Aklat-pampaaralan

Mula sa Wikipedia, ang malayang ensiklopedya

Ang aklat-pampaaralan o aklat-aralin (Aleman: Lehrbuch, Pranses: manuel scolaire, Kastila: libro de texto, Ingles: textbook o coursebook) ay isang manwal o aklat ng mga pagtuturo, direksiyon, paggamit, krokis, aral, aralin, tagubilin, o mga pag-iwi sa anumang mga sangay ng pag-aaral. Ang mga aklat-aralin ay nililikha ayon sa pangangailangan ng mga institusyong pang-edukasyon. Bagaman ang karamihan ng mga aklat-pampaaralan ay inilalathala lamang na nasa anyong nakalimbag, marami na sa ngayon ang makukuha mula sa Internet bilang mga e-book o elektronikong mga aklat at dumarami, bagaman labag sa batas, na nasa pormatong ini-scan na nasa mga network na nagsasalu-salo ng mga talaksan.

Ang aklat-pampaaralan ay isang aklat na ginagamit para sa pag-aaral ng isang paksa. Ginagamit ito ng mga tao upang makaalam ng mga katotohanan at mga pamamaraan na patungkol sa isang partikular na paksa. Kung minsan, ang mga aklat-aralin ay mayroong mga tanong upang masubukan ang kaalaman at pagkaunawa ng isang nag-aaral.

Ang aklat panggawain o aklat-sanayan (Aleman: Arbeitsmappe, Ingles: workbook) ay isang uri ng aklat-aralin na mayroon lamang ng mga nilalamang katanungan at mga ehersisyo. Idinisenyo ang mga aklat-gawain o aklat na pangsanay hindi upang makapagturo subalit upang makapagbigay ng pagsasanay at upang mabigyan ng diin ang mga pook na nangangailangan ng mas dagdag na pagkatuto o pag-aaral. Ang gabay sa rebisyon (Ingles: revision guide) ay isang uri ng aklat-aralin na ginagamit upang ipaalala sa nag-aaral ang hinggil sa paksa at bigyan siya ng karagdagang pagsasanay, natatangi na sa panahon bago sumapit ang araw ng isang pagsusulit o eksaminasyon.

Ang aklat-pampaaralan ay maaaring ipahiram ng mga paaralan sa kanilang mga mag-aaral bilang patnubay nila sa isang kursong itinuturo ng paaralan. Kung minsan, natatangi na ang sa pamantasan, ang mga estudyante ay kailangang bumili ng mga aklat-aralin na kailangan nila o kaya ay humiram mula sa isang aklatan.

Wiktionary
Wiktionary
Tingnan ang Aklat-pampaaralan sa
Wiktionary, ang malayang talahulugan.

PanitikanEdukasyon Ang lathalaing ito na tungkol sa Panitikan at Edukasyon ay isang usbong. Makatutulong ka sa Wikipedia sa pagpapalawig nito.