cantando"	Salomé
							Reyno Unido	"Boom Bang-a-Bang"	Lulu
							Nederlandiya	"De troubadour"	Lenny Kuhr
							Pransiya	"Un jour, un enfant"	Frida Boccara
1970	Marso 21	RAI Expositie-en-Congrescentrum, Amsterdam, Nederlandiya	NOS	Willy Dobbe	12		Irlanda	"All Kinds of Everything"	Dana
1971	Abril 3	Gaiety Theatre, Dublin, Irlanda	RTÉ	Bernadette Ní Ghallchóir	18		Mónako	"Un banc, un arbre, une rue"	Séverine
1972	Marso 25	Usher Hall, Edinburgh, Reyno Unido	BBC	Moira Shearer			Luxembourg	"Après toi"	Vicky Leandros
1973	Abril 7	Nouveau Théâtre Municipal, Lungsod ng Luksemburgo, Luxembourg	CLT	Helga Guitton	17			"Tu te reconnaîtras"	Anne-Marie David
1974	Abril 6	Brighton Dome, Brighton, Reyno Unido	BBC	Katie Boyle			Suwesya	"Waterloo"	ABBA
1975	Marso 22	Stockholmsmässan, Estokolmo, Suwesya	SR	Karin Falck	19		Nederlandiya	"Ding-A-Dong"	Teach-In
1976	Abril 3	Nederlands Congresgebouw, Ang Haya, Nederlandiya	NOS	Corry Brokken	18		Reyno Unido	"Save Your Kisses for Me"	Brotherhood of Man
1977	Mayo 7	Wembley Conference Centre, Londres, Reyno Unido	BBC	Angela Rippon			Pransiya	"L'oiseau et l'enfant"	Marie Myriam
1978	Abril 22	Palais des Congrès de Paris, Paris, Pransiya	TF1	Denise Fabre at Léon Zitrone	20		Israel	"A-Ba-Ni-Bi" (א-ב-ני-בי)	Izhar Cohen & Alphabeta
1979	Marso 31	International Convention Centre, Herusalem, Israel	IBA	Yardena Arazi at Daniel Pe'er	19			"Hallelujah" (הללויה)	Gali Atari & Milk and Honey
1980	Abril 19	Nederlands Congresgebouw, Ang Haya, Nederlandiya	NOS	Marlous Fluitsma			Irlanda	"What's Another Year?"	Johnny Logan
1981	Abril 4	RDS Simmonscourt, Dublin, Irlanda	RTÉ	Doireann Ní Bhriain	20		Reyno Unido	"Making Your Mind Up"	Bucks Fizz
1982	Abril 24	Harrogate International Centre, Harrogate, Reyno Unido	BBC	Jan Leeming	18		Alemanya	"Ein bißchen Frieden"	Nicole
1983	Abril 23	Rudi-Sedlmeyer-Halle, Munich, Kanlurang Alemanya	ARD BR	Marlene Charell	20		Luxembourg	"Si la vie est cadeau"	Corinne Hermès
1984	Mayo 5	Théâtre Municipal de la Ville de Luxembourg, Lungsod ng Luksemburgo, Luxembourg	RTL	Désirée Nosbusch	19		Suwesya	"Diggi-Loo Diggi-Ley"	Herreys
1985	Mayo 4	Scandinavium, Gothenburg, Suwesya	SVT	Lill Lindfors			Noruwega	"La det swinge"	Bobbysocks
1986	Mayo 3	Grieghallen, Bergen, Noruwega	NRK	Åse Kleveland	20		Belhika	"J'aime la vie"	Sandra Kim
1987	Mayo 9	Palais de Centenaire, Bruselas, Belhika	RTBF	Viktor Lazlo	22		Irlanda	"Hold Me Now"	Johnny Logan
1988	Abril 30	RDS Simmonscourt, Dublin, Irlanda	RTÉ	Michelle Rocca at Pat Kenny	21		Suwisa	"Ne partez pas sans moi"	Céline Dion
1989	Mayo 6	Palais de Beaulieu, Lausanne, Suwisa	SRG SSR TSR	Lolita Morena at Jacques Deschenaux	22		Yugoslavia	"Rock Me"	Riva
1990	Mayo 5	Vatroslav Lisinski Concert Hall, Zagreb, Yugoslavia	JRT RTZ	Helga Vlahović at Oliver Mlakar			Italya	"Insieme: 1992"	Toto Cutugno
1991	Mayo 4	Studio 15, Cinecittà Studios, Roma, Italya	RAI	Gigliola Cinquetti at Toto Cutugno			Suwesya	"Fångad av en stormvind"	Carola
1992	Mayo 9	Malmö Isstadion, Malmö, Suwesya	SVT	Lydia Capolicchio at Harald Treutiger	23		Irlanda	"Why Me"	Linda Martin
1993	Mayo 15	Green Glens Arena, Millstreet, Irlanda	RTÉ	Fionnuala Sweeney	25			"In Your Eyes"	Niamh Kavanagh
1994	Abril 30	Point Theatre, Dublin, Irlanda		Cynthia Ní Mhurchú at Gerry Ryan				"Rock 'n' Roll Kids"	Paul Harrington & Charlie McGettigan
1995	Mayo 13			Mary Kennedy	23		Noruwega	"Nocturne"	Secret Garden
1996	Mayo 18	Oslo Spektrum, Oslo, Noruwega	NRK	Ingvild Bryn at Morten Harket			Irlanda	"The Voice"	Eimear Quinn
1997	Mayo 3	Point Theatre, Dublin, Irlanda	RTÉ	Carrie Crowley at Ronan Keating	25		Reyno Unido	"Love Shine a Light"	Katrina and the Waves
1998	Mayo 9	National Indoor Arena, Birmingham, Reyno Unido	BBC	Ulrika Jonsson at Terry Wogan			Israel	"Diva"	Dana International
1999	Mayo 29	International Convention Centre, Herusalem, Israel	IBA	Dafna Dekel, Sigal Shachmon at Yigal Ravid	23		Suwesya	"Take Me to Your Heaven"	Charlotte Nilsson
2000	Mayo 13	Stockholm Globe Arena, Estokolmo, Suwesya	SVT	Kattis Ahlström at Anders Lundin	24		Dinamarka	"Fly on the Wings of Love"	Olsen Brothers
2001	Mayo 12	Parken Stadium, Copenhague, Dinamarka	DR	Natasja Crone Back at Søren Pilmark	23		Estonya	"Everybody"	Tanel Padar, Dave Benton & 2XL
2002	Mayo 25	Saku Suurhall, Tallin, Estonya	ETV	Annely Peebo at Marko Matvere	24		Letonya	"I Wanna"	Marie N
2003	Mayo 24	Skonto Hall, Riga, Letonya	LTV	Marie N at Renārs Kaupers	26		Turkiya	"Everyway That I Can"	Sertab Erener
2004	Mayo 15	Abdi İpekçi Arena, Istanbul, Turkiya	TRT	Meltem Cumbul at Korhan Abay	36	24	Ukranya	"Wild Dances"	Ruslana
2005	Mayo 21	Palace of Sports, Kyiv, Ukranya	NTU	Maria Efrosinina at Pavlo Shylko	39		Gresiya	"My Number One"	Helena Paparizou
2006	Mayo 20	O.A.C.A. Olympic Indoor Hall, Atenas, Gresya	ERT	Maria Menounos at Sakis Rouvas	37		Pinlandiya	"Hard Rock Hallelujah"	Lordi
2007	Mayo 12	Hartwall Areena, Helsinki, Pinlandiya	YLE	Jaana Pelkonen at Mikko Leppilampi	42		Serbiya	"Molitva" (Молитва)	Marija Šerifović
2008	Mayo 24	Belgrade Arena, Belgrado, Serbiya	RTS	Jovana Janković at Željko Joksimović	43	25	Rusya	"Believe"	Dima Bilan
2009	Mayo 16	Olimpiyskiy Arena, Mosku, Rusya	Channel One	Natalia Vodianova at Andrey Mahalov (semi-final)	42		Noruwega	"Fairytale"	Alexander Rybak
				Alsou at Ivan Urgant (final)
2010	Mayo 29	Telenor Arena, Oslo, Noruwega	NRK	Nadia Hasnaoui, Haddy N'jie at Erik Solbakken	39		Alemanya	"Satellite"	Lena
2011	Mayo 14	Esprit Arena, Düsseldorf, Alemanya	ARD NDR	Anke Engelke, Judith Rakers at Stefan Raab	43		Aserbayan	"Running Scared"	Ell & Nikki
2012	Mayo 26	Baku Crystal Hall, Baku, Aserbayan	İTV	Leyla Aliyeva, Nargiz Birk-Petersen at Eldar Gasimov	42	26	Suwesya	"Euphoria"	Loreen
2013	Mayo 18	Malmö Arena, Malmö, Suwesya	SVT	Petra Mede	39		Dinamarka	"Only Teardrops"	Emmelie de Forest
2014	Mayo 10	B&W Hallerne, Copenhague, Dinamarka	DR	Lise Rønne, Nikolaj Koppel at Pilou Asbæk	37		Austria	"Rise Like a Phoenix"	Conchita Wurst
2015	Mayo 23	Wiener Stadthalle, Viena, Austria	ORF	Mirjam Weichselbraun, Alice Tumler, Arabella Kiesbauer at Conchita Wurst	40	27	Suwesya	"Heroes"	Måns Zelmerlöw
2016	Mayo 14	Ericsson Globe, Estokolmo, Suwesya	SVT	Petra Mede at Måns Zelmerlöw	42	26	Ukranya	"1944"	Jamala
2017	Mayo 13	International Exhibition Centre, Kyiv, Ukranya	UA:PBC	Oleksandr Skichko, Volodymyr Ostapchuk at Timur Miroshnychenko			Portugal	"Amar pelos dois"	Salvador Sobral
2018	Mayo 12	Altice Arena, Lisboa, Portugal	RTP	Sílvia Alberto, Daniela Ruah, Catarina Furtado at Filomena Cautela	43		Israel	"Toy"	Netta
2019	Mayo 18	Expo Tel Aviv, Tel-Abib, Israel	IPBC	Bar Refaeli, Erez Tal, Assi Azar at Lucy Ayoub	41		Nederlandiya	"Arcade"	Duncan Laurence
2020	Mayo 16	Rotterdam Ahoy, Rotterdam, Nederlandiya	AVROTROS NOS NPO	Chantal Janzen, Edsilia Rombley at Jan Smit	41	26	Walang kampeon. Kinansela ang paligsahan dahil sa pandemya ng COVID 19.
2021	Mayo 22	Rotterdam Ahoy, Rotterdam, Nederlandiya	AVROTROS NOS NPO	Chantal Janzen, Edsilia Rombley, Jan Smit at Nikkie de Jager	39	26	Italya	"Zitti e buoni"	Måneskin
2022	Mayo 14	Palasport Olimpico, Turin, Italya	RAI	Alessandro Cattelan, Laura Pausini at Mika	40	25	Ukranya	"Stefania" (Стефанія)	Kalush Orchestra
2023	Mayo 13	M&S Bank Arena, Liverpool, Reyno Unido	BBC	Alesha Dixon, Hannah Waddingham at Julia Sanina (lahat ng palabas) Graham Norton (final)	37	26	Suwesya	"Tattoo"	Loreen
2024	Mayo 11	Malmö Arena, Malmö, Suwesya	SVT	Petra Mede at Malin Åkerman		25	Suwisa	"The Code"	Nemo
2025	Mayo 17	St. Jakobshalle, Basel, Suwisa	SRG SSR	Hazel Brugger at Sandra Studer (lahat ng palabas) Michelle Hunziker (final)		26	Austria	"Wasted Love"	JJ
2026	Mayo 16	Wiener Stadthalle, Viena, Austria	ORF	Victoria Swarovski at Michael Ostowski	35	25	Iaanunsyo	Iaanunsyo	Iaanunsyo

Mga bansang kasapi

Ang mga aktibong miyembro (kumpara sa mga associate member) ng Unyon ng Pagbobrodkast sa Europa (EBU) ay karapat-dapat na lumahok; ang mga aktibong miyembro ay ang mga matatagpuan sa mga estadong nasa loob ng European Broadcasting Area (EBA), o mga estadong miyembro ng Konseho ng Europa (CoE). Kabilang sa mga aktibong miyembro ang mga organisasyon ng media na ang mga broadcast ay kadalasang iniaalok sa hindi bababa sa 98% ng mga kabahayan sa kanilang sariling bansa na may kakayahang tumanggap ng mga naturang transmisyon. Ang mga associate member broadcaster ay maaaring karapat-dapat na makipagkumpitensya, depende sa pag-apruba ng reference group ng paligsahan.

Ang EBA ay binibigyang kahulugan ng International Telecommunication Union bilang sumasaklaw sa heograpikal na lugar sa pagitan ng hangganan ng ITU Region 1 sa kanluran, ang meridian 40° East ng Greenwich sa silangan, at parallel 30° North sa timog. Kasama rin sa EBA ang Armenya, Aserbayan, Heorhiya, at ang mga bahagi ng Iraq, Jordan, Siria, Turkiya, at Ukranya na nasa labas ng mga limitasyong ito.

Ang Australya ang naging unang bansang walang brodkaster na aktibong miyembro ng EBU na sumali sa kompetisyon, kasunod ng imbitasyon ng reference group ng paligsahan sa associate member na Special Broadcasting Service (SBS) bago ang ika-60 edisyon ng paligsahan noong 2015. Sa simula ay inanunsyo bilang isang "one-off" para sa edisyon ng anibersaryo, ang SBS ay inimbitahan muli nang sumunod na taon at kalaunan ay lumahok bawat taon mula noon. Ang Australya rin ang tanging bansa mula sa labas ng EBA na lumahok.

Ang mga miyembro ng EBU na nagnanais na lumahok ay dapat tumupad sa mga kundisyon na nakasaad sa mga patakaran ng paligsahan, na ang isang hiwalay na kopya ay binabago taun-taon. Hanggang 44 na bansa ang maaaring lumahok sa anumang isang paligsahan. Dapat na nabayaran na ng mga brodkaster ang EBU ng bayad sa paglahok bago ang itinakdang deadline sa mga patakaran para sa taon kung kailan nila nais lumahok; ang bayad na ito ay iba para sa bawat bansa batay sa laki at bilang ng manonood nito.

Sumali sa kompetisyon kahit isang beses ang mga brodkaster mula sa limampu't dalawang bansa. Ang mga bansang ito ay nakalista rito kasama ng taon kung kailan sila unang lumabas:

Taon	Mga bansa sa unang partisipasyon
1956	Alemanya, Belhika, Italya, Luxembourg, Nederlandiya, Pransiya, Suwisa
1957	Austria, Dinamarka, Reyno Unido
1958	Suwesya
1959	Mónako
1960	Noruwega
1961	Espanya, Pinlandiya, Yugoslavia
1964	Portugal
1965	Irlanda
1971	Malta
1973	Israel
1974	Gresya
1975	Turkiya
1980	Maruekos
1981	Tsipre
1986	Islandiya
1993	Bosniya at Herzegovina, Eslobenya, Kroasya
1994	Eslobakya, Estonia, Litwanya, Polonya, Rumanya, Rusya, Unggriya
1998	Hilagang Masedonya
2000	Letonya
2003	Ukranya
2004	Albanya, Andorra, Biyelorusya, Serbiya at Montenegro
2005	Bulgarya, Moldabya
2006	Armenya
2007	Heorhiya, Montenegro, Serbiya, Tsekya
2008	Aserbayan, San Marino
2015	Australya

Mga istatistika ayon sa bansa

  Hindi aktibo – mga bansang lumahok noon ngunit hindi sumali sa pinakahuling paligsahan, o hindi sasali sa paparating na paligsahan

  Hindi maaaring sumali – mga bansa kung saan hindi na miyembro ng EBU ang brodkaster at samakatuwid ay hindi na maaaring lumahok

  Dating bansa – mga bansang lumahok noon ngunit wala na ngayon.

Bansa	Brodkaster	Taon ng pasinaya	Kamakailang pakikilahok	Bilang ng entry	Pinakamahusay na puwesto
					Ranggo	(Mga) taon
Albanya	RTSH	2004	2026	21	5	2012
Alemanya	ARD (SWR)	1956	2026	68	1	1982, 2010
Andorra	RTVA	2004	2009	6	12 (SF1)	2007
Armenya	AMPTV	2006	2026	17	4	2014
Aserbayan	İTV	2008	2026	17	1	2011
Australya	SBS	2015	2026	10	2	2016
Austria	ORF	1957	2026	57	1	1966, 2014, 2025
Belhika	RTBF VRT	1956	2026	66	1	1986
Biyelorusya	BTRC	2004	2019	16	6	2007
Bosniya at Herzegovina	BHRT	1993	2016	19	3	2006
Bulgarya	BNT	2005	2026	14	2	2017
Dinamarka	DR	1957	2026	53	1	1963, 2000, 2013
Eslobakya	RTVS	1994	2012	7	18	1996
Eslobenya	RTVSLO	1993	2025	30	7	1995, 2001
Espanya	RTVE	1961	2025	64	1	1968, 1969
Estonya	ERR	1994	2026	30	1	2001
Gresya	ERT	1974	2026	45	1	2005
Heorhiya	GPB	2007	2026	17	9	2010, 2011
Hilagang Masedonya	MRT	1998	2022	21	7	2019
Irlanda	RTÉ	1965	2025	58	1	1970, 1980, 1987, 1992, 1993, 1994, 1996
Islandiya	RÚV	1986	2025	37	2	1999, 2009
Israel	IPBC	1973	2026	47	1	1978, 1979, 1998, 2018
Italya	RAI	1956	2026	50	1	1964, 1990, 2021
Kroasya	HRT	1992	2026	30	2	2024
Letonya	LSM	2000	2026	25	1	2002
Litwanya	LRT	1994	2026	25	6	2006
Luxembourg	RTL	1956	2026	39	1	1961, 1965, 1972, 1973, 1983
Malta	PBS	1971	2026	37	2	2002, 2005
Maruekos	RTM	1980		1	18	1980
Moldabya	TRM	2005	2026	19	3	2017
Mónako	TMC	1959	2006	24	1	1971
Montenegro	RTCG	2007	2026	13	13	2015
Nederlandiya	AVROTROS	1956	2025	65	1	1957, 1959, 1969, 1975, 2019
Noruwega	NRK	1960	2026	63	1	1985, 1995, 2009
Pinlandiya	Yle	1961	2026	58	1	2006
Polonya	TVP	1994	2026	27	2	1994
Portugal	RTP	1964	2026	56	1	2017
Pransiya	France Télévisions	1956	2026	67	1	1958, 1960, 1962, 1969, 1977
Reyno Unido	BBC	1957	2026	67	1	1967, 1969, 1976, 1981, 1997
Rumanya	TVR	1994	2026	23	3	2005, 2010
Rusya	VGTRK Channel One	1994	2021	23	1	2008
San Marino	SMRTV	2008	2026	15	19	2019
Serbiya	RTS	2007	2026	17	1	2007
Serbiya at Montenegro	UJRT	2004	2005	2	2	2004
Suwesya	SVT	1958	2026	64	1	1974, 1984, 1991, 1999, 2012, 2015, 2023
Suwisa	SRG SSR	1956	2026	65	1	1956, 1988, 2024
Tsekya	ČT	2007	2026	13	6	2018
Tsipre	CyBC	1981	2026	41	2	2018
Turkiya	TRT	1975	2012	34	1	2003
Unggriya	MTVA	1994	2019	17	4	1994
Ukranya	Suspilne	2003	2026	20	1	2004, 2016, 2022
Yugoslavia	JRT	1961	1992	27	1	1989

Mga potensyal na kalahok

Kasalukuyang miyembro ng EBU

Sa taong 2025, ang mga sumusunod na brodkaster ay hindi pa lumahok sa paligsahan, kahit na maaari silang sumali bilang kasalukuyang miyembro ng EBU:

• Arhelya – ERNS, EPTV, TDA
• Ehipto – ERTU
• Jordan – JRTV
• Libano – Télé Liban
• Libya – LNC
• Lungsod ng Vaticano – Vatican Radio
• Tunisia – Radio Tunisienne, Télévision Tunisienne

Noong 1977, ang dating brodkaster ng Tunisia na ERTT ay nakatakdang lumahok at magtanghal sa ika-4 na posisyon sa paligsahan, ngunit kalaunan ay umatras nang walang ibinigay na dahilan.

Noong 2005, ang brodkaster ng Lebanon na Télé Liban ay nakatakdang lumahok sa semi-final sa pamamagitan ng kantang "Quand tout s'enfuit" ni Aline Lahoud. Gayunpaman, umatras ang bansa noong Marso 2005 dahil sa batas ng Lebanon na naghihigpit sa pagpapalabas ng mga programa sa television na may nilalamang Israeli, kung saan nakatakda ring lumahok ang Israel sa semi-final. Kasunod ng tatlong-taong pagbabawal sa paligsahang dulot ng huling pag-atras, hindi na muling sumubok ang Télé Liban na sumali mula noon.

Iba pang mga bansa

Bansa	Posibleng brodkaster	Detalye
Canada	CBC/Radio-Canada	Sinuri ng brodkaster ng Canada na Canadian Broadcasting Corporation (CBC/Radio-Canada; na miyembrong associate ng EBU) ang pagsali ng Canada sa paligsahan matapos ito bigyan ng dagdag na pondo ng $150 milyon sa ilalim ng Pederal na badyet ng Canada para sa 2025. Gayunpaman, kinumpirma ng EBU na hindi sasali ang bansa sa 2026.
Eskosya	SBS	Isa sa mga polisiya sa ilalim ng Scotland's Future (isang puting papel na nagtatakda ng balangkas para sa isang malayang Eskosya kung sakaling bumoto ng "oo" ang mga botante sa reperendum para sa kalayaan ng Eskosya mula sa Reyno Unido noong 2014) ang pagpapalit sa BBC Scotland ng isang Scottish Broadcasting Service (SBS) na may planong maging miyembro ng EBU at lumahok sa paligsahan. Ngunit hindi ito natupad dahil maraming botante ang bumoto na manatili ang Eskosya sa Reyno Unido, na lumalahok sa paligsahan, at samakatwid, nanatili sa BBC ang eksklusibong karapatan na irepresenta ang buong Reyno Unido sa kompetisyon, kabilang ang Eskosya.
Gales	BBC Cymru Wales S4C	Noong 1969, inilunsad ng BBC Cymru Wales ang Cân i Gymru bilang isang programa ng pagpili para sa paligsahan, na nagtatampok ng mga kantang itatanghal sa wikang Gales. Gayunpaman, napagpasyahan na ang BBC ay magpapatuloy sa pagpapadala ng isang lahok para sa buong Reyno Unido. Sa kabila nito, pinapalabas pa rin taon-taon ang programa, na ginagamit ngayon upang piliin ang kalahok ng Gales para sa Pan Celtic Festival. Gayunpaman, ang bansa ay lumahok sa Paligsahang Pang-awitin ng Eurovision para sa mga Bata mula 2018 hanggang 2019 sa pamamagitan ng brodkaster na S4C (na aktibong miyembro ng EBU sa ilalim ng United Kingdom Independent Broadcasting o UKIB).
Gibraltar	GBC	Simula 2006, sinusubukan ng brodkaster ng Gibraltar na GBC na maging miyembro ng EBU at lumahok sa paligsahan nang nakapag-iisa. Ngunit hindi ito makukuha dahil na rin sa katayuan nito bilang British Overseas Territory na hindi malaya mula sa Reyno Unido, na lumalahok sa paligsahan.
Groenlandiya	KNR	Simula 2011, sinusubukan ng brodkaster ng Groenlandiya na KNR na maging miyembro ng EBU at lumahok sa paligsahan nang nakapag-iisa. Ngunit hindi ito makukuha dahil na rin sa katayuan nito bilang awtonomong bansa ng Dinamarka, na lumalahok sa paligsahan.
Kapuluang Peroe	KVF	Simula 2010, sinusubukan ng brodkaster ng Kapuluang Peroe na KVF na maging miyembro ng EBU at lumahok sa paligsahan nang nakapag-iisa. Ngunit hindi ito makukuha dahil na rin sa katayuan ng mga isla bilang isang awtonomong teritoryo ng Dinamarka, na lumalahok sa paligsahan.
Kasakistan	Khabar Agency	Simula 2015, sinusubukan ng brodkaster ng Kasakistan na Khabar Agency na lumahok sa paligsahan. Ngunit hindi maaaring lumahok ang Kasakistan sa ilalim ng kasalukuyang mga patakaran ng paligsahan dahil ang bansa ay nasa labas ng European Broadcasting Area. Gayunpaman, ang bansa ay lumahok sa Paligsahang Pang-awitin ng Eurovision para sa mga Bata mula 2018 hanggang 2023.
Kosovo	RTK	Sinusubukan ng brodkaster ng Kosovo na RTK na maging miyembro ng EBU at lumahok sa paligsahan. Ngunit hindi ito makukuha dahil hindi ito miyembro ng Nagkakaisang Bansa at ng International Telecommunication Union. Sa kabila nito, ginawa ng RTK ang Festivali i Këngës, isang paligsahan ng kanta na may pangmatagalang layunin na gamitin ito bilang pambansang seleksyon ng Kosovo para sa Eurovision sa hinaharap.
Liechtenstein	1FLTV Radio Liechtenstein	Sa kabila ng mahabang kasaysayan ng bansa sa paligsahan, sinusubukan ng Liechtenstein na lumahok sa paligsahan. Isang kalahok para sa bansa ang napili noong 1976, ngunit tinanggihan ito dahil sa kawalan ng bansa ng isang pambansang network. Simula 2008, sinusubukan ng brodkaster na 1FLTV na maging miyembro ng EBU para lumahok. Gayunpaman, ang kanilang mga plano ay hindi kailanman natupad, pangunahin na dahil sa mga kadahilanang pangbadyet. Sinubukan rin ito ng Radio Liechtenstein para sa 2025, ngunit hindi ito nagawa, pangunahin dahil sa katayuan nito bilang istasyon ng radyo at ang tuluyang pagsasara nito noong Abril 2025.
Qatar	Qatar Radio	Dahil sa katayuan nito bilang miyembrong associate ng EBU, sinusubukan ng brodkaster ng Qatar na Qatar Radio na maging aktibong miyembro ng organisasyon at lumahok sa paligsahan. Ngunit hindi ito nagawa sa ilalim ng kasalukuyang mga patakaran ng paligsahan dahil ang bansa ay nasa labas ng European Broadcasting Area at hindi ito maaaring maging miyembro ng Council ng Europe, pati na rin ang katayuan nito bilang istasyon ng radyo.
Tsina	Hunan TV	Matapos ang kanilang matagumpay na pagsasahimpawid ng Eurovision noong 2015, itinanggi ng EBU na sasali ang Tsina sa paligsahan. Kamakailan lamang, tinapos ng EBU ang partnership nito sa Mango TV (isang streaming service na pagmamay-ari ng Hunan TV) dahil sa pagsensura nito sa mga piling pagtatanghal sa unang semi-final ng kompetisyon noong 2018, gaya ng mga tattoo at ilang mga pagtukoy sa LGBTQ.
Unyong Sobyetiko	CT USSR	Sa kabila ng ilang pagtatangkang sumali sa paligsahan noong dekada 1980 at ng pagpapalabas nito ng brodkaster ng Unyong Sobyetiko na CT USSR, hindi kailanman lumahok sa kompetisyon ang bansa bago pa ito nabuwag. Sa kabila nito, ilang mga dating republika ng Sobyet na nasa Europa (maliban sa Kasakistan) ang lumahok sa paligsahan matapos makamit ang kalayaan, tulad ng Rusya, Estonya, Litwanya, Letonya, Ukranya, Biyelorusya, Moldabya, Armenya, Heorhiya at Aserbayan.

Pakikilahok ng mga Pilipino

Unang ipinalabas ang Paligsahang Pang-awitin ng Eurovision sa telebisyon sa Pilipinas noong 1972. Simula 2017, live na na-stream ang paligsahan sa buong mundo (kabilang ang Pilipinas) sa pamamagitan ng YouTube.

Ang mga mang-aawit na ito na lumahok sa paligsahan ay may lahing Pilipino:

• Vincent Bueno − dapat na kakatawan para sa Austria noong 2020 sa pamamagitan ng kantang "Alive" bago pa na-kansela ang kompetisyon. Kinatawan pa rin niya ang Austria sa sumunod na taon sa pamamagitan ng kantang "Amen", ngunit hindi ito nakapasok sa finals (anak siya ng mga imigrante na Pilipino at Ilokano).
• Montaigne − dapat na kakatawan para sa Australya noong 2020 sa pamamagitan ng kantang "Don't Break Me" bago pa na-kansela ang kompetisyon. Kinatawan pa rin niya ang Austria sa sumunod na taon sa pamamagitan ng kantang "Technicolour", ngunit hindi ito nakapasok sa finals (siya ay may halong lahing Pilipino).
• Sheldon Riley − kumatawan sa Australya noong 2022 sa pamamagitan ng kantang "Not the Same". Nakapasok siya sa finals, kung saan nakatapos siya sa ika-15 na puwesto na may 125 puntos (anak siya ng Pilipino na ama).
• JJ − kumatawan sa Austria noong 2025 sa pamamagitan ng kantang "Wasted Love". Nakapasok siya sa finals, kung saan nanalo siya sa kompetisyon na may 436 puntos (anak siya ng Pilipino na ina).

Tignan din

• American Song Contest, isang adaptasyon ng paligsahan para sa 50 estado at territoryo ng Estados Unidos
• Paligsahang Pang-awitin ng Eurovision para sa mga Bata, isang bersyon ng paligsahan para sa mga batang mang-aawit at tagapagtanghal
• Paligsahang Pang-awitin ng Eurovision sa Asya, isang adaptasyon ng paligsahan para sa Asya-Pasipiko

Kawing na panlabas

• Inglescode: na-promote ang eng sa code: en : Websayt ng Eurovision
• Turkocode: na-promote ang tur sa code: tr : Websayt ng Eurovision sa wikang Turko Naka-arkibo 2009-02-18 sa Wayback Machine.