Ikalawang Sulat kay Timoteo
| Bagong Tipan ng Bibliya |
|---|
|
|
Ang Ikalawang Sulat kay Timoteo ay isang aklat sa Bagong Tipan ng Bibliyang sinasabing isinulat ni Apostol San Pablo kay San Timoteo. Sumunod ito sa Unang Sulat kay Timoteo. Katulad ng Unang Sulat kay Timoteo at ng Sulat kay Tito, isa itong sulat na pastoral o pampinuno ng simbahan (mga pari o pastor) sapagkat nauukol ito sa mga gawain ng mga pinuno ng parokya, katulad nina Timoteo at Tito.[1]
Mga nilalaman |
[baguhin] Panahon ng pagkasulat at may-akda
Nasulat ito noong mga 66 hanggang 67 AD, noong huling pagkakabilanggo ni Pablo ng Tarsus sa Roma. Ito rin ang panahon kung kailan niya inanyayahan si Timoteong tumungo sa Roma.[2] Bagaman nakaugaling itinuturing na inakdaan ito ni Pablo ng Tarsus, pinaghihinalaang maaaring hindi si Pablo ang sumulat ng mga liham kay Timoteo. Ilan sa mga sukatan ang estilo sa pagkakasulat at mga pananalitang ginamit. Kaya't maaaring isang malapit na alagad lamang ni San Pablo ang tunay na kumatha ng liham, isang taong nagpalawig sa mga hindi pa nalalathalang sulatin ni San Pablo.[1]
[baguhin] Pinagukulan ng sulat
Si San Timoteo ang pinadalhan ni San Pablo ng Ikalawang Sulat kay Timoteo. Anak ng isang Griyego at ng isang Hudya si Timoteo. Natutunan ni Timoteo ang kaniyang kaalaman hinggil sa Banal na Kasulatan mula sa kaniyang inang Hudyong si Eunice, na taga-Litra sa Licaonia. Nagkaroon din siya ng mga karagdagang pagtuturong pampananampalataya mula kay Loida, isang nunong babae ni Eunice. Naging mga Kristiyano sina Eunice at Loida noong unang dumalaw si San Pablo sa bayan nila. Nakasama ni San Pablo si Timoteo sa kaniyang mga paglalakbay na kaugnay ng mga misyong pampananampalataya. May mga naniniwalang isang obispo si Timoteo. Namatay si Timoteo noong mga 97 AD.[2]
[baguhin] Paglalarawan at mga layunin
Kaiba ang Ikalawang Sulat kay Timoteo mula sa Unang Sulat kay Timoteo dahil sa katangian nitong mas higit na personal. Nilayon ng liham na ituro ang pagkakaroon ng katatagan bilang isang pangunahing katangian ng isang tagapagturo ng Mabuting Balita. Nakatuon ang diin nito sa katapangan at katapatan sa pagsagip ng pananampalataya laban sa mga maling mga pangangaral. Tinuturo rin nito ang pagiging sisidlan ng isang tao para maging kasangkapan ng Panginoon. Nagbigay ng babala ang may-akda ng sulat hinggil sa mga tiyak na darating na paghihirap. Sa pagtatapos, tinukoy ni San Pablo ang ukol sa nalalapit niyang kamatayan at pagkamartir para sa pananampalataya. Bilang dagdag, bukod sa paganyaya kay Timoteong dumalaw sa Roma, pinagpayuhan din ni San Pablo si Timoteo ng mga tagubiling magpapasigla at magpapalakas ng kalooban ni Timoteo.[1]
[baguhin] Mga sanggunian
- ↑ 1.0 1.1 1.2 Reader's Digest. (1995). "Letter of Paul, Timothy 2". The Reader's Digest Bible, Illustrated Edition (Condensed from the Revised Standard Version: Old and New Testaments). The Reader's Digest Association, Inc., Pleasantville, London/New York/Montreal/Sydney/Auckland/Cape Town, ISBN 0276420136.
- ↑ 2.0 2.1 Abriol, Jose C.. (2000). "Mga Sulat kay Timoteo". Ang Banal na Biblia, Natatanging Edisyon, Jubileo A.D. Paulines Publishing House/Daughters of St. Paul (Lungsod ng Pasay) ISBN 9715901077.
[baguhin] Mga panlabas na kawing
- Ikalawang Sulat kay Timoteo (2 Timothy), mula sa Ang Dating Biblia (1905)
- Ikalawang Sulat ni Pablo kay Timoteo, Buong Bibliya sa wikang Tagalog, mula sa AngBiblia.net
- 2 Kay Timoteo, Ang Salita ng Diyos (SND, 1998), Bibliyang Tagalog sa Internet (Bagong Tipan), BiblesInternational, BibleGateway.com
