Mazurka Boholana
Ang Mazurka Boholana (bigkas: mah-ZOOR-kah-boh-hoh-LAH-nah, binabaybay din sa maliit na titik: mazurka boholana) ay isang sayaw mula sa lalawigan ng Bohol sa bansang Pilipinas. Tanyag ang sayaw noong panahon ng pananakop ng Kastila sa Pilipinas. Bagaman mula sa Bohol, popular din ang sayaw na ito sa ibang lugar sa Pilipinas. Bukod din sa lugar na pinagmulan, naging ganito ang pangalan ng sayaw dahil sa mga hakbang ng sayaw na ginamit.[1]
Hango ang sayaw sa Mazurka ng Polonya[2] na isang sayawing pambayang Polako para sa mga kumpol na magkatambal na nakabilog, na nakikilala sa pagdabog ng mga paa at paglagitik ng takong at tradisyunal na sinasayaw sa musika ng isang bandang pang-nayon.[3] Bagaman pambansang sayaw sa Polonya ang mazurka, sikat ito noong ika-19 dantaon sa buong Europa at kumalat ito sa mga nakolonya nila. Kaya nadala ito ng mga Kastila sa Pilipinas at nagkaroon ng sariling bersyon sa Pilipinas sa impluwensiyang Kastila.
Kinakategorya mazurka boholana na sayawing Maria Clara dahil ang mga babae ay nakapandamit na parang si Maria Clara na isang pangunahing babaeng karakter sa nobela ng bayaning Pilipino na si Jose Rizal na Noli me tangere.[4] Sikat ang istilo ng pananamit na Maria Clara para sa mga kababaihan noong panahon ng pananakop ng mga Kastila, at patuloy pa rin itong sinusuot sa modernong panahon para sa mga temang Filipiniana o costume (pananamit) tuwing sasayaw ng mga sayawing pambayan. Nakasuot naman ang mga kalalakihan ng barong Tagalog at itim na pantalon.[5] Isa rin ito na tradisyunal na sayaw na pambulwagan.[6]
Tulad ng mazurka na Polako, ang mazurka boholana ay karaniwang sinasayaw ng magkaparehang babae at lalaki. Sinasayaw ito na impormal na nakakalat ang mga magkapareha sa bulwagan sa unang bahagi ng sayaw na walang sinusunod na pagkasunod-sunod na mga hakbang at direksyon.[7] Ang isa pang bersyon ng mazurka sa Pilipinas ay ang mazurka alcamfor.[8]
Naisayaw na ito na iba't ibang pangkat na sumasayaw, kabilang dito ang Bayanihan Philippine Dance Company, at naitampok sa album na Philippine Folk Dance Vol.1.[9] Nairekord din ang musikang "Mazurka Boholana" ng Juan Silos Jr. & His Rondalla na nailabas noong Hunyo 18, 2007.[10]
Mga sanggunian
- ↑ "Philippine Folk Dances". socalfolkdance.org (sa wikang Ingles). Nakuha noong 2025-04-07.
- ↑ Alejandro, Reynaldo G. (2002). Sayaw: Philippine Dances (sa wikang Ingles). Nilathala at ekslusibong pinapamahagi ng National Bookstore, Incorporated at Anvil Pub. ISBN 978-971-27-1168-8.
- ↑ "Mazurka | Polish, Folk, Music | Britannica". www.britannica.com (sa wikang Ingles). Nakuha noong 2025-04-07.
- ↑ "Mazurka Boholana: Philippine Dance". TAGALOG LANG (sa wikang Ingles). 2024-01-18. Nakuha noong 2025-04-07.
- ↑ Aquino, Francisca Reyes (1953). Philippine Folk Dances (sa wikang Ingles). Kayumanggi Press.
- ↑ Reyes-Urtula, Lucrecia; Arandez, Prosperidad (1992). Sayaw: An Essay on the Spanish Influence on Philippine Dance (sa wikang Ingles). Sentrong Pangkultura ng Pilipinas.
- ↑ Mapeh in Action I' 2008 Ed (sa wikang Ingles). Rex Bookstore, Inc. ISBN 978-971-23-5011-5.
- ↑ Alejandro, Reynaldo G. (1972). Sayaw Silangan: The Dance in the Philippines (sa wikang Ingles). Dance Perspectives Foundation.
- ↑ "Mazurka Boholana". Smithsonian Folkways Recordings (sa wikang Ingles). Nakuha noong 2025-04-07.
- ↑ Philippine Folk Dance Vol.1 by Juan Silos Jr. & Rondalla on Apple Music (sa wikang Ingles), 1958-01-01, nakuha noong 2025-04-07