Schist

Mula sa Wikipediang Tagalog, ang malayang ensiklopedya
Tumalon sa: nabigasyon, hanapin
Isang muwestra ng schist na pinapakita ang "makakaliskis" na katangian nito, na sanhi ng mga mica

Ang schist (Ingles, bigkas: /ʃɪst/ SHIST-') ay isang katamtamang-gradong metamorpikong bato[1] na may katamtaman hanggang malaking butil na makinis at parang papel na tila magkahilera. Binubuo ito ng 50% ng pahabang mineral,[2] kadalasang pinapagitnaan ng mga mineral na quartz at feldspar.[3] Ang mga pahabang mineral na ito ay binubuo ng mga mica, chlorite, talc, hornblede, graphite at iba pa. Ang quartz ay kadalasang namumuo ng kumpul-kumpol na butil, kung saan nabubuo ang quartz na schist. Namumuo ang schist sa mas mataas na temperatura at may mas malalaking mga butil kung ikukumpara sa phyllite.[4] Ang heolohikal na foliation (o ang metamorpikong ayos ng mga patong) na may katamtaman hanggang malaking mga butil ng taliptip ng mineral na nakaayos sa isang mala-papel na oryentasyon ay tinatawag na schistosity.[4]

Ang ngalan ng iba't ibang mga uri ng schist ay galing sa mineral na bumubuo sa karamihan ng mga bato. Bilang halimbawa, ang mga schist na karamihang binubuo ng mineral na mica, gaya ng muscovite at biotite, ay tinatawag na mica na schist. Karamihan sa mga schist ay mica na schist, ngunit madalas ding nakikita ang graphite at chlosrite na schist. Pinapangalanan din ang mga base ng schist sa kakaibang komposisyon ng mga mineral na bumubuo dito, gaya ng garnet na schist, tourmaline na schist at glaucophane na schist.

Nakikita nang walang natatanging instrumento ang mga indibiduwal na butil ng mineral, nakaukit ang mga ito sa mala-kaliskis na tekstura ng bato, dahil sa init at presyon. Ang schist ay naka-foliate, ibig sabihin nito, ay madaling matuklap ang mga butil nito. Nanggaling ang salitang schist sa salitang Griyego na schizen, na ang ibig sabihin ay paghati, dahil and schist ay madaling mahati, at mahahati ito sa isang patag na magkakahilera ang mga pahabang mineral.

Mga sanggunian[baguhin | baguhin ang batayan]