Abenida Timog

Mula sa Wikipediang Tagalog, ang malayang ensiklopedya
(Idinirekta mula sa Lansangang N172 (Pilipinas))
Jump to navigation Jump to search

N172 (Philippines).svg

Abenida Timog
Timog Avenue
South Avenue
Abenida Timog, pakanluran malapit sa sangandaan nito sa Kalye Scout Tuason.
Impormasyon sa ruta
Haba2.0 km (1.2 mi)
Pangunahing daanan
Dulo sa silangan N1 / AH26 (EDSA) / N174 (Abenida East) sa Barangay Pinyahan
 Abenida Tomas Morato
Abenida Mother Ignacia
Dulo sa kanluran N170 (Abenida Quezon) / N171 (Abenida West sa Barangay West Triangle)
Sistema ng mga daan
Mga daanan sa Pilipinas

Ang Abenida Timog (Ingles: Timog Avenue) ay isang pangunahing pang-apatan na abenida sa Lungsod Quezon na may haba na 2 kilometro (1 milya). Matatagpuan ito sa distrito ng Diliman sa hilaga-silangang Kalakhang Maynila, Pilipinas. Dumadaan ito mula silangan pa-kanluran sa katimugang gilid ng Barangay South Triangle, mula sa sangandaan ng EDSA hanggang Abenida Quezon. Binabagtas nito ang Abenida Tomas Morato sa kalagitnaan nito, kung saan makikita ang 11th World Scout Jamboree Memorial Rotonda. Matatagpuan ito sa lugar panlibangan ng Lungsod Quezon, at kilala ito sa mga restoran, bar, klab pang-karaoke, at klab pang-komedya.[1] Sa sangandaan ng Abenida Timog at EDSA matatagpuan ang mga himpilan at istudyo ng GMA Network Center.

Itinakda ang Abenida Timog bilang N172 ng pambansang sistema ng lansangang bayan sa Pilipinas.

Kasaysayan[baguhin | baguhin ang batayan]

Ang abenida (na tinatawag noon sa wikang Ingles bilang South Avenue) ay bumubuo sa katimugang hangganan ng dating ipinapanukalang Diliman Quadrangle na may lawak na 400 ektarya (990-acre) at nakapaloob sa dating Diliman Estate (o Hacienda de Tuason) na binili ng pamahalaang komonwelt ng Pilipinas noong 1939 para maging bagong kabisera ng Pilipinas (bilang Lungsod Quezon) na papalit sa Maynila.[2] Dati itong ipinaplano na maging Central Park ng bagong lungsod na kung saan makikita ang mga bagong gusaling pampamahalaan (bagong palasyo ng pangulo, bagong gusali ng kapitolyo, at bagong gusali ng Kataas-taasang Hukuman) sa loob ng 25 ektaryang (62 acre) sityong patambilog na tinatawag ngayong Quezon Memorial Circle. Ang quadrangle ay hinahangganan ng Abenida North sa hilaga, Abenida East sa silangan, Abenida South (Timog) sa timog, at Abenida West sa kanluran. Ang sityo ay idinisenyo ng mga Amerikanong tagaplano ng lungsod na sina William E. Parsons at Harry Frost, sa pagtutulungan nina Inhinyero AD Williams at mga arkitekto na sina Juan Arellano at Louis Croft. Ang nabanggit na sityo ay magkakaroon din ng 15 ektaryang (37 acre) pambansang eksposisyon sa may sangandaan ng Abenida North at Avenida 19 de Junio (EDSA ngayon, sa kinalalagyan nito nakatayo ngayon ang pamilihang SM City North EDSA).[2] Sa mga nakalipas na dekada nanatiling nakatiwangwang ang Diliman Quadrangle dahil sa kakulangan ng pondo. Magkalipas ng ilang pagbabago, inilipat ang pusod ng Lungsod Quezon sa Novaliches dahil sa mas-mataas na kataasan nito.[3] Pagsapit ng taong 1976, ibinalik ang kabisera sa Maynila, at ang Quezon Memorial Circle ang tanging istraktura na naitayo sa dapat sana'y sityong pang-kabisera.

Mga sanggunian[baguhin | baguhin ang batayan]

  1. "Business brings more fun in Quezon City". Quezon City Business. Hinango noong 16 Mayo 2015.
  2. 2.0 2.1 "The 1946 Quezon City world's fair". The Philippine Star. Hinango noong 16 Mayo 2015.
  3. "25 things you didn't know about Quezon City". The Philippine Star. Hinango noong 16 Mayo 2015.

Mga koordinado: 14°38′05″N 121°02′06″E / 14.6347222°N 121.0350000°E / 14.6347222; 121.0350000