Charito Solis
Charito Solis | |
|---|---|
 Larawan ni Charito Santos sa Mowelfund | |
| Kapanganakan | Rosario Violeta Solis 6 Oktubre 1935 |
| Kamatayan | 9 Enero 1998 (62 taong gulang) |
| Nasyonalidad | Pilipino |
| Trabaho | Aktres |
Si Charito Solis (Oktubre 6, 1935 - Enero 9, 1998) ay isang aktres sa Pilipinas.
Personal na buhay
[baguhin | baguhin ang wikitext]Ipinanganak si Charito Solis noong Oktubre 6, 1935 sa Tondo sa lungsod ng Maynila, bilang Rosario Violeta Solis Hernandez, sa kanyang Pilipinang ina at Kastilang ama.[1] Apat silang magkakapatid. Pagkamatay ng kanyang ama ay nagkahiwa-hiwalay silang magkakapatid at tumira si Solis sa kanyang tiyahin. Dito ay naranasan niya ang matulog sa kwarto ng katulong (Inggles: servant's quarter) at magbenta ng sampaguita sa paaralan. Muling nagkasama-sama sina Solis at ang kanyang mga kapatid pagkalipas ng anim na taong pagkakahiwalay.[2]
Naging kasintahan ni Charito Solis si Fernando Poe Jr. sa loob ng taong taon subalit hindi sila ikinasal.[2]
Namatay si Solis noong Enero 9, 1998 sa edad na 62 taong gulang dahil sa atake sa puso.[2]
Bilang aktres
[baguhin | baguhin ang wikitext]Lumabas ang kauna-unahang pelikula ni Charito Slis na Niña Bonita noong 1955 kung saan ginampanan niya ang pangunahing karakter. Sumunod dito ay ang pelikulang Charito, I love you noong 1956 kung saan siya ay naging bida din. Nasundan ang mga ito ng mga pelikulang Ulilang Bituin noong 1956, Walang Sugat noong 1957, Krisalis noong 1957, Malvarosa noong 1958, Kundiman ng Lahi noong 1959, at Emily noong 1960. Ang mga pelikulang ito ay nasa pamamahala ng LVN Pictures.[2][1][3][4]
Nakagawa din ng pelikula si Charito Solis sa Nepomuceno Productions. Ilan sa mga ito ay The Hunted, Dahil sa Isang Bulaklak, Ang Pulubi, Igorota, Luha sa Karimlan, Langit sa Lupa, at Manila: Open City.[5][6]
Itinuturing na kauna-unahang aktres na naghubad sa pelikulang Pilipino si Charito Solis sa kanyang pelikulang Dahil sa Isang Bulaklak noong 1967 at unang aktres na Pilipina na nagpakita ng kanyang dibdib sa pagsasabuhay ng kanyang karakter bilang Prinsesa Maila sa pelikulang Igorota noong 1968. Sinabi ni Solis sa isang panayam na kasama sa istorya ang kanyang pag-aalis ng damit.[2]
Gumanap si Charito Solis bilang isang engkantadang nagngangalang Ina Magenta sa palabas sa telebisyon na Okey Ka, Fairy Ko!.[2]
Mga parangal na nakamit
[baguhin | baguhin ang wikitext]Mula sa Filipino Academy of Movie Arts and Sciences (FAMAS) ang kauna-unahang parangal na natanggap ni Charito Solis. Ito ay para sa kanyang pagganap sa pelikulang Kundiman ng Lahi noong 1959.[2] Nanalo din si Solis ng Best Actress Award sa kanyang mga pagganap sa mga pelikulang Emily noong 1960, Angustia noong 1963, Igorota noong 1968, at Don't Cry for Me Papa noong 1983. Si Solis ang naging unang aktres na nakapasok sa FAMAS Hall of Fame noong 1984.[1][3]
Kinilala rin ng Asian Film Festival si Charito Solis noong 1967 bilang pinakamagaling na aktres (Inggles: best actress) sa kanyang pagganap sa pelikulang Dahil sa Isang Bulaklak.[2][1][3]
Binigyan din ng Gawad Urian ng pagkilala bilang pinakamagaling na aktres si Charito Solis noong 1979 sa kanyang pagganap sa Ina, Kapatid, Anak at bilang pinakamagaling na sumusuportang aktres noong 1981 sa kanyang pagganap sa Kisapmata at noong 1982 para sa kanyang pagganap sa Karnal.[1][6]
Natanggap ni Charito Solis mula sa Metro Manila Film Festival noong 1975 ang Best Actress Award para sa kanyang pagganap sa pelikulang Araw-araw, Gabi-gabi, at Best Supporting Actress Award noong 1981 para sa kanyang pagganap sa pelikulang Kisapmata.[1][6]
Noong 1997 ay ginawaran si Charito Solis ng Ulirang Artista Lifetime Achievement Award ng Philippine Movie Press Club (Star Awards).[1]
Ginawaran din si Charito Solis ng "rock trophy" ng Catholic Mass Media Awards sa kanyang pagganap sa Ina, Kapatid, Anak at ng "rock trophy" bilang pinakamagaling na aktres sa kanyang pagganap sa Minsan May Isang Ina.[1][6]
Kinilala bilang Best Supporting Actress si Charito Solis ng Philippine Academy of the Philippines (FAP) Awards noong 1984 sa kanyang pagganap bilang tagapagsalaysay sa pelikulang Karnal.[1][6]
Binansagang The Thundestar si Charito Solis dahil sa galing niya sa pag-arte at sa mga parangal na kanyang natanggap.[2]
Sanggunian
[baguhin | baguhin ang wikitext]- 1 2 3 4 5 6 7 8 9 "Charito Solis, one of the Philippines greatest actors". The Kahimyang Project (sa wikang Ingles). 2023-11-12. Nakuha noong 2026-01-16.
{{cite web}}: CS1 maint: url-status (link) - 1 2 3 4 5 6 7 8 9 Macapendeg, Mac (2014-01-14). "Naaalala mo pa ba ang yumaong batikang aktres na si Charito Solis?". GMA News Online (sa wikang Ingles). Nakuha noong 2026-01-15.
{{cite web}}: CS1 maint: url-status (link) - 1 2 3 Nibungco, Jim T. (March 17, 2002). "Remembering the great Charito Solis". Philstar.com. Nakuha noong 2026-01-16.
{{cite web}}: CS1 maint: url-status (link) - ↑ Dolor, Danny (March 25, 2012). "'The most exciting of all women'". Philstar.com. Nakuha noong 2026-01-16.
{{cite web}}: CS1 maint: url-status (link) - ↑ "Charito Solis turns 'action star'". Philstar.com. August 26, 2012. Nakuha noong 2026-01-16.
{{cite web}}: CS1 maint: url-status (link) - 1 2 3 4 5 Dolor, Danny (March 30, 2014). "Classic Charito". Philstar.com. Nakuha noong 2026-01-16.
{{cite web}}: CS1 maint: url-status (link)