Badminton

Si Peter Gade, isang manlalaro ng badminton sa Olympics na nagmula sa bansang Dinamarka.

Ang badminton ay isang uri ng palakasan na ginagamitan ng raketa. Ito ay maaaring laruin ng dalawang magkalabang manlalaro (isahan) o kaya ng dalawang magkalabang pares (paresan), kung saan sakop ng isang manlalaro o pares ng manlalaro ang kalahati ng isang parisukat na palaruan. Ito ay paghihiwalayin ng isang lambat (net). Ang isang panig ay makakapagkamit ng puntos sa pamamagitan ng paghataw ng shuttlecock gamit ang raketa, patawirin sa ibabaw ng net at pabagsakin ito sa sahig ng kalabang panig. Ang isang rally ay natatapos kapag ang shuttlecock ay bumagsak sa sahig, at ito ay kailangang paluin ng isang (1) beses lamang ng bawat panig bago ito lumagpas sa net.

Ang shuttlecock (o shuttle) ay uri ng bola na nagtataglay ng kakaibang katangian na erodinamiko. Ito ay dahil sa labing-anim na balahibong maayos na nakasuksok sa paligid nito na nagbibigay ng mataas na hila ng hangin kung saan ito ay mabilis na bumabagal kumpara sa ibang bola. May kakayanan din ito na umabot sa pinakasukdulang bilis nito kumpara sa ibang palakasan sa parehas na kategorya. Dahil ang lipad ng shuttle ay lubusang naaapektuhan ng hangin, ang badminton ay kadalasang ginaganap sa isang saradong palaruan. Maaari din itong laruin sa labas katulad ng isang hardin o sa aplaya, ngunit ito ay hindi opisyal bagkus pangkasiyahan o pampamilya lamang.

Mula noong 1992, ang badminton ay ibinilang bilang larong olimpiko at ito ay mayroong limang kaganapan: lalaki at babaeng isahan, lalaki at babaeng paresan at magkahalong pares, kung saan ang isang pares ay binubuo ng isang lalaki at isang babae. Sa isang mataas na antas ng paglalaro, ang palarong ito ay nangangailangan ng atletang lakas, liksi at kahustuhan. Dahil sa bilis na taglay ng shuttle, nangangailangan din ito ng maayos at tamang koordinasyon ng iba't ibang parte ng katawan tulad ng mata, binti at paa, braso at kamay.

Sanggunian

Ang lathalaing ito na tungkol sa Palakasan ay isang usbong. Makatutulong ka sa Wikipedia sa pagpapalawig nito.