Pumunta sa nilalaman

Harry Potter and the Deathly Hallows – Part 2

Mula sa Wikipedia, ang malayang ensiklopedya
Harry Potter and the Deathly Hallows – Part 2
Poster ng pagpapalabas sa sinehan
Poster ng pagpapalabas sa sinehan
DirektorDavid Yates
Prinodyus
  • David Heyman
  • David Barron
  • J. K. Rowling
IskripSteve Kloves
Ibinase saHarry Potter and the Deathly Hallows
ni J. K. Rowling
Itinatampok sina
MusikaAlexandre Desplat
SinematograpiyaEduardo Serra
In-edit niMark Day
Produksiyon
  • Warner Bros. Pictures
  • Heyday Films
TagapamahagiWarner Bros. Pictures
Inilabas noong
  • 7 Hulyo 2011 (2011-07-07) (Trafalgar Square)
  • 15 Hulyo 2011 (2011-07-15) (Reyno Unido at Estados Unidos)
Haba
130 minuto[1]
Bansa
  • Reyno Unido
  • Estados Unidos
WikaIngles
Badyet$250 milyon
(binahagi sa Part 1)[2][3]
Kita$1.343 bilyon[4]

Ang Harry Potter and the Deathly Hallows – Part 2 ay isang pelikulang pantasiya noong 2011 na idinirehe ni David Yates mula sa iskrip na isinulat ni Steve Kloves.[4] Ito ang ikalawa sa dalawang pelikulang ibinatay sa nobelang inilathala noong 2007 ni J. K. Rowling, at ang ikawalo at huling yugto ng serye ng pelikulang Harry Potter.[5] Sinusundan ng pelikula si Harry habang ipinagpapatuloy niya ang kaniyang paghahanap at pagsira sa mga Horcrux ni Lord Voldemort upang tuluyan na itong mapuksa.

Pinangungunahan ng isang malawak na pangkat ng mga artista ang pelikula, kabilang sina Daniel Radcliffe bilang Harry Potter, at sina Rupert Grint at Emma Watson bilang matalik niyang mga kaibigan na sina Ron Weasley at Hermione Granger. Kasama rin sa mga nagsiganap sina Helena Bonham Carter, Robbie Coltrane, Warwick Davis, Ralph Fiennes, Michael Gambon, John Hurt, Jason Isaacs, Gary Oldman, Alan Rickman, Maggie Smith, David Thewlis, at Julie Walters. Nagsimula ang pangunahing potograpiya ng pelikula noong 19 Pebrero 18, 2009 at natapos noong Hunyo 12, 2010,[6] habang isinagawa ang mga karagdagang pagkuha ng eksena noong Disyembre 2010.

Ipinalabas ang Harry Potter and the Deathly Hallows – Part 2 ng Warner Bros. Pictures sa Reyno Unido at Estados Unidos noong Hulyo 15, 2011, at ito lamang ang pelikula sa seryeng Harry Potter na ipinalabas sa 3D.[7] Pinuri ang pelikula bilang isang kasiya-siyang pagtatapos ng alamat, gayundin ang mga biswal na epekto, pagganap ng mga artista, mga tagpong aksiyon, pagdidirehe, musika, at sinematograpiya nito.[8][9][10][11][12][13] Kumita ito ng mahigit $1.3 bilyon sa buong daigdig, kaya naging ikatlong may pinakamataas na kita sa kasaysayan ng pelikula sa panahon ng pagpapalabas nito, at ang may pinakamataas na kinita sa buong serye ng Harry Potter.[14][15][16] Pinili rin ng National Board of Review (Pambansang Lupon ng Repaso) ang Deathly Hallows – Part 2 bilang isa sa sampung pinakamahusay na pelikula ng 2011. Nominado ito sa tatlong gantimpala sa ika-84 na Gawad Academy at tumanggap pa ng maraming iba pang pagkilala.

Balangkas

[baguhin | baguhin ang wikitext]

Matapos mailibing si Dobby, hiniling ni Harry Potter sa duwendeng si Griphook na tulungan sila nina Ron Weasley at Hermione Granger na pasukin ang lagakan ni Bellatrix Lestrange sa bangkong Gringotts, dahil naghihinala silang may nakatagong Horcrux doon. Pumayag si Griphook kapalit ng Espada ni Gryffindor. Ipinaalam naman ng tagagawa ng mga wand na si Ollivander kay Harry na ang dalawang wand na nakuha mula sa Malfoy Manor ay pag-aari nina Bellatrix at Draco Malfoy. Nadama niyang nagbago ang katapatan ng wand ni Draco at kinilala na si Harry bilang bagong may-ari matapos niya itong maagaw kay Draco. Sa loob ng lagakan ni Bellatrix, natagpuan nila ang Tasa ni Helga Hufflepuff, isa sa mga Horcrux, subalit inagaw ni Griphook ang espada at iniwan sila. Nang makulong sila dahil sa mahigpit na seguridad, pinalaya nila ang dragon na nagbabantay sa bangko at tumakas sakay nito.

Nagkaroon si Harry ng pangitain tungkol kay Lord Voldemort sa Gringotts, na galit na galit dahil sa pagnanakaw. Napagtanto rin niyang ang isang Horcrux na may kaugnayan kay Rowena Ravenclaw ay nakatago sa Hogwarts. Nag-Apparate ang tatlo patungong Hogsmeade, kung saan tinulungan sila ni Aberforth Dumbledore, kapatid ni Albus Dumbledore. Inihayag nitong siya ang nagpadala kay Dobby sa Malfoy Manor. Itinuro rin niya ang lihim na daanan patungo sa Silid ng Pangangailangan (Room of Requirement) ng Hogwarts at ipinatawag si Neville Longbottom upang ihatid sila pabalik sa paaralan.

Habang tinatakot ni Severus Snape ang mga guro at mag-aaral, nagpakita si Harry. Nakipaglaban si Propesor McGonagall kay Snape at napilit itong tumakas bago niya inihanda ang Hogwarts para sa nalalapit na labanan. Pinayuhan ni Luna Lovegood si Harry na kausapin ang multo ni Helena Ravenclaw, na nagsabing ginamitan ni Voldemort ng maitim na mahika ang diadem ng kaniyang ina bago ito itinago sa Silid ng Pangangailangan. Sa Silid ng mga Lihim (Chamber of Secrets), winasak nina Ron at Hermione ang Horcrux na tasa gamit ang pangil ng Basilisk. Samantala, sinalakay nina Draco, Blaise Zabini, at Goyle si Harry, subalit sumaklolo sina Ron at Hermione. Gumamit si Goyle ng sumpang Fiendfyre, na siya ring ikinamatay niya. Iniligtas nina Harry, Ron, at Hermione sina Draco at Zabini bago tumakas. Sinaksak ni Harry ang diadem gamit ang pangil ng Basilisk, at sinipa naman ito ni Ron papasok sa apoy.

Habang sinasalakay ng hukbo ni Voldemort ang Hogwarts, napagtanto ni Harry na ang ahas ni Voldemort na si Nagini ang huling Horcrux. Narinig ng tatlo si Voldemort na sinasabihan si Snape na hindi siya paglilingkuran ng Matandang Wand (Elder Wand) hangga't hindi namamatay si Snape, sapagkat ito ang pumatay kay Dumbledore, ang dating may-ari ng wand. Inatake ni Nagini si Snape, at bago ito namatay ay ibinigay niya kay Harry ang isa sa kaniyang mga alaala. Marami sa mga kasapi ng Orden ng Phoenix, mga mag-aaral, at mga guro ang nasawi sa labanan, kabilang sina Fred Weasley, Remus Lupin, at Nymphadora Tonks.

Pinanood ni Harry ang alaala ni Snape sa Pensieve. Doon niya nalaman na magkaibigan noong bata pa sina Snape at ang kaniyang ina na si Lily Potter. Minahal ni Snape si Lily, subalit si James Potter, ama ni Harry, ang pinili nito. Kinamuhian ni Snape si James dahil sa kayabangan nito at sa pang-aapi sa kaniya. Nalaman din ni Harry na sinikap ni Snape na iligtas si Lily sa pamamagitan ng pagmamakaawa kay Dumbledore na itago ang pamilya Potter. Pagkamatay ni Lily, nagsilbi si Snape bilang dobleng ahente para kay Dumbledore sa loob ng mga Death Eater, at pumayag pa siyang patayin si Dumbledore. Nakita rin ni Harry na si Snape ang lumikha ng Patronus na usa na gumabay sa kaniya patungo sa Espada ni Gryffindor. Higit pa rito, nalaman niyang hindi niya sinasadyang naging Horcrux nang mabigo ang sumpa ni Voldemort na patayin siya noong sanggol pa siya. Upang tuluyang mawasak ang bahaging iyon ng kaluluwa ni Voldemort, kinakailangang patayin ni Voldemort si Harry mismo. Ginamit ni Harry ang Bato ng Muling Pagkabuhay (Resurrection Stone), na nakatago sa Ginintuang Snitch na ipinamana sa kanya, at nakita niya ang mga espiritu ng kaniyang mga magulang, ni Sirius Black, at ni Remus. Pinalakas nila ang kaniyang loob bago siya bumalik kay Voldemort sa Pinagbawalang Gubat (Forbidden Forest). Ginamitan siya ni Voldemort ng Sumpang Pampatay (Killing Curse), subalit nagising si Harry sa isang limbo. Doon niya nakatagpo ang espiritu ni Dumbledore, na nagpaliwanag na wala na ang ugnayan niya kay Voldemort at maaari na siyang pumiling bumalik sa kaniyang katawan o magpatuloy sa kabilang buhay.

Nagbalik si Voldemort sa Hogwarts dala ang tila walang buhay na katawan ni Harry at inutusang sumuko ang paaralan. Nang bunutin ni Neville ang Espada ni Gryffindor mula sa Sumbrerong Tagapag-uri (Sorting Hat), ibinunyag ni Harry na buhay pa siya. Tinalikuran ng pamilya Malfoy si Voldemort, kasama ng marami pang Death Eater. Sa Great Hall, napatay ni Molly Weasley si Bellatrix, habang pinugutan naman ni Neville si Nagini, kaya nawasak ang huling Horcrux. Tinalo ni Harry si Voldemort nang ibinalik ng kaniyang Expelliarmus ang Sumpang Pampatay ni Voldemort laban dito. Pagkatapos ng labanan, ipinaliwanag ni Harry kina Ron at Hermione na hindi kailanman napasunod ni Voldemort ang Matandang Wand. Kinilala siya nito bilang tunay na amo matapos niyang madisarmahan si Draco, na noon namang nagdisarma kay Dumbledore bago ito napatay ni Snape. Sa halip na angkinin ang Matandang Wand, pinili ni Harry na wasakin ito.

Pagkalipas ng labinsiyam na taon, pinanood nina Harry at Ginny Weasley, na mag-asawa na, ang kanilang bunsong anak na sumakay sa tren sa King's Cross patungong Hogwarts, kasama nina Ron at Hermione at ang dalawa nilang anak.

Mga gumanap

[baguhin | baguhin ang wikitext]
  • Daniel Radcliffe bilang Harry Potter: Isang 17-taong-gulang na salamangkero.
  • Rupert Grint bilang Ron Weasley: Isang batang salamangkero at isa sa matatalik na kaibigan ni Harry.
  • Emma Watson bilang Hermione Granger: Isang batang mahikera at isa sa matatalik na kaibigan ni Harry.
  • Helena Bonham Carter bilang Bellatrix Lestrange: Isang Death Eater at tiyahin ni Draco Malfoy. Ginampanan din ni Bonham Carter si Hermione Granger kapag nagbalatkayo ito bilang si Bellatrix.
  • Robbie Coltrane bilang Rubeus Hagrid: Kaibigang kalahating higante ni Harry at tagapag-alaga ng mga bakuran (gamekeeper) ng Hogwarts.
  • Ralph Fiennes bilang Lord Voldemort: Isang masamang mangkukulam na uhaw sa kapangyarihan at pinuno ng mga Death Eater.
  • Michael Gambon bilang Propesor Albus Dumbledore: Ang dating punong-guro ng Hogwarts na pinatay ni Severus Snape.
  • John Hurt bilang Garrick Ollivander: Isang gumagawa ng mga mahikang baston na dinukot ng mga Death Eater.
  • Jason Isaacs bilang Lucius Malfoy: Ama ni Draco at isang napahiyang Death Eater.
  • Kelly MacDonald bilang Helena Ravenclaw: Ang multo ng Bahay Ravenclaw. Pinalitan ni MacDonald si Nina Young sa papel na ito.[17]
  • Gary Oldman bilang Sirius Black: Yumao nang ninong ni Harry.
  • Alan Rickman bilang Propesor Severus Snape: Isang dobleng ahente sa hanay ng mga Death Eater at punong-guro ng Hogwarts.
  • Maggie Smith bilang Propesor Minerva McGonagall: Isang guro sa Hogwarts.
  • David Thewlis bilang Remus Lupin: Isang kasapi ng Orden ng Phoenix at dating guro sa Hogwarts.

Muling ginampanan nina Warwick Davis ang kanilang mga papel bilang Filius Flitwick, isang guro sa Hogwarts, at bilang Griphook, isang duwende at dating kawani ng bangkong Gringotts; David Bradley bilang Argus Filch, ang katiwala ng Hogwarts; Gemma Jones bilang Poppy Pomfrey, ang pangunahing manggagamot ng Hogwarts; Miriam Margolyes bilang Pomona Sprout, isang guro sa Hogwarts; at sina Julie Walters, Mark Williams, James Phelps, Oliver Phelps, Clémence Poésy, at Natalia Tena bilang mga kasapi ng Orden ng Phoenix na sina Molly Weasley, Arthur Weasley, Fred at George Weasley, Fleur Delacour, at Nymphadora Tonks. Muli ring lumabas sina Bonnie Wright bilang Ginny Weasley, nakababatang kapatid ni Ron at kasintahan ni Harry; Tom Felton bilang Draco Malfoy, anak ni Lucius at isang Death Eater; Helen McCrory bilang Narcissa Malfoy, ina ni Draco at kapatid ni Bellatrix; Dave Legeno bilang Fenrir Greyback, isang taong-lobo at tagasuporta ni Voldemort; at Nick Moran bilang Scabior, isang mangangaso ng mga pugante para kay Voldemort.[18] Ginampanan naman ni Ciarán Hinds si Aberforth Dumbledore, kapatid ni Albus Dumbledore at may-ari ng bahay-inuman na Hog's Head, kapalit ni Jim McManus, na gumanap sa papel sa Part 1.[17]

Sa nobela, muling lumitaw sa kasukdulang labanan sa Hogwarts ang ilang tauhang hindi na nakita mula pa sa mga naunang nobela. Ayon sa direktor na si David Yates, nais niyang maibalik ang marami sa mga tauhang dati nang lumabas sa serye ng pelikula. Kabilang pa sa mga muling gumanap sa kani-kanilang mga papel mula sa mga naunang pelikula sina Emma Thompson bilang Sybill Trelawney, Jim Broadbent bilang Horace Slughorn, George Harris bilang Kingsley Shacklebolt, Domhnall Gleeson bilang Bill Weasley, Matthew Lewis bilang Neville Longbottom, Evanna Lynch bilang Luna Lovegood, Devon Murray bilang Seamus Finnigan, Jessie Cave bilang Lavender Brown, Katie Leung bilang Cho Chang, Afshan Azad bilang Padma Patil, Anna Shaffer bilang Romilda Vane, Georgina Leonidas bilang Katie Bell, Freddie Stroma bilang Cormac McLaggen, Josh Herdman bilang Gregory Goyle, Scarlett Byrne bilang Pansy Parkinson, Leslie Phillips bilang tinig ng Sumbrerong Pampag-uuri, Geraldine Somerville bilang Lily Potter, at Adrian Rawlins bilang James Potter.[18]

Pagpapalabas

[baguhin | baguhin ang wikitext]

Noong Abril 2, 2011, nagsagawa ng isang test screening o pagsubok na pagpapalabas ng pelikula sa Chicago, kung saan dumalo sina David Yates, David Heyman, David Barron, at patnugot ng pelikula na si Mark Day. Idinaos ang pandaigdigang unang pagpapalabas (world premiere) ng pelikula noong Hulyo 7, 2011 sa Liwasang Trafalgar sa Londres. Samantala, ginanap ang unang pagpapalabas nito sa Estados Unidos noong Hulyo 11, 2011 sa Lincoln Center sa Lungsod ng New York.[19] Bagaman kinunan ang pelikula sa 2D, isinailalim ito sa pagpapalit sa 3D sa yugto matapos ng produksyon at ipinalabas sa mga pormat na RealD 3D, IMAX 3D, at 4DX.[20]

Orihinal na nakatakdang ipalabas ang pelikula sa Indonesya noong Hulyo 13, 2011.[21] Gayunman, noong Pebrero 2011 ay nagpataw ang pamahalaan ng Indonesia ng bagong value-added tax (VAT) o buwis sa dagdag na halaga sa mga royalty o bayad sa karapatang-ari ng mga dayuhang pelikula, dahilan upang ihinto ng tatlong estudyo ng pelikula, kabilang ang Warner Bros. Pictures, ang pag-aangkat ng kanilang mga pelikula sa bansa, kabilang ang Harry Potter and the Deathly Hallows – Part 2.[21] Hindi rin naipalabas ang pelikula sa mga sinehan sa Kaharian ng Jordan dahil sa bagong ipinatupad na mga buwis sa mga pelikula.[22]

Noong Hunyo 10, isang buwan bago ang pagpapalabas ng pelikula, nagsimulang ibenta ang mga tiket.[23] Noong Hunyo 16, 2011, iginawad sa Part 2 ang 12A[24] na sertipikasyon ng British Board of Film Classification (BBFC), na nagsabing ang pelikula ay "naglalaman ng katamtamang banta, mga detalyadong eksena ng pinsala, at paggamit ng wika." Ito ang nag-iisang pelikula sa seryeng Harry Potter na nakatanggap ng babala para sa "injury detail" o "detalye sa pinsala". Pagsapit ng hatinggabi ng Hulyo 15, ipinalabas ang Part 2 sa 3,800 sinehan. Sa Estados Unidos, ipinalabas ito sa 4,375 sinehan, kabilang ang 3,100 3D na sinehan at 274 IMAX na sinehan, na naging pinakamalawak na pagpapalabas para sa isang pelikulang IMAX, 3D, 4DX, at Harry Potter. Sa Timog-silangang Asya, ipinalabas ang pelikula noong Hulyo 16, 2011 sa Screen Red.

Mga parangal

[baguhin | baguhin ang wikitext]

Sa ika-84 na Gawad Academy, nakatanggap ang Harry Potter and the Deathly Hallows – Part 2 ng mga nominasyon para sa Pinakamahusay na Disenyong Pampelikula (Best Art Direction), Pinakamahusay na Makeup o Pag-aayos ng Anyo, at Pinakamahusay na mga Biswal na Epekto (Best Visual Effects).[25][26] Kabilang pa sa iba nitong mga nominasyon ang apat na British Academy Film Awards, kung saan nagwagi ito ng isa, at apat na Critics' Choice Movie Awards, kung saan nanalo ito ng dalawa.[27][28][29][30] Pinili rin ng National Board of Review ang Deathly Hallows – Part 2 bilang isa sa sampung pinakamahusay na pelikula ng 2011.[31]

Mga sanggunian

[baguhin | baguhin ang wikitext]
  1. ↑ "Harry Potter and the Deathly Hallows – Part 2 (12A)". British Board of Film Classification (sa wikang Ingles). 11 Agosto 2011. Inarkibo mula sa orihinal noong 5 Enero 2016. Nakuha noong 6 Marso 2024.
  2. ↑ Frankel, Daniel (17 Nobyembre 2010). "Get Ready for the Biggest Potter Opening Yet". TheWrap (sa wikang Ingles). Inarkibo mula sa orihinal noong 20 Nobyembre 2010. Nakuha noong 21 Nobyembre 2010. Warner officials say shooting parts 1 and 2 of "Deathly Hallows" (the second part comes out in July) kept cost below the more than $250 million that was spent on 2009's "Half-Blood Prince."
  3. ↑ Lang, Brent (14 Hulyo 2011). "'Harry Potter' Looks to Shatter Box Office Record With $150M+ Debut". TheWrap (sa wikang Ingles). Inarkibo mula sa orihinal noong 30 Nobyembre 2012. Nakuha noong 30 Nobyembre 2012. Parts 1 and 2 of "Deathly Hallows" were filmed at a cost of roughly $250 million, essentially giving Warner Bros. a license to print money off the profits it will bank over the upcoming weekend.
  4. 1 2 "Harry Potter and the Deathly Hallows Part 2". Box Office Mojo (sa wikang Ingles). IMDb. Inarkibo mula sa orihinal noong 22 Abril 2019. Nakuha noong 3 Marso 2021.
  5. ↑ "Warner Bros. Plans Two-Part Film Adaptation of "Harry Potter and the Deathly Hallows" to Be Directed by David Yates". Business Wire (sa wikang Ingles). 13 Marso 2008. Inarkibo mula sa orihinal noong 28 Hunyo 2017. Nakuha noong 4 Abril 2021. ...expand the screen adaptation of Harry Potter and the Deathly Hallows and release the film in two parts.
  6. ↑ "Warner Bros. Plans Two-Part Film Adaptation of "Harry Potter and the Deathly Hallows" to Be Directed by David Yates". Business Wire. 13 March 2008. Inarkibo mula sa orihinal noong 28 June 2017. Nakuha noong 4 April 2021. ...expand the screen adaptation of Harry Potter and the Deathly Hallows and release the film in two parts.
  7. ↑ "Harry Potter Fans Choosing 2D Over 3D For Deathly Hallows 2" (sa wikang Ingles). 29 Mayo 2012. Inarkibo mula sa orihinal noong 13 Mayo 2016. Nakuha noong 28 Abril 2020.
  8. ↑ Singh, Anita (1 Enero 2012). "Harry Potter aims for Oscar glory". The Daily Telegraph (sa wikang Ingles). London. Inarkibo mula sa orihinal noong 6 Enero 2012. Nakuha noong 6 Enero 2012.
  9. ↑ "Top Movies of 2011". Rotten Tomatoes (sa wikang Ingles). 2011. Inarkibo mula sa orihinal noong 23 Setyembre 2011. Nakuha noong 18 Hulyo 2011.
  10. ↑ "Movie Releases by Score". Metacritic (sa wikang Ingles). 2011. Inarkibo mula sa orihinal noong 30 Agosto 2011. Nakuha noong 18 Hulyo 2011.
  11. ↑ Goldberg, Matt (14 Hulyo 2011). "HARRY POTTER AND THE DEATHLY HALLOWS – PART 2 Review". Collider (sa wikang Ingles). Inarkibo mula sa orihinal noong 24 Hulyo 2020. Nakuha noong 24 Hulyo 2020.
  12. ↑ "Movie Review: "Harry Potter and the Deathly Hallows: Part 2"". Daily Bruin (sa wikang Ingles). Inarkibo mula sa orihinal noong 9 Mayo 2021. Nakuha noong 24 Hulyo 2020.
  13. ↑ "'Harry Potter and the Deathly Hallows Part 2' Premiere Attracts Thousands to Rainy London". The Hollywood Reporter (sa wikang Ingles). 7 Hulyo 2011. Inarkibo mula sa orihinal noong 28 Hulyo 2020. Nakuha noong 27 Hulyo 2020.
  14. ↑ "All Time Worldwide Box Office Grosses". Box Office Mojo (sa wikang Ingles). Inarkibo mula sa orihinal noong 28 Pebrero 2009. Nakuha noong 1 Mayo 2019.
  15. ↑ "2011 Worldwide Box Office". Box Office Mojo (sa wikang Ingles). Inarkibo mula sa orihinal noong 16 Hulyo 2020. Nakuha noong 23 Hunyo 2023.
  16. ↑ McClintock, Pamela (28 Agosto 2023). "'Barbie' Becomes Biggest Warner Bros. Movie Ever at Global Box Office, Beating Final 'Harry Potter' Pic". The Hollywood Reporter (sa wikang Ingles). Nakuha noong 30 Agosto 2023.
  17. 1 2 Oddo, Marco Vito (Disyembre 15, 2025). "Every Actor Recast In The Harry Potter Movies". ComicBook.com (sa wikang Ingles). Nakuha noong Pebrero 13, 2026.
  18. 1 2 "Harry Potter and the Deathly Hallows: Part II (2011) — Cast and crew" (sa wikang Ingles). The Numbers. Nakuha noong Pebrero 13, 2026.
  19. ↑ Derschowitz, Jessica (12 Hulyo 2011). ""Harry Potter and the Deathly Hallows: Part 2" premieres in New York". CBS News (sa wikang Ingles). Inarkibo mula sa orihinal noong 21 Nobyembre 2012. Nakuha noong 6 Disyembre 2012.
  20. ↑ "'Harry Potter' Film To Bow On Record 423 Global Imax Screens". The Hollywood Reporter (sa wikang Ingles). 13 Hulyo 2011. Inarkibo mula sa orihinal noong 13 Setyembre 2011. Nakuha noong 3 Nobyembre 2012.
  21. 1 2 Deutsch, Anthony (9 Hulyo 2011). "Indonesia to miss Harry Potter magic". Financial Times (sa wikang Ingles). Inarkibo mula sa orihinal noong 13 Nobyembre 2013. Nakuha noong 19 Hulyo 2011.
  22. ↑ "Hollywood Boycott Jordan Courtesy Of The Jordanian Customs Authorities" (sa wikang Ingles). Sleepless In Amman. 6 Hulyo 2011. Inarkibo mula sa orihinal noong 14 Hulyo 2011. Nakuha noong 24 Hulyo 2011.
  23. ↑ "Harry Potter tickets go on sale" (sa wikang Ingles). AZCentral.com. Inarkibo mula sa orihinal noong 3 Agosto 2021. Nakuha noong 23 Hunyo 2011.
  24. ↑ Anthony Quinn (15 Hulyo 2011). "Harry Potter and the Deathly Hallows, Part 2 (12A) – Reviews – Films". The Independent (sa wikang Ingles). Inarkibo mula sa orihinal noong 1 May 2013. Nakuha noong 7 Disyembre 2012.
  25. ↑ "84th Annual Academy Award Nominations". Variety (sa wikang Ingles). 24 Enero 2012. Inarkibo mula sa orihinal noong 12 Agosto 2015. Nakuha noong 2 Mayo 2023.
  26. ↑ "Oscars 2012: Complete Winners List". The Hollywood Reporter (sa wikang Ingles). 26 Pebrero 2012. Inarkibo mula sa orihinal noong 14 Hunyo 2021. Nakuha noong 2 Mayo 2023.
  27. ↑ Knegt, Peter (17 Enero 2012). "The Artist, Tinker Tailor and Hugo Lead the BAFTA Nominations". IndieWire (sa wikang Ingles). Inarkibo mula sa orihinal noong 19 Setyembre 2020. Nakuha noong 2 Mayo 2023.
  28. ↑ "Baftas 2012 the winners - the full list". The Guardian (sa wikang Ingles). 12 Pebrero 2012. Inarkibo mula sa orihinal noong 5 Oktubre 2013. Nakuha noong 2 Mayo 2023.
  29. ↑ Knegt, Peter (13 Disyembre 2011). "The Artist and Hugo Top Critics' Choice Award Nominations". IndieWire (sa wikang Ingles). Inarkibo mula sa orihinal noong 14 Nobyembre 2020. Nakuha noong 2 Mayo 2023.
  30. ↑ Ford, Rebecca (12 Enero 2012). "Critics' Choice Movie Awards: The Artist Wins Best Picture". The Hollywood Reporter (sa wikang Ingles). Inarkibo mula sa orihinal noong 25 Setyembre 2021. Nakuha noong 2 Mayo 2023.
  31. ↑ Grosz, Christy (1 Disyembre 2011). "Hugo is National Board of Review's best film". Variety (sa wikang Ingles). Inarkibo mula sa orihinal noong 5 Disyembre 2015. Nakuha noong 2 Mayo 2023.
[baguhin | baguhin ang wikitext]
Nagmula sa "https://tl.wikipedia.org/w/index.php?title=Harry_Potter_and_the_Deathly_Hallows_–_Part_2&oldid=2216462"