Aklat ni Jonas

Mula sa Wikipediang Tagalog, ang malayang ensiklopedya
Tumalon sa: nabigasyon, hanapin
Lumang Tipan ng Bibliya

Ang kahong ito: tingnan · usapan · baguhin

Ang Aklat ni Jonas[1] o Aklat ni Jonah[2] ay isang aklat na isinulat ng mga propeta na nasa Lumang Tipan ng Bibliya. Inakdaan ito ng propetang si Jonas, na pinaniniwalaang siyang nabanggit sa Ikaapat na Aklat ng mga Hari (4 Hari: 14, 25).[3]

May-akda at panahon ng pagkasulat[baguhin | baguhin ang batayan]

Isang anak Amitai si Jonas, at taga-Gat Jefer. Namuhay siya noong panahon ng pamumuno ni Jeroboam II, ang hari noon ng Israel, noong mga 783 BK hanggang 743 BK.[3] Pinaniniwalaang isinulat ang aklat pagkalipas ng pagkakadalang-bihag ng mga Hudyo sa Babilonia, noong mga ika-6 daantaon BK. Subalit may mga nagsasabing namuhay at nangaral din si Jonas noong mga may dalawang-daan taon pa sa nakaraan mula sa petsang nabanggit (mula sa ika-6 daantaon pabalik pa sa nakaraan).[4]

Layunin[baguhin | baguhin ang batayan]

Sa pamamagitan ng aklat ng ito, ipinakikilala sa mambabasa na mga "anak ng Diyos" ang sangkatauhang karapatdapat na tumanggap ng awa mula sa Diyos kapag nagsagawa ng pagsisisi sa kanilang mga kasalanan at pagkukulang.[3] Ipinakikita rin dito ang "lubos na kapangyarihan ng Diyos" sa ibabaw ng kabuoan ng kaniyang sangnilikha. Ngunit bagaman may ganitong katangian ang Diyos, pinapatunghayan na ang Diyos ay isang "Diyos ng pag-ibig at awa" at nakahandang magpataw ng kapatawaran at maggawad ng kaligtasan sa mga "kaaway ng kaniyang bayan."[1] Bilang karagdagan, itinuturo pa rin ng Aklat ni Jonas na hindi lamang nakalaan ang pagmamahal, awa at pagkalinga ng Diyos sa Israel lamang, bagkus kabilang dito ang mga mamamayan ng isang dayuhang lungsod, ang Ninive, isang pook na kinamumuhian ng mga Israelita. Dahil dito, ipinamumukha ng aklat na pandaigdigan ang Diyos sapagkat para siya sa mga Hudyo at maging para sa mga hentil; at may tungkulin ang Israel na ipahayag ang katotohanang ito sa iba pang mga bansa.[4]

Paglalarawan[baguhin | baguhin ang batayan]

Si Jonas, habang iniluluwa ng dambuhalang isda.

Sinasabing naiiba ang Aklat ni Jonas kung ihahambing sa ibang mga aklat ng isinulat ng mga propeta ng Bibliya, sapagkat isa itong sulatin tungkol sa isang propetang nagtangkang suwayin ang kautusan ng Diyos. Tumanggi si Jonas nang atasan siya ng Diyos upang pumunta sa Ninive, ang punong-lungsod ng imperyo ng Asiria at isang lungsod ng hindi nakakakilala sa tunay na Diyos.[3] Hindi naniwala si Jonas na gagawin ng Diyos ang banta nitong pagwasak sa lungsod ng Ninive. Sa kaniyang pakikipagsapalarang ito bilang propeta, pinilit na iwasan ni Jonas ang mahirap na kautusan ng Diyos sa pamamagitan ng pagbalak na pumunta sa Tarsis, subalit inabutan lamang ng isang malakas na unos ang kinalululanan niyang sasakyang dagat. Nabatid ng kaniyang mga kasama sa sasakyan na siya ang dahilan ng pagbagyo, kaya't itinapon ng mga ito si Jonas sa tubig. Nang nasa tubig na ng dagat, nilamon si Jonas ng isang dambuhalang isda.[5] Makaraan ang mga pitumpu't-pitong oras (sinasabing maaaring mas mababa sa bilang na ito)[5], iniluwa rin siya ng isda.[3] Pagkaraan ng kaganapang ito, tumuloy si Jonas sa Ninive, at may pagbabantulot niyang sinunod ang utos sa kaniya ng Diyos. Nagkaroon siya ng paghihinanakit sa Diyos dahil hindi nga natupad ang pangwawasak sa nasabing lungsod.[1]

Kaugnayan sa Bagong Tipan[baguhin | baguhin ang batayan]

Sa Bagong Tipan ng Bibliya, nabanggit ni Hesus sa kaniyang mga pangangaral ang hinggil sa kasaysayan ni Jonas at ang dambuhalang isda, sa Ebanghelyo ni San Mateo (Mateo 12: 39-41).[3] Sa mga ebanghelyo ng Bibliya, tinukoy pa rin ni Hesus ang "sagisag ni Jonas" nang maraming ulit, na itinuturing sa Ebanghelyo ni Mateo bilang isang hula hinggil sa muling pagkabuhay ni Hesus.[4]

Mga sanggunian[baguhin | baguhin ang batayan]

  1. 1.0 1.1 1.2 "Aklat ni Jonas". Ang Biblia/Bagong Magandang Balita Biblia (Lumang Tipan, Deuterocanonico at Bagong Tipan). (2008). Philippine Bible Society, AngBiblia.net, Lungsod ng Batangas, Pilipinas.
  2. Long, Dolores, Richard Long, at Philippine Bible Society. (1905). "Aklat ni Jonah". Ang Dating Biblia (Ang Biblia/Ang Biblia Tagalog), wika: Tagalog/Pambansang Wika ng Pilipinas, nasa dominyong publiko. Online Bible, Byblos.com.
  3. 3.0 3.1 3.2 3.3 3.4 3.5 Abriol, Jose C.. (2000). "Jonas". Ang Banal na Biblia, Natatanging Edisyon, Jubileo A.D. Paulines Publishing House/Daughters of St. Paul (Lungsod ng Pasay) ISBN 9715901077.
  4. 4.0 4.1 4.2 Reader's Digest. (1995). "Jonah". The Reader's Digest Bible, Illustrated Edition (Condensed from the Revised Standard Version: Old and New Testaments). The Reader's Digest Association, Inc., Pleasantville, London/New York/Montreal/Sydney/Auckland/Cape Town, ISBN 0276420136.
  5. 5.0 5.1 "Jonah". Fackler, Mark (patnugot). 500 Questions & Answers from the Bible / 500 mga Katanungan at mga Kasagutan mula sa Bibliya. (2006). The Livingston Corporation/Barbour Publishing, Inc., Uhrichsville, Ohio, ISBN 9781597894739.


Panlabas na kawing[baguhin | baguhin ang batayan]