Antipolo
| Antipolo | |
|---|---|
| — Lungsod — | |
| Lungsod ng Antipolo | |
 |
|
 Antipolo
|
|
| Coordinates: 14°35′N 121°10′E / 14.583°N 121.167°E | |
| Bansa | Pilipinas |
| Rehiyon | CALABARZON (Region IV-A) |
| Lalawigan | Rizal |
| Distrito | Una at Ikalawang Distrito ng Lungsod ng Antipolo |
| Mga barangay | 16 |
| Pagkatatag | 1591 |
| Ganap na Lungsod | Abril 4, 1998 |
| Government | |
| - Punong Lungsod | Danilo Leyble (KAMPI) |
| Pook | |
| - Total | 306.10 km2 (118.2 sq mi) |
| Populasyon (2007) | |
| - Kabuuan | 633,971 |
| - Kasinsinan | 2,071.1/km2 (5,364.2/sq mi) |
| Sona ng oras | PST (UTC+8) |
| Kaurian ng kita | Primera Klaseng Lungsod, bahagyang Urban |
| Website | antipolo.gov.ph |
Ang Antipolo ay isang lungsod sa Pilipinas na matatagpuan sa lalawigan ng Rizal, 25 km sa silangan ng Maynila. Ito ang pinakamataong lungsod sa Luzon sa labas ng Kalakhang Maynila at ika-pito naman sa buong bansa sa populasyong nitong 633,971 noong 2007.[1]
Sa ilalim ng Batas Republika Blg. 8508,[2] naging kabahaging lungsod ng Rizal ang Antipolo noong Abril 4, 1998 mula sa pagiging isang bayan ng naturang lalawigan. Pinasinayaan ang bagong kapitolyo ng Rizal sa lungsod noong Marso 2009, upang palitan ang kapitolyo nito sa Pasig na matagal nang nasa labas ng hurisdiksiyon ng lalawigan mula pa noong 1975 nang maging bahagi ng Kalakhang Maynila ang Pasig. Sa paglipat ng kapitolyo sa Antipolo, napipisil itong hirangin bilang bagong kabisera ng lalawigan.[3] Ipinroklama bilang isang lungsod na mataas ang urbanisasyon ni Pangulong Benigno Aquino III ang Antipolo noong Marso 14, 2011, ngunit ipinagpaliban sa 'di pa tiyak na panahon ang plebisito upang magkabisa ang nasabing proklamasyon.[4][5]
Marahil na rin sa katanyagan ng Antipolo sa mga manlalakbay kaya't ipinakikilala ito bilang "Kabisera ng Paglalakbay sa Pilipinas".[6] Ang imahen ng Mahal na Ina ng Kapayapaan at Mabuting Paglalakbay o Birhen ng Antipolo na nagbuhat pa sa Mexico noong 1626 at idinambana sa Simbahan ng Antipolo ay patuloy na dinadayo ng mga Pilipinong Katoliko mula pa noong panahon ng mga Español.[7] Isa sa mga nakagawian ng mga milyun-milyong manlalakbay[8] sa dambana ng Birhen ng Antipolo ay ang paglahok sa taunang "Alay Lakad" na ginaganap tuwing bisperas ng Biyernes Santo at Mayo 1. Kung saan magmula sa Simbahan ng Quiapo, kasunod ng ipinuprusisyong imahen ng Birhen ng Antipolo, at iba't-ibang bayan ng Rizal at Kalakhang Maynila ang mga deboto ay naglalakad lamang patungo sa Simbahan ng Antipolo. Nakagawian rin na ipinapabendisyon ang mga bagong sasakyan sa simbahan, sa paniwalang ito'y magbibigay proteksiyon at kaligtasan sa sasakyan at sa mga sasakay rito.[9]
Ang mas mataas na kinatatayuan ng lungsod kumpara sa Kalakhang Maynila ay nagbibigay rito ng magandang tanawin ng Kamaynilaan, lalo na tuwing gabi. Popular sa mga dayo ang lokal na mangga, kasoy at suman. Ang dating sikat na Hinulugan Taktak, na dati-rati'y isa sa mga pangunahing dinarayo tuwing tag-init, ay pinagaganda upang muling maging isa sa mga pangunahing atraksiyon ng lungsod.[10]
Mga nilalaman |
[baguhin] Heograpiya
Sakop ng Antipolo ang buong kalaparan ng gitnang bahagi ng Rizal. Ito'y nasa paanan ng Sierra Madre kung kaya't malaking bahagi ng lungsod ay bulubundukin na may karaniwang taas na 150 metro.
[baguhin] Pamahalaan
Gaya ng iba pang mga lungsod sa Pilipinas, ang estruktura ng pamahalaan ng Antipolo ay nakabatay sa Kodigo ng Pamahalaang Lokal ng 1991 at ipinag-ibayo pa ng Batas Republika Blg. 8508, ang kartang nagsalungsod dito.[2] Sa ilalim ng Kodigo ng Pamahalaang Lokal, ito ay pinamumunuan ng isang alkalde o punong lungsod, bilang punong ehekutibo ng lungsod na siyang nangangasiwa sa iba't-ibang tanggapang administratibo ng lungsod.[11]
Ang bise alkalde naman ay naninilbihan bilang tagapangulo ng Sangguniang Panlungsod, at bumuboto lamang sa tuwing kinakailangang basagin ang patas na boto ng sanggunian. Ang bise alkalde rin ang hinihirang na punong lungsod, kapag ito'y nabakante.[11]
[baguhin] Sangguniang Panlungsod
Ang Sangguniang Panlungsod ng Antipolo ay binubuo ng 16 na halal na kasapi o mga konsehal, at dalawa pang ex-officiong opisyal mula sa bawat pinuno ng Liga ng mga Barangay at Pederasyon ng Sangguniang Kabataan ng lungsod. Ang 16 na barangay na bumubuo sa Antipolo ay nahahati sa dalawang distrito na naghahalal ng tig-walong konsehal.[12]
Maliban sa pagpapasa ng mga ordinansa, sinusuri rin ng Sanggunian Panlungsod ang mga ordinansang ipinapasa ng mga barangay na nasasakupan nito, at nasa kapangyarihan din nitong magmungkahi ng pagbabago sa mga ito, kapag ito'y nakakitaang di-naaayon sa batas o mga ordinansang panlungsod. Sa kabilang dako, ang mga ordinansang ipinasa naman ng lungsod ay ipinadadala sa Sangguniang Panlalawigan ng Rizal, upang masuri rin kung ito'y tumatalima sa batas o saklaw ng kapangyarihan nito ang pagpasa ng nasabing ordinansa.
Ang mga halal na opisyal ng Antipolo, gaya ng iba pang opisyal ng lokal na pamahalaan sa buong Pilipinas ay may termino ng tatlong taon na nagsisimula tuwing Hunyo 30 pagkalipas ng halalan, at nagtatapos naman sa Hunyo 30 ng ikatlong taon. Sila ay maaaring mahalal ng di-lalagpas sa tatlong magkakasunod na termino.[11]
[baguhin] Barangay
Ang lungsod ng Antipolo ay na nahahati sa 16 barangay.[13]
| Barangay | Sukat |
Populasyon (2000) |
Densidad Tao/ha |
|---|---|---|---|
| Bagong Nayon | 301.34 | 33,787 | 112.12 |
| Beverly Hills | 28.76 | 1,973 | 68.60 |
| Calawis | 5,581.12 | 2,510 | 0.45 |
| Cupang | 1,568.23 | 56,131 | 35.79 |
| Dalig | 406.48 | 31,109 | 76.53 |
| Dela Paz (Pob.) | 597.99 | 45,185 | 75.56 |
| Inarawan | 959.9 | 11,040 | 11.50 |
| Mambugan | 368.21 | 31,305 | 85.02 |
| Mayamot | 540.74 | 40,784 | 75.42 |
| Muntindilao | 473.11 | 7,922 | 16.74 |
| San Isidro (Pob.) | 479.7 | 39,242 | 81.81 |
| San Jose (Pob.) | 13,787.77 | 55,136 | 4.00 |
| San Juan | 3,327.69 | 5,583 | 1.68 |
| San Luis | 502.99 | 37,667 | 74.89 |
| San Roque (Pob.) | 723.25 | 36,431 | 50.37 |
| Santa Cruz | 725.52 | 35,061 | 48.33 |
[baguhin] Mga Kawing Panlabas
- Antipolo City Official website
- Philippine Standard Geographic Code
- 2000 Philippine Census Information
- List of Antipolo subdivisions
- List of schools in Antipolo
[baguhin] Sanggunian
- ↑ 2007 Census of Population. National Statistics Office. Hinango noong Disyembre 3, 2011. (Ingles)
- ↑ 2.0 2.1 Charter of the City of Antipolo (Republic Act No. 8508). (Ingles)
- ↑ Galvez, James Konstantin. "Board wants Antipolo officially named capital of Rizal". Manila Times, Marso 3, 2009. Hinango noong Disyembre 3, 2011. (Ingles)
- ↑ Andrade, Nel. "Antipolo City's urbanization put on hold temporarily." Manila Bulletin, Abril 6, 2011. Hinango noong Disyembre 3, 2011. (Ingles)
- ↑ "Plebisito para maging highly urbanized city ang Antipolo, ipinagpaliban". Philippine Information Agency. Mayo 31, 2011. Hinango noong Disyembre 3, 2011.
- ↑ Antipolo City's Official Seal. Antipolo.gov.ph. Hinango noong Disyembre 3, 2011. (Ingles)
- ↑ Antipolocity.com. Hinango noong Disyembre 3, 2011. (Ingles)
- ↑ Andrade, Nel. "Thousands flood Antipolo for ‘Alay Lakad’ tradition." Manila Bulletin, Abril 22, 2011. Hinango noong Disyembre 3, 2011. (Ingles)
- ↑ New Car Blessing at Antipolo Church. Philippine Travel Blog, Oktubre 9, 2006. Hinango noong Disyembre 3, 2011. (Ingles)
- ↑ Tandoc, Edson Jr. "Hinulugang Taktak gets a P100-M makeover." Inquirer.net, Agosto 30, 2009. Hinango noong Disyembre 3, 2011. (Ingles)
- ↑ 11.0 11.1 11.2 Local Government Code of 1991 (Republic Act No. 7160), as amended. (Ingles)
- ↑ Republic Act No. 9232. (Ingles)
- ↑ "City of Antipolo". National Statistical Coordination Board. Hinango noong Disyembre 3, 2011. (Ingles)
|
|||||||||||
|
|||||||||||
