5 Seconds of Summer

Mula sa Wikipediang Tagalog, ang malayang ensiklopedya
Tumalon sa: nabigasyon, hanapin


5 Seconds of Summer
5 Seconds of Summer sa kanilang pagtatanghal sa Detroit Switch Party ng Amp Radio sa Detroit, Michigan. Mula sa kaliwa: Michael Clifford, Luke Hemmings, Calum Hood at Ashton Irwin.
Kabatiran
Pinanggalingan Sydney, Australya
Genre Pop Punk, Pop Rock
Taong aktibo 2011–kasalukuyan
Mga tatak Capitol Records
Sityo 5sos.com
Mga kasapi
Luke Hemmings
Michael Clifford
Calum Hood
Ashton Irwin

Ang 5 Seconds of Summer (kilala rin bilang 5SOS) ay isang Australyanong bandang pop-rock/punk-pop.[1][2] Nabuo sila sa Sydney noong taong 2011 at binubuo ito ng mga kasaping sina Luke Hemmings (bokalista, gitara), Michael Clifford (gitara, bokalista), Calum Hood (bahista, bokalista) at Ashton Irwin (tambol, bokalista).[3] Sila ay orihinal na sumikat mula sa YouTube, na nagpapaskil ng mga bidyo ng kanilang mga sarili habang kumakanta ng mga sariling bersiyon ng mga sikat na awitin (cover songs) noong 2011. Mula roon, nagsimula silang magkaroon ng ilang mga tagasunod noong 2012, at matapos ay nakilala sila sa ibang bansa nang imbitahan sila ng One Direction sa kanilang Take Me Home Tour.

Tinatawag silang boy band ng midya.[4][5][6][7] Noong Pebrero 2014, inilabas nila ang awiting She Looks So Perfect bilang paunang awitin sa ibang bansa. Nanguna ito sa mga listahan ng Australya, New Zealand, Irlanda at ng Nagkakaisang Kaharian. Ang kanilang unang studio album na sunod sa kanilang pangalan (self-titled) ay inilabas noong Hunyo 2014.

Kasaysayan[baguhin]

Pinagmulan at Paglulunsad (2011-12)[baguhin]

Nag-umpisa ang 5 Seconds of Summer noong taong 2011 nang sina Luke Hemmings, Michael Clifford, at Calum Hood (na magkakaeskuwela sa Norwest Christian College) ay nagsama-sama at nagsimulang magpaskil ng mga bidyo nila habang umaawit ng mga sariling bersiyon ng mga kanta (cover songs) sa YouTube akawnt ni Hemmings. Ang unang bidyo ni Hemmings, isang bersiyon ng kantang Please Don't Go ni Mike Posner, ay ipinaskil noong 03 Pebrero 2011.[8] Ang sarili nilang bersiyon ng sikat na awit nina Chris Brown at Justin Bieber na "Next to You" ay nakatanggap ng higit 600,000 hits.[9] Noong Disyembre 2011, napabilang na rin sa kanilang banda si tambolista Ashton Irwin, at nabuo na nga ang kasalukuyang komposisyon ng 5 Seconds of Summer.[10] Mula nga noon ay nakatanggap sila ng higit 5 milyong silip (view) sa YouTube, at ng hukbo ng tagasunod sa social media na Facebook at Twitter.

Napukaw nila ang interes ng ilan sa mga malalaking record labels at tagapaglathala, at kalauna'y lumagda sila sa isang publishing deal ng Sony ATV Music Publishing. Bagama't wala silang matatawag na malaking pagtataguyod maliban sa Facebook at Twitter, ang kanilang unang labas na musika, isang EP na pinamagatang Unplugged, ay umabot sa numero 3 sa listahan ng iTunes sa Australya, at pang-dalawampu naman sa New Zealand at Sweden. Muling lumaki ang mga sumusunod sa kanila mula sa ibayong-dagat nang si Louis Tomlinson mula sa bandang Ingles na One Direction ay nagpaskil ng kawing (link) patungo sa bidyong YouTube ng banda ng kanilang awiting Gotta Get Out, at siya'y nagsabing naging tagahanga siya ng 5 Seconds of Summer "pansumandali". Muling napukaw ang interes ng One Direction nang inilabas ng banda ang kanilang unang single, ang Out of My Limit noong 19 Nobyembre 2012, nang nagtuwit naman ang isa pang miyembro ng One Direction na si Niall Horan ng kawing patungo sa bidyo nito.

Ginugol ng 5 Seconds of Summer ang ikalawang bahagi ng 2012 upang magsulat at buuin ang kanilang tunog kasama sina Christian Lo Russo at Joel Chapman ng bandang Australyanong Amy Meredith, kung saa'y nakasama nila ang mga ito sa pagsulat ng dalawang kantang nagtatampok sa Somewhere New na EP - ang Beside You at Unpredictable. Kasamang pinrodyus ni Joel Chapman ang EP.

Inilabas ng 5 Seconds of Summer ang kanilang unang single na Out of My Limit noong 19 Nobyembre 2012, at nakatanggap ang kalakip na bidyo nito ng mahigit 100,000 silip sa unang 24 na oras nito.

Noong Disyembre 2012 ay lumarga ang mga miyembro sa isang lakbay-pagsulat ng awit (songwriting trip) sa Londres kung saa'y tumulong din sumulat ang iba't ibang mga mang-aawit gaya ng McFly, si Roy Stride ng Scouting for Girls, si Nick Hodgson ng Kaiser Chiefs, Jamie Scott, Jake Gosling, Steve Robson, at James Bourne ng Busted.

5 Seconds of Summer: Ang Paunang Studio Album (2013-kasalukuyan)[baguhin]

Noong 14 Pebrero 2013, inanunsiyong ang 5 Seconds of Summer ay magiging suportang akto (support act) ng bandang One Direction para sa pandaigdigang lakbay-konsiyerto (concert tour) nito ng Take Me Home. Nagsimula ang pagronda sa O2 Arena sa Londres noong 23 Pebrero 2013, at sasamahan ng 5 Seconds of Summer ang One Direction sa mga palabas nito sa UK, Estados Unidos, Australya at New Zealand, kasama na ang 7 mga palabas sa Allphones Arena sa mismong bayan ng 5 Seconds of Summer sa Sydney.

Habang nakapahinga sa Take Me Home Tour, umuwi ang 5 Seconds of Summer sa Australya kung saa'y bumandera sila para sa mga pambansang pagtatanghal, na ang mga petsang nakatakda rito'y napakyaw sa loob lamang ng ilang minuto. Nasa mga ganitong panahon nang magsimulang magkaroon ng kasikatan at maging mas kilala ang banda. Noong 21 Nobyembre 2013, inanunsiyo ng banda na lumagda na sila sa Capitol Records.

Noong 5 Pebrero 2014, ibinilang ng 5 Seconds of Summer ang kanilang paunang awitin na “She Looks So Perfect” para sa pre-order sa Tindahan ng iTunes.

Ang ugnayan sa pagitan ng 5SOS at One Direction ay sumasaklaw sa parehong grupo na pinamamahalaan ng nakabase sa Londres na Modest! Management. Ito ang nagdala sa 5SOS sa pagtawag sa kanila bilang boy band ng midya. Di gaya ng maraming mga boy band, sila ang nagsusulat ng sarili nilang mga kanta, nagpapatugtog ng sarili nilang mga instrumento, at hindi maituturing na isang grupong sumasayaw. Magkagayunman, nakaakit ang banda ng malaking hukbo ng mga babaeng tagasunod gaya ng ibang mga boy band. Inihambing ni Ashton Irwin ang mga babaeng tagasunod ng banda sa Fall Out Boy na may malaki ring grupo ng mga babaeng tagahanga. Itinuro naman ni John Feldmann, punong mang-aawit ng bandang Goldfinger at prodyuser sa 5 Seconds of Summer, ang grupo ng mga tagahanga ng 5 Seconds of Summer sa “isang pundamental na pagbabago ng demograpikong pop punk,” na nagbabanggit ng unti-unting paglipat ng demograpiya mula sa mayoryang mga lalaking tagapakinig ng mga mang-aawit ng unang bahagi ng dekada 90 gaya ng Blink-182 at Green Day.

Noong huling bahagi ng Marso 2014, inilabas ang She Looks So Perfect sa Nagkakaisang Kaharian (UK). Sa kabila ng isang araw lang na pangununa nito sa tindahan ng iTunes sa Inglatera at sa pagtatapos ng linggo ay nasa pinakahuli ng Nangungunang Sampu (Top 10), ang 5 Seconds of Summer ay naging ikaapat na bandang Australyano na may numero unong isahang awit sa UK, at unang nakagawa nito sa loob ng 14 na taon. Sa listahan nung sumunod na linggo ay bumagsak ito sa pangsampu, na siyang pinakamalaking pagbulusok mula sa numero uno mula noong bumagsak ang awitin ng McFly na “Baby’s Coming Back”/”Transylvania” mula una patungong pangdalawampu, sa ikalawang linggo rin nito sa talaan ng UK. Noong 5 Marso 2014, inanunsiyong muli nilang sasamahan ang One Direction sa kanilang lakbay-konsiyerto bilang suportang akto sa kanilang 2014 Where We Are Tour sa Estados Unidos, Kanada, UK at Europa. Noong 9 Abril 2014, nag-umpisa ang She Looks So Perfect EP sa ikalawang puwesto sa Billboard 200.

Noong 13 Mayo 2014, inanunsiyo ng banda na ang kanilang paunang album, na pinangalanang 5 Seconds of Summer, ay ilalabas sa 27 Hunyo 2014 sa Europa at Australya, na may kasunod pang ibang mga awiting ilalabas. Nagwagi ang album ng gantimpalang Kerrang!; sinabi ni Luke Hemmings na isang tunay na karangalang magwagi nito, dahil ang kanilang mga idolong banda’y nasa Kerrang! din.

Impluwensiya[baguhin]

Ayon sa banda, nagbigay-inspirasyon sa kanila si Ed Sheeran at ang mga bandang Blink-182, All Time Low, Mayday Parade, Boys Like Girls, at Busted.

Paglalakbay[baguhin]

Noong Mayo 2012, inanunsiyo ng 5 Seconds of Summer ang mga petsa ng kanilang pagronda sa Factory Theatre sa Sydney, Old Museum sa Brisbane, at Xavier College sa Melbourne. Napakyaw (sold-out) ang lahat ng mga palabas sa loob lamang ng dalawang minuto mula nang ito'y ibinenta sa publiko, kaya't muli silang naglabas ng ikalawang mga palabas sa bawat siyudad, na nabenta rin sa loob ng ilang minuto. Kasunod ng tagumpay ng paglabas ng kanilang Unplugged EP noong Hunyo 2012, lumarga na ang banda para sa kanilang rondang Twenty Twelve, at nagtanghal sila sa mga sumusunod na lugar: Uni Bar sa Adelaide, Oxford Art Factory sa Sydney, Old Museum sa Brisbane, at Corner Hotel sa Melbourne.

Noong Oktubre 2012, nilibot ng 5 Seconds of Summer ang Australya, at sinuportahan ang Hot Chelle Rae at si Cher Lloyd; nagtanghal sila sa Enmore Theatre sa Sydney, sa Convention Centre sa Brisbane, Festival Hall sa Melbourne, sa Royal Theatre sa Canberra, at sa AEC Theatre sa Adelaide.

Noong 3 Nobyembre 2012, isinagawa ng 5 Seconds of Summer ang kanilang unang pagtatanghal sa ibayong-dagat sa Zeal Cafe sa Auckland, New Zealand. Noong 25 Nobyembre 2012, bumandera sila sa isang pagtatanghal sa Metro Theatre sa Sydney, bago sila lumisan para sa isang tatlong buwang pananatili sa UK.

Sinamahan ng 5 Seconds of Summer ang One Direction sa kanilang pandaigdigang rondang Take Me Home, na nag-umpisa sa London noong 23 Pebrero 2013.

Noong 17 Mayo 2013, inanunsiyo ng 5 Seconds of Summer ang kanilang pambansang pagroronda, na may palayaw na Pants Down Tour. Kasama rito ang mga petsa ng pagtatanghal sa Sydney, Perth, Brisbane, Adelaide, at Melbourne, na lahat ay napakyaw sa loob lamang ng ilang minuto.

Mga Kasapi ng Banda[baguhin]

  • Luke Hemmings – punong bokalista, gitarista
  • Michael Clifford – gitarista, bokalista
  • Calum Hood – bahista, bokalista
  • Ashton Irwin – tambolista, bokalista

Mga sanggunian[baguhin]

  1. Midgarden, Cory (23 Abr 2014). "5 Seconds Of Summer’s New York City Fans Are Like ‘A Good Version’ Of Tinder". MTV News. http://www.mtv.com/news/1726655/5-seconds-of-summer-new-york-concert. Hinango noong 17 Ago 2014. 
  2. Smirke, Richard (08 Abr 2014). "5 Seconds of Summer Goes Global - But They're Not The Next One Direction". Billboard. http://www.billboard.com/articles/columns/pop-shop/6042193/5-seconds-of-summer-goes-global-but-theyre-not-the-next-one. Hinango noong 17 Ago 2014. 
  3. "5 Seconds Of Summer - The Band You Should Be Obsessing Over". http://www.thehothits.com/news/30974/5-seconds-of-summer---the-band-you-should-be-obsessing-over. Hinango noong 24 Ago 2013. 
  4. Knopper, Steve (09 Abr 2014). "On the Charts: Aussie Boy Band 5 Seconds of Summer Almost Top 'Frozen'". Rolling Stone. http://www.rollingstone.com/music/news/on-the-charts-aussie-boy-band-5-seconds-of-summer-almost-top-frozen-20140409. Hinango noong 17 Ago 2014. 
  5. Good, Jenna (19 Mayo 2014 10:13 GMT). "The ultimate compliment! One Direction's Liam Payne is 'jealous' of Sydney boy band 5 Seconds of Summer's musical talents". Mail Online. http://www.dailymail.co.uk/tvshowbiz/article-2631646/The-ultimate-praise-One-Directions-Liam-Payne-jealous-Sydney-boy-band-5-Seconds-Summers-musical-talents.html. Hinango noong 17 Ago 2014. 
  6. Lawrence, Jesse (22 Peb 2014 11:19 AM). "Is 5 Seconds Of Summer The New Kid On The Boy Band Block?". Forbes. http://www.forbes.com/sites/jesselawrence/2014/02/22/is-5-seconds-of-summer-the-new-kid-on-the-boy-band-block. Hinango noong 17 Ago 2014. 
  7. Weston, Tamara (Abril 2014). "5 Seconds Of Summer Is Your Next Favorite Boy Band (They're One Direction-Approved!)". TeenVogue. http://www.teenvogue.com/entertainment/music/2014-04/5-seconds-of-summer-5sos-interview. Hinango noong 17 Ago 2014. 
  8. "Please dont go (cover) Mike Posner". 03 Peb 2011. https://www.youtube.com/watch?v=CUDcZsNEA1Y. Hinango noong 17 Ago 2014. 
  9. Langlands, Alex (14 Mayo 2012). "Meet 5 Seconds Of Summer, Your Hosts For This Evenings Entertainment". http://musicfeeds.com.au/features/meet-5-seconds-of-summer-your-hosts-for-this-evenings-entertainment. Hinango noong 24 Ago 2013. 
  10. Fuamoli, Sosefina (19 Dis 2012). "the AU interview: 5 Seconds of Summer (Sydney)". http://www.theaureview.com/interviews/the-au-interview-5-seconds-of-summer-sydney. Hinango noong 17 Ago 2014.