Singaw (sakit)

Para sa ibang mga gamit, tingnan ang Singaw.

Singaw
Ang isang singaw (sa tagpong ito ay kaugnay ng aphthous stomatitis) na nasa ibabaw ng mukosang panglabi (sa saping gumuguhit sa pang-ibabang labi).
Espesyalidad	Gastroenterology

Ang singaw (canker sore) ay ang pagkakaroon ng sugat at paghapdi sa alinmang bahagi ng bibig tulad ng loob ng bibig, gilagid, likuran ng mga labi, at dila. Ang sugat na singaw ay mayroong bilog na hugis at bahagyang pailalim ang pagkabilog, at may puting kulay. Itinuturing ang pagkakaroon ng singaw bilang isang likas na kaganapan sapagkat kusa itong nawawala pagkalipas ng panahon at kapag ginawa ang tamang mga pamamaraan ng paglunas dito.

Sanhi

Ang singaw ay maaring dahil sa pagkakagat ng isang tao sa sariling dila o labi, sa pagkakaroon ng iritasyon sa bibig, pagkakatusok ng tinik ng isda sa loob ng bibig, sa pagkapaso mula sa mainit na pagkain o inumin, marahas na pagsisipilyo, pagkakaroon ng impeksiyon (lalo na ang birus ng Herpes simplex), pag-inom ng mga gamot (partikular na ng Aspirin), pagkakaroon ng ibang sakit, o kahit na ang pagiging pagod, at maaring ang pagbabago sa klima at init-lamig.

Lunas

Ang mga nakakapaglunas ng singaw ay ang pagmumumog ng tubig na may asin, pagpapahid sa singaw ng agwa oksihenada na may halong kasing-daming tubig gamit ang patpat na may usbong na bulak. Nakatutulong sa hindi paglala ng singaw ang hindi pag-inom at paglamon ng maiinit, maaanghang, at maaasim na pagkain. Nakatutulong din sa paglunas ng singaw ang ilang mga gamot na inirereseta ng mga manggagamot.

Pag-iwas

Kabilang sa mga paraan upang maiwasan ang pagkakaroon ng singaw ang pag-iwas sa paninigarilyo, ang pagsisipilyo nang dalawang ulit sa loob ng isang araw, ang pagsisipilyo ng may tamang diin lamang, ang maingat at dahan-dahang pagnguya, at ang pag-iwas sa pagkabagabag.