Pumunta sa nilalaman

Harry Potter and the Deathly Hallows

Mula sa Wikipedia, ang malayang ensiklopedya
Harry Potter and the Deathly Hallows
Disenyo ng pabalat ng orihinal na edisyon sa Reyno Unido
May-akdaJ. K. Rowling
IlustrasyonJason Cockcroft (unang edisyon)
BansaReyno Unido
WikaIngles
SeryeHarry Potter
Bilang ng paglabas
ika-7 sa seryo
DyanraPantasya
TagapaglathalaBloomsbury (Reyno Unido)
Petsa ng paglathala
21 Hulyo 2007; 19 taon na'ng nakalipas (2007-07-21)
Mga pahina607 (unang edisyon)
ISBN0-7475-9105-9
Sumunod saHarry Potter and the Half-Blood Prince 

Ang Harry Potter and the Deathly Hallows ay isang nobelang pantasiya ng may-akdang Britaniko na si J. K. Rowling. Ito ang ikapito at huling nobela sa seryeng Harry Potter. Inilathala ito noong 21 Hulyo 2007 sa Reyno Unido ng Bloomsbury Publishing, sa Estados Unidos ng Scholastic, at sa Canada ng Raincoast Books. Isinasalaysay ng nobela ang mga pangyayaring naganap kaagad matapos ang Harry Potter and the Half-Blood Prince (2005), gayundin ang huling paghaharap ng dalawang salamangkero na sina Harry Potter at Lord Voldemort.

Nang mailathala ang Deathly Hallows, nabasag nito ang mga rekord sa benta at nalampasan ang mga naitalang benta ng mga naunang aklat sa seryeng Harry Potter. Hawak nito ang Pandaigdaigang Tala ng Guinness para sa pinakamaraming nobelang naibenta sa loob ng 24 oras mula sa paglalathala, na may 8.3 milyong sipi sa Estados Unidos at 2.65 milyong sipi sa Reyno Unido.[1][2] Sa pangkalahatan ay positibo ang pagtanggap sa aklat, at kinilala ito ng American Library Association (Asosasyon ng Aklatang Amerikano) bilang isa sa mga "Mga Pinakamahusay ng Aklat para sa mga Batang Adulto". Ang adaptasyong pampelikula ng nobela ay ipinalabas sa dalawang bahagi: Harry Potter and the Deathly Hallows – Part 1 noong Nobyembre 2010 at Harry Potter and the Deathly Hallows – Part 2 noong Hulyo 2011.

Balangkas

[baguhin | baguhin ang wikitext]

Ang batang mangkukulam na si Harry Potter ay malapit nang maglabimpitong taong gulang. Habang inihahatid siya ng mga kasapi ng Orden ng Phoenix patungo sa Burrow, sinalakay sila ng mga Death Eater, na ikinamatay nina "Mad-Eye" Moody at Hedwig, at ikinasugat ni George Weasley. Tinangka ni Lord Voldemort na patayin si Harry subalit nabigo.

Matapos maagaw ng mga Death Eater at ni Voldemort ang Ministry of Magic, sinimulan nina Harry at ng kanyang mga kaibigan na sina Ron Weasley at Hermione Granger ang paghahanap sa apat na natitirang Horcrux ni Voldemort upang wasakin ang mga ito at gawing mortal si Voldemort. Nalaman nilang nasa pag-iingat ni Dolores Umbridge sa Ministeryo ng Mahika ang Horcrux na kuwintas (locket). Palihim na nakapasok sina Harry at ang kanyang mga kaibigan sa ministeryo at ninakaw ang kuwintas mula kay Umbridge, subalit hindi nila ito nagawang wasakin. Naapektuhan si Ron ng maitim na mahika ng kuwintas kaya iniwan niya sina Harry at Hermione. Sa Godric's Hollow, sinalakay sina Harry at Hermione ng ahas ni Voldemort na si Nagini, subalit nakatakas sila. Isang gabi, ginabayan si Harry ng isang Patronus patungo sa isang lawa na kinalalagyan ng Espada ni Gryffindor. Habang kinukuha niya ito, humigpit ang kuwintas sa kaniyang leeg at muntik na siyang malunod. Dumating si Ron, iniligtas si Harry, at winasak ang Horcrux gamit ang espada.

Dinalaw ng tatlong magkakaibigan si Xenophilius Lovegood, na nagsalaysay sa kanila tungkol sa mga maalamat na bagay na kilala bilang Deathly Hallows: ang Matandang Wand (Elder Wand), ang Bato ng Muling Pagkabuhay (Resurrection Stone), at ang Balabal ng Kawalang-Kita (Cloak of Invisibility). Gayunman, ipinaalam ni Xenophilius sa Ministeryo ng Mahika na nasa kaniyang bahay ang tatlo, kaya napilitang tumakas sina Harry at ang kaniyang mga kaibigan. Hindi naglaon, nabihag sila ng mga mangangaso ng mga pugante na kilala bilang mga Snatcher, at ikinulong sa Malfoy Manor. Itinapon sina Harry at Ron sa piitan kasama sina Dean Thomas, Luna Lovegood, G. Ollivander, at ang duwendeng si Griphook, samantalang pinahirapan ng Death Eater na si Bellatrix Lestrange si Hermione. Tinulungan sila ng duwendeng-bahay na si Dobby na makatakas, ngunit namatay ito sa proseso.

Pinasok nina Harry, Ron, at Hermione ang Bangko ng Gringotts at nakuha ang isa pang Horcrux. Nagkaroon si Harry ng mga pangitain na nagsasabing may isa pang Horcrux na nakatago sa Hogwarts. Matapos makapasok ang tatlo sa paaralan sa tulong ni Aberforth Dumbledore, naghanda si Voldemort sa paglusob sa kastilyo. Habang nakikipaglaban ang mga Death Eater sa mga guro at mag-aaral, winasak nina Ron at Hermione ang Horcrux mula sa Gringotts. Pagkatapos, sinamahan nila si Harry sa Silid ng Pangangailangan, kung saan natagpuan nila ang susunod na Horcrux, ang Diadema ni Ravenclaw. Tinambangan sila ni Draco Malfoy at ng mga kaibigan nitong sina Crabbe at Goyle. Gumamit si Crabbe ng isang sumpang apoy na hindi na niya nakontrol, kaya namatay siya at nawasak din ang Horcrux.

Matapos nakawin ang Matandang Wand mula sa libingan ni Albus Dumbledore, nabigo si Voldemort na mapasunod ito. Sa paniniwalang si Severus Snape ang tunay na may-ari ng wand, ipinagamit niya kay Nagini ang nakamamatay na pag-atake laban kay Snape. Bago mamatay, ipinasa ni Snape kay Harry ang kaniyang mga alaala, na pinanood ni Harry sa Pensieve. Inihayag ng mga alaala na minahal ni Snape ang ina ni Harry at nagsilbi siyang dobleng ahente laban kay Voldemort upang maprotektahan ito. Nabunyag din na si Dumbledore mismo ang nagplano ng sarili niyang kamatayan sa kamay ni Snape upang makuha nito ang tiwala ni Voldemort. Nalaman din ni Harry na siya mismo ay naging isang Horcrux nang unang tangkain ni Voldemort na patayin siya. Dahil dito, kailangang mamatay si Harry upang maging mortal si Voldemort. Bago niya isuko ang sarili kay Voldemort, inutusan niya si Neville Longbottom na patayin si Nagini.

Ginamitan ni Voldemort si Harry ng Sumpang Pampatay (Killing Curse), at nagising si Harry sa isang tila panaginip na lugar. Sinalubong siya roon ni Dumbledore, na nagpaliwanag na winasak ng sumpa ang bahagi ng kaluluwa ni Voldemort na nasa loob ni Harry at maaari na siyang mabuhay muli. Nagkamalay si Harry at nagpanggap na patay. Inutusan ni Voldemort si Hagrid na dalhin ang katawan ni Harry pabalik sa Hogwarts at hiniling na sumuko ang mga guro at mag-aaral. Subalit binunot ni Neville ang Espada ni Gryffindor mula sa Sumbrerong Pampag-uuri at pinatay si Nagini. Nagpatuloy ang labanan, kung saan napatay ni Molly Weasley si Bellatrix. Pagkatapos ay nagpakita si Harry na buhay pa at hinarap si Voldemort sa isang tunggalian. Muli siyang ginamitan ni Voldemort ng Sumpang Pampatay, subalit tumanggi ang Matandang Wand na patayin si Harry sapagkat siya ang tunay nitong amo. Bumalik ang sumpa kay Voldemort at ito ang naging sanhi ng kaniyang kamatayan.

Sa epilogo ng nobela, na nagaganap makalipas ang labinsiyam na taon, inihatid nina Harry at ng kaniyang mga kaibigan ang kanilang mga anak sa Hogwarts. Sina Harry at Ginny, na mag-asawa na, ay may tatlong anak: James Sirius, Albus Severus, at Lily Luna. Samantala, sina Ron at Hermione ay may isang anak na babae na nagngangalang Rose at isang anak na lalaki na nagngangalang Hugo.[3]

Pangkalahatang impormasyon

[baguhin | baguhin ang wikitext]

Serye

[baguhin | baguhin ang wikitext]

Ang unang nobela sa seryeng Harry Potter, ang Harry Potter and the Philosopher's Stone, ay inilathala ng Bloomsbury Publishing noong 1997.[4] Sinundan ito ng Chamber of Secrets (1998), Prisoner of Azkaban (1999), Goblet of Fire (2000), Order of the Phoenix (2003), at Half-Blood Prince (2005).[a]

Pamagat

[baguhin | baguhin ang wikitext]

Ang pamagat ng nobela ay tumutukoy sa tatlong maalamat na bagay na tampok sa kuwento, na sama-samang kilala bilang ang Mga Nakamamatay na Relikya (Deathly Hallows). Inihayag ni Rowling ang pamagat noong Disyembre 2006 sa pamamagitan ng isang larong bitayan (hangman) na may temang Pasko sa kaniyang websayt. Kabilang sa iba pang mga pamagat na isinaalang-alang ni Rowling ang Harry Potter and the Elder Wand at Harry Potter and the Peverell Quest.

Pagsusulat

[baguhin | baguhin ang wikitext]

Natapos ni J. K. Rowling ang nobela noong Enero 2007 habang nananatili sa Otel ng Balmoral sa Edinburgh.[10] Sa isang pahayag sa kaniyang websayt sinabi niya, "Hindi pa ako kailanman nakadama ng ganito katinding halo ng damdamin sa buong buhay ko; hindi ko inakalang maaari akong makadama nang sabay ng matinding dalamhati at matinding kagalakan." Inihambing niya ang magkahalong damdaming iyon sa ipinahayag ni Charles Dickens sa paunang salita ng edisyong 1850 ng David Copperfield, kung saan tinawag niya itong "isang dalawang-taong gawaing bunga ng guniguni". Dagdag pa ni Rowling, "Ang masasabi ko lamang ay, subukan mo ang labimpitong taon, Charles." Tinapos niya ang kaniyang mensahe sa pagsasabing, "Deathly Hallows ang paborito kong aklat, at iyon ang pinakamainam na paraan upang tapusin ang serye."[11]

Nang tanungin siya bago mailathala ang aklat tungkol sa nalalapit nitong paglalabas, sinabi ni Rowling na hindi na niya mababago ang wakas kahit na gugustuhin niya. "Napakatagal nang pinlano ang mga aklat na ito, at sa loob ng anim na aklat ay iisa na ang direksiyong tinatahak ng mga ito. Kaya talagang hindi ko na ito mababago."[12] Sinabi rin niya na ang huling tomo ay may napakalapit na kaugnayan sa naunang aklat sa serye, Harry Potter and the Half-Blood Prince, "na para bang dalawang kalahati sila ng iisang nobela".[13] Ayon pa sa kaniya, naisulat na niya ang huling kabanata ng Deathly Hallows noong bandang 1990 bilang bahagi ng kaniyang pinakaunang mga isinulat para sa serye.[14] Ibinunyag din niya na ang orihinal na huling pangungusap ay katulad ng, "Tanging ang mga minahal niya ang makakakita sa kaniyang peklat na hugis kidlat." Pinalitan niya ito ng "Maayos ang lahat" (All was well) upang maging malinaw na nagtagumpay si Harry Potter laban kay Lord Voldemort at hindi na niya ito muling haharapin.[15][16]

Mga pananda

[baguhin | baguhin ang wikitext]
  1. ↑ Iniugnay sa maraming sanggunian:
    [5][6][7][8][9]

Mga sanggunian

[baguhin | baguhin ang wikitext]
  1. ↑ Rich, Motoko (22 July 2007). "Record First-Day Sales for Last 'Harry Potter' Book". The New York Times (sa wikang Ingles). Inarkibo mula sa orihinal noong 16 Disyembre 2017. Nakuha noong 15 Disyembre 2017.
  2. ↑ "Fastest selling book of fiction in 24 hours". Guinness Book of World Records (sa wikang Ingles). 21 Hulyo 2007. Inarkibo mula sa orihinal noong 19 Setyembre 2011. Nakuha noong 5 Pebrero 2011.
  3. ↑ Rowling, J. K. (2007). Bloomsbury (pat.). Harry Potter and the Deathly Hallows (Book 7) (Hardcover) (sa wikang Ingles). London. ISBN 978-0-7475-9105-4.{{cite book}}: CS1 maint: location missing publisher (link)
  4. ↑ "The Potter phenomenon" (sa wikang Ingles). BBC News. 18 Pebrero 2003. Inarkibo mula sa orihinal noong 23 Nobyembre 2008. Nakuha noong 27 Setyembre 2008.
  5. ↑ Cassy, John (16 Enero 2003). "Harry Potter and the hottest day of summer". The Guardian (sa wikang Ingles). UK. Inarkibo mula sa orihinal noong 31 Disyembre 2013. Nakuha noong 27 Setyembre 2008.
  6. ↑ "Speed-reading after lights out". The Guardian (sa wikang Ingles). UK. 19 Hulyo 2000. Inarkibo mula sa orihinal noong 31 December 2013. Nakuha noong 27 Setyembre 2008.
  7. ↑ "A Potter timeline for muggles". Toronto Star (sa wikang Ingles). 14 Hulyo 2007. Inarkibo mula sa orihinal noong 20 Disyembre 2008. Nakuha noong 27 Setyembre 2008.
  8. ↑ "July date for Harry Potter book". BBC News (sa wikang Ingles). 21 Disyembre 2004. Inarkibo mula sa orihinal noong 5 Hulyo 2009. Nakuha noong 27 Setyembre 2008.
  9. ↑ "Harry Potter finale sales hit 11m". BBC News (sa wikang Ingles). 23 Hulyo 2007. Inarkibo mula sa orihinal noong 28 Nobyembre 2008. Nakuha noong 21 Agosto 2008.
  10. ↑ "Harry Potter fans pay £1,000 a night to stay in hotel room where JK Rowling finished series" (sa wikang Ingles). UK. 20 Hulyo 2008. Inarkibo mula sa orihinal noong 20 Pebrero 2016. Nakuha noong 10 Pebrero 2016.
  11. ↑ "Rowling reacts to Potter's end". USA Today (sa wikang Ingles). Associated Press. 6 Pebrero 2007. Inarkibo mula sa orihinal noong 23 Agosto 2007. Nakuha noong 21 Hulyo 2007.
  12. ↑ "Jones, Owen. One-on-one interview with J.K. Rowling, ITV Network July 17, 2005" (sa wikang Ingles). ITV. 17 Hulyo 2005. Inarkibo mula sa orihinal noong 29 Hunyo 2007. Nakuha noong 16 Hunyo 2007.
  13. ↑ Rowling, J. K. (15 Marso 2004). "Progress on Book Six" (sa wikang Ingles). J. K. Rowling Official Site. Inarkibo mula sa orihinal noong 16 Disyembre 2006. Nakuha noong 23 Disyembre 2006.
  14. ↑ "Rowling to kill two in final book" (sa wikang Ingles). BBC News. 27 Hunyo 2006. Inarkibo mula sa orihinal noong 3 Agosto 2009. Nakuha noong 25 Hulyo 2007.
  15. ↑ Vieira, Meredith (30 Hulyo 2007). "Harry Potter: The final chapter" (sa wikang Ingles). NBC News. Inarkibo mula sa orihinal noong 26 Hulyo 2019. Nakuha noong 6 Pebrero 2011.
  16. ↑ Symon, Evan V. (14 Enero 2013). "10 Deleted Chapters that Transformed Famous Books". listverse.com (sa wikang Ingles). Inarkibo mula sa orihinal noong 5 Setyembre 2015.
Nagmula sa "https://tl.wikipedia.org/w/index.php?title=Harry_Potter_and_the_Deathly_Hallows&oldid=2217358"