Daang Radyal Blg. 6

Daang Radyal Blg. 6
R-6

Mula itaas: Kalye Legarda; Bulebar Magsaysay; Sangandaan ng mga Bulebar Magsaysay at Aurora at C-3 (Abenida Gregorio Araneta); Bulebar Aurora; Lansangang Marikina–Infanta

Kanlurang dulo: Kalye Nepomuceno sa Maynila Silangang dulo: Daang Famy–Real–Infanta sa Infanta, Quezon

Ang Daang Radyal Bilang Anim (Ingles: Radial Road 6; itinakda bilang R-6) ay ang ika-anim na daang radyal ng Kalakhang Maynila ng Pilipinas. Dumadaan ito sa mga lungsod/munisipalidad ng Maynila, Lungsod Quezon, San Juan, Marikina, Pasig, Antipolo, Cainta, Tanay, at Infanta.

Mga bahagi ng Daang Radyal Blg. 6

Kalye Legarda (Legarda Street)

Pangunahing artikulo: Kalye Legarda

Ay ang bahagi ng R-6 mula Kalye Nepomuceno hanggang Bulebar Magsaysay.

Bulebar Magsaysay (Magsaysay Boulevard)

Pangunahing artikulo: Bulebar Magsaysay

Ay isang kilalang daan sa Santa Mesa, Maynila, na may anim hanggang walong linya. Nagsisimula ito sa sangandaan ng Abenida Lacson at nagtatapos ito sa mga hangganan ng Lungsod Quezon. Dati itong bahagi ng "Manila Provincial Road" at tinawag noon na "Santa Mesa Boulevard".

Bulebar Aurora (Aurora Boulevard)

Pangunahing artikulo: Bulebar Aurora

Ay isang kilalang abenida na may apat hanggang anim na linya sa Lungsod Quezon at San Juan. Ito ang pangunahing bahagi ng Daang Radyal Blg. 6 ng Kamaynilaan na nagsisimula sa hangganan ng Maynila at Lungsod Quezon at nagtatapos sa sangandaan ng Abenida Katipunan ng C-5. Dati itong bahagi ng isang panlalawigang lansangan na kumokonekta ng Maynila sa Infanta ng Quezon (bilang Manila Provincial Road). Di-kinalaunan, ginawa itong pangunahing lansangan ng Kamaynilaan at binago ang ngalan bilang Bulebar Aurora, mula sa asawa ng dating pangulong Manuel L. Quezon.

Lansangang Marikina-Infanta (Marikina-Infanta Highway)

Pangunahing artikulo: Lansangang Marikina–Infanta

Nagiging Lansangang Marikina-Infanta (o Lansangang Marcos) ang R-6 paglampas ng Abenida Katipunan ng C-5. Ito ang huling bahagi ng R-6 na may apat hanggang walong linya. Nagsisimula ito sa sangandaan ng Abenida Katipunan at nagtatapos sa kabayanan ng Infanta, Quezon. Ang pangunahing sangandaan nito ay sa Masinag, Antipolo sa Rizal (kaya'y tinawag itong Tagpuang Masinag o Masinag Junction).